ನವದೆಹಲಿ : ದೆಹಲಿಯ ಕೆಂಪುಕೋಟೆಯ ಹೊರಗೆ ನಡೆದ ಭೀಕರ ಸ್ಫೋಟಕ್ಕೆ ಸಂಬಂಧಿಸಿದಂತೆ ಮಹತ್ವದ ಬೆಳವಣಿಗೆಯಾಗಿದ್ದು, ಕೃತ್ಯ ಎಸಗಿದ ವ್ಯಕ್ತಿ ಕಾಶ್ಮೀರದ ವೈದ್ಯ ಡಾ. ಉಮರ್ ಉನ್ ನಬಿ ಎಂದು ಡಿಎನ್ಎ (DNA) ಪರೀಕ್ಷೆಗಳು ದೃಢಪಡಿಸಿವೆ ಎಂದು ಮೂಲಗಳು ತಿಳಿಸಿವೆ. ಸ್ಫೋಟದ ತೀವ್ರತೆಗೆ ಆತನ ದೇಹವು ಛಿದ್ರವಾಗಿದ್ದ ಕಾರಣ, ಹೀಗಾಗಿ ಇದುವರೆಗೂ ಆತನ ಗುರುತು ದೃಢಪಟ್ಟಿರಲಿಲ್ಲ.
ನವೆಂಬರ್ 10 ರಂದು, ಐತಿಹಾಸಿಕ ಕೆಂಪುಕೋಟೆಯ ಹೊರಗಿನ ಜನನಿಬಿಡ ರಸ್ತೆಯಲ್ಲಿ ಈ ಸ್ಫೋಟ ಸಂಭವಿಸಿತ್ತು. ಘಟನೆಯಲ್ಲಿ ಕನಿಷ್ಠ 12 ಜನರು ಮೃತಪಟ್ಟು, ಡಜನ್ಗಟ್ಟಲೆ ಜನರು ಗಾಯಗೊಂಡಿದ್ದಾರೆ.
ಪತ್ತೆ ಹಚ್ಚಿದ ಬಗೆ:
ಸ್ಫೋಟಕ್ಕೆ ಬಳಸಲಾದ ಬಿಳಿ ಬಣ್ಣದ ಹ್ಯುಂಡೈ ಐ20 (Hyundai i20) ಕಾರನ್ನು ಸ್ಫೋಟ ಸಂಭವಿಸುವ ಕೇವಲ 11 ದಿನಗಳ ಮೊದಲು ಡಾ. ಉಮರ್ ಖರೀದಿಸಿದ್ದ. ಹೀಗಾಗಿ ತನಿಖಾಧಿಕಾರಿಗಳಿಗೆ ಮೊದಲಿನಿಂದಲೂ ಆತನ ಮೇಲೆ ಅನುಮಾನವಿತ್ತು.
ಕಾಶ್ಮೀರದ ಪುಲ್ವಾಮಾದಲ್ಲಿರುವ ಆತನ ಕುಟುಂಬ ಸದಸ್ಯರಿಂದ ಪಡೆದ ಡಿಎನ್ಎ (DNA) ಮಾದರಿಗಳನ್ನು, ಕಾರಿನಿಂದ ವಶಪಡಿಸಿಕೊಳ್ಳಲಾದ ಮಾನವ ಅವಶೇಷಗಳೊಂದಿಗೆ ತಾಳೆ ನೋಡಿದಾಗ ಹೊಂದಿಕೆಯಾಗಿರುವುದು (Match) ದೃಢಪಟ್ಟಿದೆ.
ಇದರಿಂದ ಸ್ಫೋಟ ಸಂಭವಿಸುವಾಗ ಡಾ. ಉಮರ್ ಆ ಹ್ಯುಂಡೈ ಐ20 ಕಾರನ್ನೇ ಚಾಲನೆ ಮಾಡುತ್ತಿದ್ದ ಎಂಬುದು ಖಚಿತವಾಗಿದೆ ಎಂದು ಮೂಲಗಳು ತಿಳಿಸಿವೆ.
