ಪೂಂಕುನ್ನಂ (ಕೇರಳ): ಮನೆಯೊಂದರ ಆವರಣದಲ್ಲಿ ಒಂದಲ್ಲ, ಎರಡಲ್ಲ, ಬರೋಬ್ಬರಿ 18 ಹೆಬ್ಬಾವುಗಳು ಪತ್ತೆಯಾಗಿರುವ ಆಘಾತಕಾರಿ ಮತ್ತು ಅಪರೂಪದ ಘಟನೆಯೊಂದು ಕೇರಳದ ತ್ರಿಶೂರ್ ಜಿಲ್ಲೆಯ ಪೂಂಕುನ್ನಂನಲ್ಲಿ ವರದಿಯಾಗಿದೆ. ಕೇವಲ 24 ಗಂಟೆಗಳ ಅವಧಿಯಲ್ಲಿ ಅರಣ್ಯ ಇಲಾಖೆ ಅಧಿಕಾರಿಗಳು ಈ ಎಲ್ಲಾ ಹಾವುಗಳನ್ನು ಸುರಕ್ಷಿತವಾಗಿ ರಕ್ಷಿಸಿದ್ದು, ಸ್ಥಳೀಯರಲ್ಲಿ ತೀವ್ರ ಆತಂಕ ಮತ್ತು ಕುತೂಹಲ ಮೂಡಿಸಿದೆ.
ಪೂಂಕುನ್ನಂನ ಸೀತಾರಾಮ್ ಲೇನ್ನ ಮನೆಯೊಂದರ ಆವರಣದಲ್ಲಿ ಕಳೆದ ಎರಡು ದಿನಗಳಲ್ಲಿ 18 ಹೆಬ್ಬಾವಿನ ಮರಿಗಳು (Python Hatchlings) ಪತ್ತೆಯಾಗಿವೆ. ಈ ಪ್ರದೇಶದಲ್ಲಿ ಇನ್ನೂ ಹೆಚ್ಚಿನ ಹಾವುಗಳು ಇರಬಹುದು ಎಂಬ ಅನುಮಾನ ಸಾರ್ವಜನಿಕರನ್ನು ಕಾಡತೊಡಗಿದೆ.
ಇಲ್ಲಿನ ನಿವಾಸಿ ಕಾರ್ತಿಕ ಎಂಬುವವರ ಮನೆಯ ಆವರಣದಲ್ಲಿ ಈ ಘಟನೆ ಬೆಳಕಿಗೆ ಬಂದಿದೆ. ಮೊದಲು ಕಾರ್ತಿಕ ಅವರ ಸಹೋದರ ಮನೆಯ ಪಕ್ಕದಲ್ಲೇ ಇರುವ ಕಾಲುವೆಯ ಬಳಿ ಎರಡು ಸಣ್ಣ ಹಾವಿನ ಮರಿಗಳನ್ನು ಗಮನಿಸಿದ್ದರು. ತದನಂತರ ಮನೆಯ ಸುತ್ತಮುತ್ತ ಇಡೀ ಆವರಣದಲ್ಲಿ ಮತ್ತಷ್ಟು ಮರಿಗಳು ಪತ್ತೆಯಾಯಿತು.
ತಕ್ಷಣವೇ ಅರಣ್ಯ ಇಲಾಖೆಗೆ ಮಾಹಿತಿ ನೀಡಲಾಯಿತು. ಕಾರ್ಯಪ್ರವೃತ್ತರಾದ ಅಧಿಕಾರಿಗಳ ತಂಡವು ತಡರಾತ್ರಿ ಮನೆಯ ಆವರಣದಲ್ಲಿ ಹುಡುಕಾಟ ಆರಂಭಿಸಿತು. ತಕ್ಷಣವೇ ಕಾರ್ಯಪ್ರವೃತ್ತರಾದ ನಿವಾಸಿಗಳು ಮೊದಲ ದಿನ ಸುಮಾರು ಎಂಟು ಮರಿಗಳನ್ನು ಹಿಡಿಯುವಲ್ಲಿ ಯಶಸ್ವಿಯಾದರು. ಆದರೆ ಇದೇ ವೇಳೆ ಎರಡು ಮರಿಗಳು ನೀರಿನಲ್ಲಿ ನುಸುಳಿ ತಪ್ಪಿಸಿಕೊಂಡಿವೆ ಎನ್ನಲಾಗಿದೆ.
ಗುರುವಾರ ಬೆಳಗ್ಗೆ ಮತ್ತೆ ಜಂಟಿ ಶೋಧ ಕಾರ್ಯ ನಡೆಸಿದಾಗ, ಮನೆಯ ಮುಂಭಾಗದಲ್ಲಿ ನಿಲ್ಲಿಸಲಾಗಿದ್ದ ಸ್ಕೂಟರ್ನ ಒಳಗೂ ಸೇರಿದಂತೆ ಆವರಣದ ವಿವಿಧೆಡೆ ಒಟ್ಟು 10 ಹೆಬ್ಬಾವಿನ ಮರಿಗಳು ಪತ್ತೆಯಾಗಿವೆ. ಸಿಕ್ಕಿಬಿದ್ದ ಪ್ರತಿಯೊಂದು ಮರಿಯೂ ಸುಮಾರು 50 ಸೆಂಟಿಮೀಟರ್ನಷ್ಟು ಉದ್ದವಿದೆ.
