ವಾಷಿಂಗ್ಟನ್ : ಅಮೆರಿಕವು ಇರಾನ್ ವಿರುದ್ಧ ಆರ್ಥಿಕ ಸಮರವನ್ನು ಮತ್ತಷ್ಟು ತೀವ್ರಗೊಳಿಸಿದ್ದು, ಇರಾನ್ಗೆ ಹಣಕಾಸು ನೆರವು ನೀಡುವ ಅಥವಾ ಆರ್ಥಿಕ ಸಂಬಂಧ ಮುಂದುವರಿಸುವ ದೇಶಗಳು ಹಾಗೂ ಸಂಸ್ಥೆಗಳ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವುದಾಗಿ ಎಚ್ಚರಿಕೆ ನೀಡಿದೆ.
ಇರಾನ್ಗೆ “ಆರ್ಥಿಕ ಡಿ-ಡೇ” ಘೋಷಿಸಿದ ಬೆನ್ನಲ್ಲೇ ಅಮೆರಿಕದ ಖಜಾನೆ ಕಾರ್ಯದರ್ಶಿ ಸ್ಕಾಟ್ ಬೆಸೆಂಟ್ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ಇರಾನ್ಗೆ ಹಣವನ್ನು ಅಕ್ರಮವಾಗಿ ವರ್ಗಾವಣೆ ಮಾಡಲು ಅವಕಾಶ ನೀಡುವ ಯಾವುದೇ ಸಂಸ್ಥೆಯನ್ನು ಅಮೆರಿಕ ಡಾಲರ್ ವ್ಯವಸ್ಥೆಯಿಂದ ಹೊರಗಿಡಲಾಗುವುದು ಎಂದು ಎಚ್ಚರಿಸಿದ್ದಾರೆ.
ಸೋಮವಾರ ಅಮೆರಿಕದ ಹೊಸ ನಿರ್ಬಂಧಗಳ ಬಗ್ಗೆ ಮಾತನಾಡಿದ ಬೆಸೆಂಟ್, ಇರಾನ್ಗೆ ಆದಾಯ ತರುವ ಸಾಧ್ಯವಿರುವ ಎಲ್ಲ ಮೂಲಗಳನ್ನು ಸಂಪೂರ್ಣವಾಗಿ ತಡೆಯುವುದು ಈ ನಿರ್ಬಂಧಗಳ ಉದ್ದೇಶ ಎಂದು ಹೇಳಿದರು. ಜೊತೆಗೆ, ಇರಾನ್ ಜೊತೆಗೆ ಆರ್ಥಿಕ ಸಂಬಂಧ ಕಡಿತಗೊಳಿಸದ ದೇಶಗಳ ಮೇಲೂ ದ್ವಿತೀಯ ಹಂತದ (Secondary) ನಿರ್ಬಂಧಗಳನ್ನು ವಿಧಿಸಲಾಗುವುದು ಎಂದು ಎಚ್ಚರಿಕೆ ನೀಡಿದ್ದಾರೆ.
ಯಾವ ದೇಶಗಳು ಈ ನಿರ್ಬಂಧಗಳ ಗುರಿಯಾಗಬಹುದು ಎಂಬುದನ್ನು ಅವರು ನೇರವಾಗಿ ಹೆಸರಿಸದಿದ್ದರೂ, “ಈ ಸಂಘರ್ಷದಲ್ಲಿ ಬೂದು ಪ್ರದೇಶಗಳಲ್ಲಿ ಕಾರ್ಯನಿರ್ವಹಿಸುವುದು ಇನ್ನು ಮುಂದೆ ಸ್ವೀಕಾರಾರ್ಹವಲ್ಲ” ಎಂದು ಸ್ಪಷ್ಟಪಡಿಸಿದರು.
