ಭಾರತ ತಂಡವು ಸತತ ಮೂರು ಗೆಲುವಿನೊಂದಿಗೆ ಟಿ20 ವಿಶ್ವಕಪ್ 2024 ಪಂದ್ಯಾವಳಿಯಲ್ಲಿ ಸೂಪರ್-8ರ ಹಂತಕ್ಕೆ ಪ್ರವೇಶಿಸಿದೆ. ರೋಹಿತ್ ಶರ್ಮಾ ನಾಯಕತ್ವದ ಭಾರತದ ತಂಡವು ಅಮೆರಿಕ ವಿರುದ್ಧ ಬುಧವಾರ ನಡೆದ ಪಂದ್ಯದಲ್ಲಿ 7 ವಿಕೆಟ್ಗಳ ಜಯ ದಾಖಲಿಸಿದ ನಂತರ ಸೂಪರ್-8 ಹಂತಕ್ಕೆ ಪ್ರವೇಶಿಸಿದೆ. ಆದರೆ ಈ ಪಂದ್ಯದಲ್ಲಿ ಅಮೆರಿಕ ಮಾಡಿದ ತಪ್ಪಿನಿಂದಾಗಿ ಪೆನಾಲ್ಟಿ ರೂಪದಲ್ಲಿ ಭಾರತದ ತಂಡಕ್ಕೆ ಉಚಿತವಾಗಿ 5 ರನ್ಗಳು ಸೇರ್ಪಡೆಯಾದವು. ಅದು ಹೇಗೆ ಎಂಬ ಬಗ್ಗೆ ಆರಂಭದಲ್ಲಿ ಕೆಲಕಾಲ ಗೊಂದಲವಾದರೂ ಈ ಅನಿರೀಕ್ಷಿತ 5 ರನ್ಗಳು ಭಾರತವು ನಿಗದಿತ 111 ರನ್ ಗುರಿಯನ್ನು ತಲುಪಲು ಅನುಕೂಲವಾಐಇತು. ಭಾರತದ ತಂಡವು 7 ವಿಕೆಟ್ಗಳ ನಷ್ಟಕ್ಕೆ ತಲುಪಿ ಗೆಲುವಿನ ನಗೆ ಬೀರಿತು.
ಪಂದ್ಯದ 15 ಓವರ್ಗಳ ಅಂತ್ಯಕ್ಕೆ ಭಾರತಕ್ಕೆ 30 ಎಸೆತಗಳಲ್ಲಿ 35 ರನ್ಗಳ ಅಗತ್ಯವಿತ್ತು. ಅಮೆರಿಕ ತಂಡವು 16ನೇ ಓವರ್ ಆರಂಭಿಸುವ ಮೊದಲು ನಿರ್ಣಾಯಕ ಘಟ್ಟದಲ್ಲಿ, ಅಂಪೈರ್ ಭಾರತದ ತಂಡಕ್ಕೆ 5 ಪೆನಾಲ್ಟಿ ರನ್ಗಳನ್ನು ನೀಡಿದರು.
ಯಾಕೆಂದರೆ ಓವರ್ ಆರಂಭಿಸಲು ಅಮೆರಿಕ ತಂಡವು ತಡ ಮಾಡಿತ್ತು. ಒಂದು ಓವರ್ ಮುಗಿದ ನಂತರ ಮತ್ತೊಂದು ಓವರ್ ಎಸೆಯುವುದನ್ನು 60 ಸೆಕೆಂಡುಗಳ ಒಳಗೆ ಆರಂಭಿಸಬೇಕಿತ್ತು. ಆದರೆ ವಿಳಂಬ ಮಾಡಿದ್ದರಿಂದ ಅಮೆರಿಕ ತಂಡ 5 ರನ್ಗಳ ದಂಡಕ್ಕೆ ಗುರಿಯಾಯಿತು. ಈ ಪಂದ್ಯದಲ್ಲಿ ಸಮಯಮಿತಿ ಮೀರು ಎರಡು ಸಲ ತಡ ಮಾಡಿದ್ದ ಅಮೆರಿಕ ತಂಡವು 16ನೇ ಓವರ್ ಎಸೆಯುವ ವೇಳೆ ಮೂರನೇ ಬಾರಿಗೆ ತಡಮಾಡಿದ್ದರಿಂದ ನಿಯಮದ ಪ್ರಕಾರ ದಂಡ ವಿಧಿಸಲಾಯಿತು. ಕಳೆದ ವರ್ಷ ಐಸಿಸಿ ಜಾರಿಗೆ ತಂದ ಹೊಸ ನಿಯಮದಂತೆ ಐದು ಪೆನಾಲ್ಟಿ ರನ್ ಗಳನ್ನು ಬ್ಯಾಟ್ ಮಾಡುತ್ತಿದ್ದ ತಂಡಕ್ಕೆ ನೀಡಲಾಯಿತು. ಈ ನಿಯಮವನ್ನು ಸ್ಟಾಪ್ ಕ್ಲಾಕ್ ರೂಲ್ (stop-clock rule) ಎಂದು ಕರೆಯಲಾಗುತ್ತದೆ.
ಟಿ 20 ವಿಶ್ವಕಪ್ 2024ರಲ್ಲಿ ಬುಧವಾರ ಭಾರತ-ಅಮೆರಿಕದ ನಡುವೆ ನಡೆದ ಪಂದ್ಯವು ಐಸಿಸಿ (ICC) ಸ್ಟಾಪ್ ಕ್ಲಾಕ್ ರೂಲ್ ನಿಯಮದಂತೆ ಪೆನಾಲ್ಟಿ ವಿಧಿಸಿದ ಮೊದಲ ಪಂದ್ಯವಾಗಿದೆ.
