ನಟ ನಾನಾ ಪಾಟೇಕರ್ ಅವರ ಸಾವಿಗೆ ಮುನ್ನದ ಕೊನೆಯ ಕೆಲವು ಗಂಟೆಗಳ ವಿವರಗಳು ಇದೀಗ ಬೆಳಕಿಗೆ ಬಂದಿವೆ. ಅಕ್ಟೋಬರ್ 8ರ ಗುರುವಾರ ಮುಂಜಾನೆ ಅವರು ಎದೆನೋವಿನ ಬಗ್ಗೆ ಸ್ನೇಹಿತನಿಗೆ ಸಂದೇಶ ಕಳುಹಿಸಿದ್ದು, ಬಳಿಕ ಅವರ ಆರೋಗ್ಯ ಸ್ಥಿತಿ ವೇಗವಾಗಿ ಹದಗೆಟ್ಟಿದ್ದಾಗಿ ವರದಿಗಳು ತಿಳಿಸಿವೆ.
ಗೋವಾದ ಮಣಿಪಾಲ್ ಆಸ್ಪತ್ರೆಯ ಆಂಕಾಲಜಿ ವಿಭಾಗದ ಮುಖ್ಯಸ್ಥ ಡಾ. ಸಾಲ್ಕರ್ ಅವರ ಪ್ರಕಾರ, ನಾನಾ ಪಾಟೇಕರ್ ಅವರು ಮುಂಜಾನೆ ಸುಮಾರು 2:30ರ ವೇಳೆಗೆ ತಮ್ಮ ಸ್ನೇಹಿತನಿಗೆ ತಾವು ಆರೋಗ್ಯವಾಗಿಲ್ಲ ಎಂದು ಸಂದೇಶ ಕಳುಹಿಸಿದ್ದರು. ಆದರೆ ಅದು ರಾತ್ರಿ ಸಮಯವಾಗಿದ್ದರಿಂದ ಆ ಸಂದೇಶ ತಕ್ಷಣ ಸ್ನೇಹಿತನ ಗಮನಕ್ಕೆ ಬಂದಿರಲಿಲ್ಲ. ಬಳಿಕ ಪಾಟೇಕರ್ ಸ್ನೇಹಿತನಿಗೆ ಕರೆ ಮಾಡಿದ್ದು, ಅವರ ಸ್ಥಿತಿಯ ಬಗ್ಗೆ ಆತಂಕಗೊಂಡ ಸ್ನೇಹಿತ ಬೆಳಗಿನ ಜಾವ ಸುಮಾರು 4 ಗಂಟೆಗೆ ಗೋವಾದಲ್ಲಿರುವ ಅವರ ನಿವಾಸಕ್ಕೆ ತೆರಳಿದ್ದರು.
“ರಾತ್ರಿ ಸುಮಾರು 2:30ರ ಸುಮಾರಿಗೆ ತಮಗೆ ಹುಷಾರಿಲ್ಲ ಎಂದು ಅವರು ತಮ್ಮ ಸ್ನೇಹಿತರಿಗೆ ಸಂದೇಶ ಕಳುಹಿಸಿದ್ದರು. ಆದರೆ ರಾತ್ರಿಯ ಸಮಯವಾಗಿದ್ದರಿಂದ ಆ ಸ್ನೇಹಿತರು ಸಂದೇಶವನ್ನು ನೋಡಿರಲಿಲ್ಲ. ನಂತರ ಅವರು ಕರೆ ಮಾಡಿದರು. ಆ ಸ್ನೇಹಿತ ಸುಮಾರು 4 ಗಂಟೆಯ ಸುಮಾರಿಗೆ ಅವರ ಮನೆಗೆ ಹೋದರು,” ಎಂದು ಡಾ. ಸಾಲ್ಕರ್ ಹೇಳಿದರು. “ಅಷ್ಟರಲ್ಲಾಗಲೇ ಅವರಿಗೆ (ಪಾಟೇಕರ್ ಅವರಿಗೆ) ಬೆವರುತ್ತಿತ್ತು ಮತ್ತು ಅವರು ಪ್ರಜ್ಞೆ ತಪ್ಪುತ್ತಿದ್ದರು,” ಎಂದು ಡಾ. ಸಾಲ್ಕರ್ ಹೇಳಿದ್ದಾರೆ.