ಡಾಕ್ಟರ್ಗಳು, ನಕಲಿ ಐಡಿ ಮತ್ತು ಉಗ್ರಗಾಮಿ ಸಂಪರ್ಕ:
ಅಧಿಕಾರಿಗಳು ಈಗ ಉಮರ್ನನ್ನು, ಫರಿದಾಬಾದ್, ಲಕ್ನೋ ಮತ್ತು ದಕ್ಷಿಣ ಕಾಶ್ಮೀರದ ನಡುವೆ ಕಾರ್ಯನಿರ್ವಹಿಸುತ್ತಿದ್ದ ಜೈಶ್-ಎ-ಮೊಹಮ್ಮದ್ (JeM) ಉಗ್ರ ಸಂಘಟನೆಯ ಜಾಲದೊಂದಿಗೆ ಸಂಪರ್ಕ ಕಲ್ಪಿಸಿದ್ದಾರೆ. ಈ ಗುಂಪಿನಲ್ಲಿ ಒಂಬತ್ತರಿಂದ ಹತ್ತು ಸದಸ್ಯರು ಇದ್ದು, ಅವರಲ್ಲಿ ಐದರಿಂದ ಆರು ವೈದ್ಯರು ಸೇರಿದ್ದಾರೆ ಎನ್ನಲಾಗಿದೆ. ಸ್ಫೋಟಕಗಳಿಗೆ ಅಗತ್ಯವಾದ ರಾಸಾಯನಿಕ ಮತ್ತು ಸಾಮಗ್ರಿಗಳನ್ನು ಪಡೆಯಲು ಇವರು ತಮ್ಮ ವೈದ್ಯಕೀಯ ವೃತ್ತಿಯ ರುಜುವಾತುಗಳನ್ನು ಬಳಸುತ್ತಿದ್ದರು ಎಂದು ತನಿಖೆಯಿಂದ ತಿಳಿದುಬಂದಿದೆ.
ಫರಿದಾಬಾದ್ ಗೋದಾಮಿನಲ್ಲಿ ಸುಮಾರು 2,900 ಕೆಜಿ ಅಮೋನಿಯಂ ನೈಟ್ರೇಟ್ ಪತ್ತೆಯಾದ ಒಂದು ದಿನದ ನಂತರ, ಅಂದರೆ ನವೆಂಬರ್ 9 ರಿಂದ ಡಾ. ಉಮರ್ ಕಾಣೆಯಾಗಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.
ಪ್ರಕರಣಕ್ಕೆ ಸಂಬಂಧಿಸಿದಂತೆ, ಜೈಶ್-ಎ-ಮೊಹಮ್ಮದ್ನ ಮೊದಲ ಮಹಿಳಾ ವಿಭಾಗವಾದ ಜಮಾತ್-ಉಲ್-ಮೋಮಿನಾತ್ನ ಭಾರತ ಮುಖ್ಯಸ್ಥೆಯಾಗುವ ಸಾಧ್ಯತೆಯಿದ್ದ ಮಾಜಿ ಉಪನ್ಯಾಸಕಿ ಡಾ. ಶಾಹೀನ್ ಶಾಹಿದ್ ಳನ್ನು ಫರಿದಾಬಾದ್ನಲ್ಲಿ ಬಂಧಿಸಲಾಗಿದೆ.
ಡಾ. ಮುಜಮ್ಮಿಲ್ ಅಹ್ಮದ್ ಗಣಾಯಿ ಮತ್ತು ಡಾ. ನಜಾಮುಲ್ ಅಹ್ಮದ್ ಮಲಿಕ್ ಎಂಬ ಇಬ್ಬರು ವೈದ್ಯರನ್ನು ಸಹ ಜಾಲದಲ್ಲಿ ಅವರ ಪಾತ್ರದ ಕುರಿತು ವಿಚಾರಣೆಗಾಗಿ ವಶಕ್ಕೆ ತೆಗೆದುಕೊಳ್ಳಲಾಗಿದೆ.
ವೈದ್ಯಕೀಯ ವಿದ್ಯಾರ್ಥಿಗಳನ್ನು ಉಗ್ರಗಾಮಿತನಕ್ಕೆ ಪ್ರೇರೇಪಿಸಿದ್ದಾನೆ ಎನ್ನಲಾದ ಮೌಲ್ವಿ ಇರ್ಫಾನ್ ಬಂಧನದ ನಂತರ, ದಕ್ಷಿಣ ಕಾಶ್ಮೀರದಲ್ಲಿ ಜಮಾತ್-ಎ-ಇಸ್ಲಾಮಿ ಕಾರ್ಯಕರ್ತರ ಮನೆಗಳು ಸೇರಿದಂತೆ ಹಲವೆಡೆ ದಾಳಿ ನಡೆಸಲಾಗಿದೆ.