ಸ್ಟಾಪ್ ಕ್ಲಾಕ್ ರೂಲ್ ಎಂದರೇನು? ಇದು ಹೇಗೆ ಕೆಲಸ ಮಾಡುತ್ತದೆ..?
ನಿಯಮದ ಹೆಸರೇ ಸೂಚಿಸುವಂತೆ, ಸಮಯದ ಮಿತಿಯೊಳಗೆ ಪಂದ್ಯವನ್ನು ಪೂರ್ಣಗೊಳಿಸಲು ಅನುಕೂಲವಾಗಲು ಈ ನಿಯಮ ಜಾರಿಗೆ ತರಲಾಗಿದೆ.
ಪುರುಷರ ಏಕದಿನದ ಪಂದ್ಯಗಳು (ODI) ಮತ್ತು T20 ಪಂದ್ಯಗಳಲ್ಲಿ ಫೀಲ್ಡಿಂಗ್ ತಂಡವು ಸಮಯ ವ್ಯರ್ಥ ಮಾಡುವುದನ್ನು ತಡೆಯಲು ಷರತ್ತು 41.9 ರ ಅಡಿಯಲ್ಲಿ ಈ ನಿಯಮವನ್ನು ಸೇರಿಸಲಾಗಿದೆ. ಕಳೆದ ವರ್ಷ ಡಿಸೆಂಬರ್ನಿಂದ ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ ಸ್ಟಾಪ್-ಕ್ಲಾಕ್ ನಿಯಮ ಜಾರಿಗೆ ತರಲಾಗಿದೆ. ಬಳಿಕ ಏಪ್ರಿಲ್ 2024ರಲ್ಲಿ ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್ನಲ್ಲಿ ಇದು ಜಾರಿಗೆ ಬಂದಿದೆ. ಓವರ್ ಮುಗಿದ ನಂತರ ತಂಡಗಳು ಮುಂದಿನ ಓವರ್ ಪ್ರಾರಂಭಿಸುವಾಗ 60 ಸೆಕೆಂಡ್ಗಳ ಕಾಲಾವಕಾಶ ಮಾತ್ರ ನೀಡಲಾಗುತ್ತದೆ. ಫೀಲ್ಡಿಂಗ್ ತಂಡವು ಹಿಂದಿನ ಓವರ್ ಮುಗಿದ 60 ಸೆಕೆಂಡ್ಗಳ ಒಳಗೆ ಮುಂದಿನ ಓವರ್ ಪ್ರಾರಂಭಿಸಬೇಕು.
60 ಸೆಕೆಂಡುಗಳ ಸಮಯವನ್ನು ಗ್ರೌಂಡ್ ಮೇಲಿರುವ ಎಲೆಕ್ಟ್ರಾನಿಕ್ ಗಡಿಯಾರದಲ್ಲಿ ಪ್ರದರ್ಶಿಸಲಾಗುತ್ತದೆ. ಈ ಅವಧಿಯನ್ನು ಮೀರಿ ಸಮಯ ವ್ಯಯಿಸಿದರೆ, ಎರಡು ಬಾರಿ ವಾರ್ನಿಂಗ್ ಮಾಡಲಾಗುತ್ತದೆ. ಬಳಿಕವೂ ಸಮಯ ವ್ಯಯಿಸಿದರೆ ಫೀಲ್ಡಿಂಗ್ ತಂಡವು ಪೆನಾಲ್ಟಿಗೆ ಗುರಿಯಾಗಬೇಕಾಗುತ್ತದೆ. ಮುಂದಿನ ಪ್ರತಿಯೊಂದು ಉಲ್ಲಂಘನೆಗೂ ಕೂಡ 5 ರನ್ ಪೆನಾಲ್ಟಿ ವಿಧಿಸುತ್ತ ಹೋಗಲಾಗುತ್ತದೆ. ಹೀಗೆ ಈ ಸ್ಟಾಪ್-ಕ್ಲಾಕ್ ನಿಯಮದಡಿ ಅಮೆರಿಕವು 5 ರನ್ ದಂಡಕ್ಕೆ ಗುರಿಯಾದ ಮೊದಲ ತಂಡವಾಗಿದೆ. T20 ವಿಶ್ವಕಪ್ನಿಂದ ಎಲ್ಲಾ ವೈಟ್-ಬಾಲ್ ಪಂದ್ಯಗಳಿಗೆ ಇದನ್ನು ಕಡ್ಡಾಯಗೊಳಿಸಲಾಯಿತು.
ಅಮೆರಿಕ ವಿರುದ್ಧದ ಪಂದ್ಯದಲ್ಲಿ ಭಾರತ ತಂಡವು ಮೂರು ವಿಕೆಟ್ ನಷ್ಟಕ್ಕೆ 111 ರನ್ ಗಳ ನಿಗದಿತ ಗುರಿ ತಲುಪಿದೆ. ಸೂರ್ಯಕುಮಾರ ಯಾದವ್ ಅರ್ಧಶತಕ ಗಳಿಸಿದರು. ಮತ್ತೊಂದೆಡೆ, ಅರ್ಷದೀಪ್ ಸಿಂಗ್ ಪಂದ್ಯದಲ್ಲಿ 9 ರನ್ಗಳಿಗೆ 4 ವಿಕೆಟ್ಗಳನ್ನು ಪಡೆದು ಪಂದ್ಯ ಪುರುಷ ಪ್ರಶಸ್ತಿ ಪಡೆದುಕೊಂಡರು.
ನಿಮ್ಮ ಕಾಮೆಂಟ್ ಬರೆಯಿರಿ