ಅಲ್ಲಿದ್ದವರು ಪ್ರಾಥಮಿಕ ನೆರವು ನೀಡಲು ಪ್ರಯತ್ನಿಸಿದರೂ, ಅವರ ಆರೋಗ್ಯ ಸ್ಥಿತಿ ನಿರಂತರವಾಗಿ ಹದಗೆಡುತ್ತಲೇ ಇತ್ತು. ಪಾಟೇಕರ್ ಅವರ ನಿವಾಸಕ್ಕೆ ಬಂದ ಸ್ನೇಹಿತರು ಅವರ ಸ್ಥಿತಿ ಗಂಭೀರವಾಗಿರುವುದನ್ನು ಕಂಡರು. ಪಾಟೇಕರ್ ಮಣಿಪಾಲ್ ಆಸ್ಪತ್ರೆಯ ಸಮೀಪದಲ್ಲಿ ತಂಗಿದ್ದರು ಎಂದು ವೈದ್ಯರು ತಿಳಿಸಿದರು. ಹೀಗಾಗಿ ಮನೆಯ ನೋಡಿಕೊಳ್ಳುವ ಸಿಬ್ಬಂದಿಯನ್ನು ಆಸ್ಪತ್ರೆಗೆ ಕಳುಹಿಸಿ ಆಂಬ್ಯುಲೆನ್ಸ್ ವ್ಯವಸ್ಥೆ ಮಾಡಲು ಸೂಚಿಸಿದರು. ಬಳಿಕ ತುರ್ತು ವೈದ್ಯಕೀಯ ತಂಡ ಪಾಟೇಕರ್ ಅವರ ಮನೆಗೆ ಆಗಮಿಸಿತು. ಆದರೆ ವೈದ್ಯಕೀಯ ಸಿಬ್ಬಂದಿ ತಲುಪುವ ಹೊತ್ತಿಗೆ ಅವರು ಯಾವುದೇ ಪ್ರತಿಕ್ರಿಯೆ ನೀಡದ ಸ್ಥಿತಿಯಲ್ಲಿದ್ದರು. ಇದರಿಂದ ತಕ್ಷಣವೇ ಹೃದಯ-ಶ್ವಾಸಕೋಶ ಪುನರುಜ್ಜೀವನ (ಸಿಪಿಆರ್) ಪ್ರಕ್ರಿಯೆಯನ್ನು ಆರಂಭಿಸಲಾಯಿತು.
ನಂತರ ನಾನಾ ಪಾಟೇಕರ್ ಅವರನ್ನು ಬೆಳಗಿನ ಜಾವ ಸುಮಾರು 4:20ಕ್ಕೆ ಗೋವಾದ ಮಣಿಪಾಲ್ ಆಸ್ಪತ್ರೆಗೆ ದಾಖಲಿಸಲಾಯಿತು. ಆಸ್ಪತ್ರೆಯಲ್ಲಿ ವೈದ್ಯರು ಅವರನ್ನು ಬದುಕಿಸಲು ನಿರಂತರ ಪ್ರಯತ್ನ ಮುಂದುವರಿಸಿದರು. ಡಾ. ಸಾಲ್ಕರ್ ಅವರ ಪ್ರಕಾರ, ವೈದ್ಯಕೀಯ ತಂಡ ಸುಮಾರು 45 ನಿಮಿಷಗಳ ಕಾಲ ಹೃದಯ ಮಸಾಜ್ ಹಾಗೂ ಸಿಪಿಆರ್ ನಡೆಸಿತು. ಆದರೆ ಎಲ್ಲ ಪ್ರಯತ್ನಗಳೂ ವಿಫಲವಾಗಿದ್ದು, ಬೆಳಗಿನ ಜಾವ ಸುಮಾರು 5:20ಕ್ಕೆ ಅವರನ್ನು ಮೃತರೆಂದು ಘೋಷಿಸಲಾಯಿತು.