ಶಾಂತ ಸ್ವಭಾವದ ವ್ಯಕ್ತಿ ಉಗ್ರನಾದ ಕಥೆ:
ಪುಲ್ವಾಮಾದ ಕೊಯಿಲ್ ಗ್ರಾಮದಲ್ಲಿರುವ ಸಂಬಂಧಿಕರ ಪ್ರಕಾರ, ಡಾ. ಉಮರ್ ಶಾಂತ ಸ್ವಭಾವದ, ಅಂತರ್ಮುಖಿ ಮತ್ತು ಓದುವುದರಲ್ಲಿ ಹೆಚ್ಚು ಸಮಯ ಕಳೆಯುತ್ತಿದ್ದ ವ್ಯಕ್ತಿಯಾಗಿದ್ದ.
ಆದರೆ, ಇತ್ತೀಚಿನ ತಿಂಗಳುಗಳಲ್ಲಿ ಆತನ ವರ್ತನೆಯಲ್ಲಿ ಬದಲಾವಣೆಯಾಗಿತ್ತು ಎಂದು ಪೊಲೀಸ್ ಮೂಲಗಳು ತಿಳಿಸಿವೆ. ಆತ ಫರಿದಾಬಾದ್ ಮತ್ತು ದೆಹಲಿ ನಡುವೆ ಆಗಾಗ್ಗೆ ಪ್ರಯಾಣಿಸುತ್ತಿದ್ದ. ರಾಮಲೀಲಾ ಮೈದಾನ್ ಮತ್ತು ಸುನೇಹ್ರಿ ಮಸೀದಿ ಬಳಿಯ ಮಸೀದಿಗಳಿಗೆ ಭೇಟಿ ನೀಡುತ್ತಿದ್ದ.
ಸ್ಫೋಟದ ದಿನದ ಸಿಸಿಟಿವಿ ದೃಶ್ಯಾವಳಿಗಳಲ್ಲಿ, ಆತ ಮಧ್ಯಾಹ್ನ 3 ಗಂಟೆಯ ಸುಮಾರಿಗೆ ಮಸೀದಿ ಬಳಿ ಕಾರನ್ನು ನಿಲ್ಲಿಸಿ ನಂತರ ಕೆಂಪುಕೋಟೆಯತ್ತ ಚಲಿಸಿದ್ದು ಕಂಡುಬಂದಿದೆ.
ಆತ ಸುಮಾರು ಮೂರು ಗಂಟೆಗಳ ಕಾಲ ಅಲ್ಲಿಯೇ ಇದ್ದ ಎಂದು ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಉಮರ್ ಹೆಸರಿನಲ್ಲಿ ನೋಂದಾಯಿಸಲಾದ ಕೆಂಪು ಬಣ್ಣದ ಫೋರ್ಡ್ ಇಕೋಸ್ಪೋರ್ಟ್ (Ford EcoSport) ಕಾರನ್ನು ಫರಿದಾಬಾದ್ನಲ್ಲಿ ವಶಪಡಿಸಿಕೊಳ್ಳಲಾಗಿದ್ದು, ಅದರ ದಾಖಲೆಗಳಲ್ಲಿ ನಮೂದಿಸಲಾದ ದೆಹಲಿಯ ವಿಳಾಸವು ನಕಲಿ ಎಂದು ತಿಳಿದುಬಂದಿದೆ.
ಮುಂಬೈ ಮಾದರಿ ದಾಳಿಗೆ ಉದ್ದೇಶಿಸಲಾಗಿತ್ತು…
ತನಿಖೆಯ ವೇಳೆ, ಪ್ರಮುಖ ಆರೋಪಿಗಳಾದ ಡಾ. ಉಮರ್ ನಬಿ ಮತ್ತು ಡಾ. ಮುಜಮ್ಮಿಲ್ ಗಣಾಯಿ ಟರ್ಕಿಗೆ (Turkey) ಪ್ರಯಾಣಿಸಿರುವುದು ದೃಢಪಟ್ಟಿದೆ. ಅಲ್ಲಿ ಉಗ್ರರ ಸೂತ್ರಧಾರರು ಕಾರ್ಯನಿರ್ವಹಿಸುತ್ತಿದ್ದಾರೆ ಎಂದು ಶಂಕಿಸಲಾಗಿದೆ.