ಅರಣ್ಯ ಇಲಾಖೆಯ ಅಂದಾಜು:
ಅರಣ್ಯ ಇಲಾಖೆಯ ಪ್ರಾಥಮಿಕ ತನಿಖೆಯ ಪ್ರಕಾರ, ಸಮೀಪದ ಕಾಲುವೆಯಿಂದ ಹೆಬ್ಬಾವೊಂದು ಬಂದು ಮನೆಯ ಅಡಿಪಾಯದ (Foundation) ಸುತ್ತಮುತ್ತಲಿನ ಜಾಗದಲ್ಲಿ ಮೊಟ್ಟೆಯಿಟ್ಟಿರಬಹುದು. ಆ ಮೊಟ್ಟೆಗಳು ಇತ್ತೀಚೆಗಷ್ಟೇ ಒಡೆದು ಮರಿಗಳು ಹೊರಬಂದಿವೆ ಎಂದು ಅಧಿಕಾರಿಗಳು ಶಂಕಿಸಿದ್ದಾರೆ.
ಕಾಂಪೌಂಡ್ ಗೋಡೆ ಒಡೆಯಲು ಸಿದ್ಧತೆ:
ಮನೆಯ ಆವರಣದಲ್ಲಿ ಅಥವಾ ಗೋಡೆಯ ಸಂದಿಗಳಲ್ಲಿ ಇನ್ನೂ ಹೆಚ್ಚಿನ ಹಾವುಗಳು ಅಡಗಿರಬಹುದು ಎಂಬ ಭೀತಿ ಮನೆಮಂದಿಯನ್ನು ಕಾಡುತ್ತಿದೆ. ಈ ಹಿನ್ನೆಲೆಯಲ್ಲಿ, ಅರಣ್ಯ ಇಲಾಖೆಯ ಅಧಿಕಾರಿಗಳ ಸಹಯೋಗದೊಂದಿಗೆ ಮನೆಯ ಕಾಂಪೌಂಡ್ ಗೋಡೆಯ ಕೆಲವು ಭಾಗಗಳನ್ನು ಒಡೆದು ಕೂಲಂಕಷವಾಗಿ ತಪಾಸಣೆ ನಡೆಸಲು ಕುಟುಂಬಸ್ಥರು ಸಿದ್ಧತೆ ನಡೆಸುತ್ತಿದ್ದಾರೆ.
ಮನೆಯಲ್ಲಿ ಸಣ್ಣ ಮಕ್ಕಳು ಹಾಗೂ ಹಿರಿಯ ನಾಗರಿಕರು ವಾಸಿಸುತ್ತಿರುವುದರಿಂದ ಕುಟುಂಬಸ್ಥರು ಮತ್ತು ನೆರೆಹೊರೆಯವರಲ್ಲಿ ಆತಂಕ ಇನ್ನಷ್ಟು ಹೆಚ್ಚಾಗಿದೆ. ಸದ್ಯಕ್ಕೆ ರಕ್ಷಿಸಲಾದ ಎಲ್ಲಾ ಹೆಬ್ಬಾವಿನ ಮರಿಗಳನ್ನು ಸುರಕ್ಷಿತವಾಗಿ ಅರಣ್ಯ ಪ್ರದೇಶಕ್ಕೆ ಬಿಡಲಾಗುವುದು ಎಂದು ಅರಣ್ಯ ಇಲಾಖೆಯ ಅಧಿಕಾರಿಗಳು ತಿಳಿಸಿದ್ದಾರೆ.
ಸ್ಥಳೀಯ ಇತಿಹಾಸದಲ್ಲೇ ಒಂದೇ ದಿನ, ಒಂದೇ ಮನೆಯಿಂದ ಇಷ್ಟೊಂದು ದೊಡ್ಡ ಸಂಖ್ಯೆಯಲ್ಲಿ ಹಾವುಗಳನ್ನು ವಶಪಡಿಸಿಕೊಂಡಿರುವುದು ಇದೇ ಮೊದಲು ಎಂದು ಅರಣ್ಯ ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ.
ಈ ಘಟನೆಯು ಸ್ಥಳೀಯವಾಗಿ ಭಾರಿ ಚರ್ಚೆಗೆ ಗ್ರಾಸವಾಗಿದ್ದು, ವಸತಿ ಪ್ರದೇಶಗಳಲ್ಲಿ ಹಾವುಗಳು ಕಂಡುಬಂದಲ್ಲಿ ಸಾರ್ವಜನಿಕರು ಸ್ವತಃ ಹಿಡಿಯಲು ಸಾಹಸ ಪಡದೆ, ತಕ್ಷಣವೇ ತರಬೇತಿ ಪಡೆದ ರಕ್ಷಣಾ ತಂಡಗಳನ್ನು ಸಂಪರ್ಕಿಸಬೇಕು ಮತ್ತು ಜಾಗರೂಕರಾಗಿರಬೇಕು ಎಂದು ಅಧಿಕಾರಿಗಳು ಸಾರ್ವಜನಿಕರಲ್ಲಿ ಮನವಿ ಮಾಡಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