ನಾನಾ ಪಾಟೇಕರ್ ಅವರು ಮಣಿಪಾಲ್ ಆಸ್ಪತ್ರೆಯ ನೋಂದಾಯಿತ ರೋಗಿಯಾಗಿರದ ಕಾರಣ, ಈ ಪ್ರಕರಣವನ್ನು ವೈದ್ಯಕೀಯ-ಕಾನೂನು (ಮೆಡಿಕೊ-ಲೀಗಲ್) ಪ್ರಕರಣವಾಗಿ ಪರಿಗಣಿಸಲಾಯಿತು. ಇದರ ಬಗ್ಗೆ ಪೊಲೀಸರಿಗೆ ಮಾಹಿತಿ ನೀಡಲಾಗಿದ್ದು, ನಂತರ ಮರಣೋತ್ತರ ಪರೀಕ್ಷೆಗಾಗಿ ಅವರ ಪಾರ್ಥಿವ ಶರೀರವನ್ನು ಗೋವಾ ಮೆಡಿಕಲ್ ಕಾಲೇಜಿಗೆ ರವಾನಿಸಲಾಯಿತು.
ಸಾವಿನ ನಿಖರ ಕಾರಣವನ್ನು ಆಸ್ಪತ್ರೆ ಸ್ವತಂತ್ರವಾಗಿ ದೃಢೀಕರಿಸಲು ಸಾಧ್ಯವಿಲ್ಲ ಎಂದು ಡಾ. ಸಾಲ್ಕರ್ ಸ್ಪಷ್ಟಪಡಿಸಿದ್ದಾರೆ. ಮರಣೋತ್ತರ ಪರೀಕ್ಷೆ ಹಾಗೂ ಪೊಲೀಸ್ ತನಿಖೆಯ ಬಳಿಕವೇ ಅವರ ಸಾವಿನ ಸನ್ನಿವೇಶಗಳ ಕುರಿತು ಸ್ಪಷ್ಟ ಮಾಹಿತಿ ಲಭ್ಯವಾಗಲಿದೆ ಎಂದು ಅವರು ತಿಳಿಸಿದ್ದಾರೆ.
75 ವರ್ಷದ ನಾನಾ ಪಾಟೇಕರ್ ಭಾರತೀಯ ಚಿತ್ರರಂಗದ ಅತ್ಯಂತ ಪ್ರಶಂಸಿತ ನಟರಲ್ಲಿ ಒಬ್ಬರಾಗಿದ್ದರು. ನಾಲ್ಕು ದಶಕಗಳಿಗಿಂತಲೂ ಹೆಚ್ಚು ಕಾಲದ ತಮ್ಮ ಸಿನಿ ಪಯಣದಲ್ಲಿ ಅವರು ಹಿಂದಿ ಹಾಗೂ ಮರಾಠಿ ಚಿತ್ರರಂಗಗಳಲ್ಲಿ ವಿಶಿಷ್ಟ ಛಾಪು ಮೂಡಿಸಿದ್ದರು. ಪರಿಂದಾ, ಕ್ರಾಂತಿವೀರ್, ಅಗ್ನಿ ಸಾಕ್ಷಿ, ಅಬ್ ತಕ್ ಛಪ್ಪನ್, ವೆಲ್ಕಮ್ ಹಾಗೂ ನಟಸಮ್ರಾಟ್ ಸೇರಿದಂತೆ ಹಲವು ಚಿತ್ರಗಳಲ್ಲಿನ ಅವರ ಅಭಿನಯ ಅಪಾರ ಮೆಚ್ಚುಗೆ ಪಡೆದಿತ್ತು.
ನಿಮ್ಮ ಕಾಮೆಂಟ್ ಬರೆಯಿರಿ