ವಾಷಿಂಗ್ಟನ್ : ಇರಾನ್ ರಾಜಧಾನಿ ತೆಹ್ರಾನ್ ಮೇಲೆ ಅಮೆರಿಕ “ಬೃಹತ್ ದಾಳಿ” ನಡೆಸಿದ್ದು, ಇದರಲ್ಲಿ ಇರಾನ್ನ ಹಲವಾರು ಉನ್ನತ ಸೇನಾ ಅಧಿಕಾರಿಗಳು ಹತರಾಗಿದ್ದಾರೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ತಿಳಿಸಿದ್ದಾರೆ. ಶನಿವಾರ (ಅಮೆರಿಕ ಕಾಲಮಾನ) ತಮ್ಮ ‘ಟ್ರುತ್ ಸೋಷಿಯಲ್’ (Truth Social) ಜಾಲತಾಣದಲ್ಲಿ ಅವರು ಈ ಮಾಹಿತಿಯನ್ನು ಹಂಚಿಕೊಂಡಿದ್ದಾರೆ.
ದಾಳಿಯ ನಂತರದ ದೃಶ್ಯಾವಳಿ ಎನ್ನಲಾದ ವಿಡಿಯೋವನ್ನೂ ಹಂಚಿಕೊಂಡಿರುವ ಟ್ರಂಪ್, “ಇರಾನ್ ಅನ್ನು ಕೆಟ್ಟದಾಗಿ ಮತ್ತು ಅವಿವೇಕದಿಂದ ಮುನ್ನಡೆಸುತ್ತಿದ್ದ ಹಲವು ಮಿಲಿಟರಿ ನಾಯಕರನ್ನು ಈ ಬೃಹತ್ ದಾಳಿಯ ಮೂಲಕ ಹತೋಟಿಗೆ ತರಲಾಗಿದೆ,” ಎಂದು ಪೋಸ್ಟ್ ಮಾಡಿದ್ದಾರೆ. ವಿಡಿಯೋದಲ್ಲಿ ವಿಮಾನಗಳ ಹಾರಾಟದ ಸದ್ದು ಮತ್ತು ದೊಡ್ಡ ಮಟ್ಟದ ಸ್ಫೋಟಗಳ ಶಬ್ದ ಕೇಳಿಬರುತ್ತಿದ್ದರೂ, ದೃಶ್ಯಗಳು ಅಸ್ಪಷ್ಟವಾಗಿವೆ.
ಎಚ್ಚರಿಕೆ ನೀಡಿದ್ದ ಟ್ರಂಪ್
ಗಮನಾರ್ಹ ವಿಷಯವೆಂದರೆ, ಈ ದಾಳಿಯು ಟ್ರಂಪ್ ನೀಡಿದ್ದ ಅಂತಿಮ ಗಡುವು ಮುಗಿಯುವ ಕೆಲವೇ ಗಂಟೆಗಳ ಮೊದಲು ನಡೆದಿದೆ. ಏಪ್ರಿಲ್ 6ರೊಳಗೆ ಇರಾನ್ ಒಂದು ಒಪ್ಪಂದಕ್ಕೆ ಬರಬೇಕು ಅಥವಾ ‘ಹಾರ್ಮುಜ್ ಜಲಸಂಧಿ’ಯನ್ನು (Strait of Hormuz) ಹಡಗುಗಳ ಸಂಚಾರಕ್ಕೆ ಮುಕ್ತಗೊಳಿಸಬೇಕು, ಇಲ್ಲದಿದ್ದರೆ ಭೀಕರ ಪರಿಣಾಮ ಎದುರಿಸಬೇಕಾಗುತ್ತದೆ ಎಂದು ಟ್ರಂಪ್ ಈ ಹಿಂದೆ ಎಚ್ಚರಿಸಿದ್ದರು.
“ಇರಾನ್ಗೆ ನಾನು ನೀಡಿದ್ದ 10 ದಿನಗಳ ಗಡುವು ನೆನಪಿರಲಿ. ಈಗ ಕೇವಲ 48 ಗಂಟೆಗಳಷ್ಟೇ ಬಾಕಿ ಇದೆ, ಇಲ್ಲದಿದ್ದರೆ ಅವರ ಮೇಲೆ ನರಕವೇ ಕುಸಿದು ಬೀಳಲಿದೆ,” ಎಂದು ಟ್ರಂಪ್ ಗುಡುಗಿದ್ದರು.
ಗಡುವನ್ನು ತಿರಸ್ಕರಿಸಿದ್ದ ಇರಾನ್
ಅಮೆರಿಕ ಅಧ್ಯಕ್ಷರ ಈ ಬೆದರಿಕೆಯನ್ನು ಇರಾನ್ ಸೇನಾ ನಾಯಕತ್ವವು ಬಲವಾಗಿ ತಳ್ಳಿಹಾಕಿತ್ತು. ಇರಾನ್ನ ‘ಖಾತಮ್ ಅಲ್-ಅನ್ಬಿಯಾ’ ಕೇಂದ್ರ ಪ್ರಧಾನ ಕಚೇರಿಯ ಹಿರಿಯ ಅಧಿಕಾರಿ ಜನರಲ್ ಅಲಿ ಅಬ್ದೊಲ್ಲಾಹಿ ಅಲಿಯಾಬಾದಿ ಪ್ರತಿಕ್ರಿಯಿಸಿ, “ಟ್ರಂಪ್ ಅವರ ಹೇಳಿಕೆಗಳು ಅಸ್ಥಿರತೆ ಮತ್ತು ಅಮೆರಿಕದ ದೌರ್ಬಲ್ಯದ ಸಂಕೇತ,” ಎಂದು ಟೀಕಿಸಿದ್ದರು.
ಕಳೆದ ಮಾರ್ಚ್ 26 ರಂದು ಇರಾನ್ ಸರ್ಕಾರದ ಮನವಿಯ ಮೇರೆಗೆ ಇಂಧನ ಕೇಂದ್ರಗಳ ಮೇಲಿನ ದಾಳಿಯನ್ನು ಟ್ರಂಪ್ 10 ದಿನಗಳ ಕಾಲ ಮುಂದೂಡಿದ್ದರು. ಮಾತುಕತೆಗಳು ಸುಗಮವಾಗಿ ನಡೆಯುತ್ತಿವೆ ಎಂದು ಈ ಹಿಂದೆ ಹೇಳಲಾಗಿತ್ತಾದರೂ, ಗಡುವು ಮುಗಿಯುವ ಮುನ್ನವೇ ಈ ಕ್ಷಿಪ್ರ ದಾಳಿ ನಡೆದಿದೆ. ಈ ಘಟನೆಯಿಂದಾಗಿ ಮಧ್ಯಪ್ರಾಚ್ಯದಲ್ಲಿ ಮತ್ತೊಮ್ಮೆ ಯುದ್ಧದ ಭೀತಿ ಮತ್ತು ಉದ್ವಿಗ್ನತೆ ತಾರಕಕ್ಕೇರಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