ಒಂದು ನಿರ್ದಿಷ್ಟ ಟೆಲಿಗ್ರಾಂ ಗುಂಪುಗಳನ್ನು ಸೇರಿದ ಸ್ವಲ್ಪ ಸಮಯದ ನಂತರ ನಬಿ ಮತ್ತು ಗಣಾಯಿ ಟರ್ಕಿಗೆ ಪ್ರಯಾಣಿಸಿದ್ದರು ಎಂದು ಅವರ ಪಾಸ್ಪೋರ್ಟ್ಗಳು ತೋರಿಸುತ್ತವೆ.
ಸೂತ್ರಧಾರನು ‘ಡಾಕ್ಟರ್ ಮಾಡ್ಯೂಲ್’ ಅನ್ನು ದೇಶಾದ್ಯಂತ ಚದುರಿಹೋಗಲು ಸೂಚಿಸಿದ್ದ. ಟರ್ಕಿ ಭೇಟಿಯ ನಂತರ ಟಾರ್ಗೆಟ್ ಸ್ಥಳಗಳನ್ನು ಆಯ್ಕೆ ಮಾಡಲಾಗಿತ್ತು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ದೀಪಾವಳಿ ಹಬ್ಬದ ಸಂದರ್ಭದಲ್ಲಿ ಜನದಟ್ಟಣೆಯ ಪ್ರದೇಶಗಳನ್ನು ಗುರಿಯಾಗಿಸಲು ಆರೋಪಿಗಳು ಯೋಜಿಸಿದ್ದರು ಆದರೆ ಅದನ್ನು ಕಾರ್ಯಗತಗೊಳಿಸಲು ವಿಫಲರಾಗಿದ್ದರು.
ಪಾಕಿಸ್ತಾನದಲ್ಲಿ JeM ಹ್ಯಾಂಡ್ಲರ್ ಉಮರ್ ಬಿನ್ ಖತ್ತಾಬ್ ನಡೆಸುತ್ತಿದ್ದ ಟೆಲಿಗ್ರಾಂ ಗುಂಪುಗಳ ಮೂಲಕ ವೈದ್ಯರು ಉಗ್ರಗಾಮಿತ್ವಕ್ಕೆ ಆಕರ್ಷಿತರಾಗಿದ್ದರು ಎಂದು ತಿಳಿದುಬಂದಿದೆ. 2008 ರ ಮುಂಬೈ ದಾಳಿಯ ಮಾದರಿಯಲ್ಲೇ ಈ ಗುಂಪು ದಾಳಿ ನಡೆಸಲು ಉದ್ದೇಶಿಸಿತ್ತು ಎಂದು ಅಧಿಕಾರಿಗಳು ನಂಬಿದ್ದಾರೆ.
ಮುಂದಿನ ಕ್ರಮ:
ದೆಹಲಿ ಪೊಲೀಸ್ ವಿಶೇಷ ಘಟಕದಿಂದ ಹಿಡಿದು ಜಮ್ಮು ಮತ್ತು ಕಾಶ್ಮೀರ ಪೊಲೀಸರು ಹಾಗೂ ಉತ್ತರ ಪ್ರದೇಶ ATS ವರೆಗಿನ ಬಹು ಏಜೆನ್ಸಿಗಳು ಈಗಲೂ ಹೆಚ್ಚಿನ ಕಟ್ಟೆಚ್ಚರದಲ್ಲಿವೆ. ಫರಿದಾಬಾದ್ ಮಾಡ್ಯೂಲ್ನೊಂದಿಗೆ ಸಂಪರ್ಕ ಹೊಂದಿರುವ ಇತರ ವ್ಯಕ್ತಿಗಳಿಗಾಗಿ ಶೋಧ ಕಾರ್ಯ ಮುಂದುವರೆದಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