“ಇರಾನಿಗೆ ಬೆಂಬಲ ನೀಡುವವರು ಅಮೆರಿಕದ ಸಂಕಲ್ಪವನ್ನು ಪರೀಕ್ಷಿಸುವ ಬೆಲೆಯನ್ನು ಅರಿತುಕೊಳ್ಳಬೇಕು. ನಮ್ಮ ವ್ಯವಸ್ಥೆಯ ಪ್ರಯೋಜನಗಳನ್ನು ಅನುಭವಿಸುತ್ತಾ ಅದನ್ನು ನಾಶಪಡಿಸಲು ಯತ್ನಿಸುವವರಿಗೆ ನೆರವು ನೀಡುವ ಹಕ್ಕು ಯಾವುದೇ ರಾಷ್ಟ್ರಕ್ಕೂ ಇಲ್ಲ. ಈಗ ವಿಶ್ವ ನಾಯಕರು ಸಮೃದ್ಧಿ ಅಥವಾ ಪ್ರತ್ಯೇಕತೆ, ಶಾಂತಿ ಅಥವಾ ಭಯೋತ್ಪಾದನೆ, ಅಮೆರಿಕ ಅಥವಾ ಇರಾನ್ – ಇವುಗಳ ನಡುವೆ ಒಂದು ಆಯ್ಕೆ ಮಾಡಬೇಕಾದ ಸಮಯ ಬಂದಿದೆ” ಎಂದು ಬೆಸೆಂಟ್ ಹೇಳಿದರು.
“ಅಮೆರಿಕದ ನಿಲುವಿನ ಬಗ್ಗೆ ಯಾವುದೇ ಗೊಂದಲ ಇರಬಾರದು. ಇರಾನಿನ ಆಡಳಿತದ ಜೊತೆಗೆ ಯಾವುದೇ ರೀತಿಯ ಆರ್ಥಿಕ ವ್ಯವಹಾರ ನಡೆಸಿದರೆ, ಅದರ ಹೊಣೆಗಾರರು ಅಮೆರಿಕದ ಸಂಪೂರ್ಣ ಶಕ್ತಿಯ ವ್ಯಾಪ್ತಿಗೆ ಒಳಪಡುತ್ತಾರೆ” ಎಂದು ಬೆಸೆಂಟ್ ಹೇಳಿದರು.
ಪ್ರಸ್ತುತ ಚೀನಾ, ಟರ್ಕಿ ಹಾಗೂ ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ) ಇರಾನ್ನ ಅತಿದೊಡ್ಡ ವ್ಯಾಪಾರ ಪಾಲುದಾರ ರಾಷ್ಟ್ರಗಳಾಗಿವೆ.
ಯುದ್ಧ ಆರಂಭವಾಗಿ ಆರು ತಿಂಗಳು ಕಳೆದಿರುವ ಹಿನ್ನೆಲೆಯಲ್ಲಿ ಇರಾನ್ನ ಆರ್ಥಿಕತೆಯನ್ನು ಸಂಪೂರ್ಣವಾಗಿ ದುರ್ಬಲಗೊಳಿಸುವುದು ಅಮೆರಿಕದ ಹೊಸ ಒತ್ತಡದ ಅಭಿಯಾನದ ಪ್ರಮುಖ ಗುರಿಯಾಗಿದೆ. ಈ ನಿರ್ಬಂಧಗಳಿಗೆ ಬೆಂಬಲ ನೀಡದ ರಾಷ್ಟ್ರಗಳು ಕೂಡ ಇರಾನ್ನಂತೆ ಅಂತಾರಾಷ್ಟ್ರೀಯ ಪ್ರತ್ಯೇಕತೆಯನ್ನು ಎದುರಿಸಬೇಕಾಗುತ್ತದೆ ಎಂದು ಬೆಸೆಂಟ್ ಹೇಳಿದರು.
“ನಾನು ಸ್ಪಷ್ಟವಾಗಿ ಹೇಳುತ್ತೇನೆ. ಇರಾನ್ ಪರವಾಗಿ ಹಣವನ್ನು ಅಕ್ರಮವಾಗಿ ವರ್ಗಾವಣೆ ಮಾಡಲು ನೆರವಾಗುವ ಯಾವುದೇ ಸಂಸ್ಥೆಯನ್ನು ಅಮೆರಿಕ ಡಾಲರ್ ವ್ಯವಸ್ಥೆಯಿಂದ ಹೊರಗಿಡಲಾಗುತ್ತದೆ. ಗಡಿಯಾರ ಈಗಾಗಲೇ ಟಿಕ್ ಟಿಕ್ ಮಾಡಲು ಆರಂಭಿಸಿದೆ” ಎಂದು ಅವರು ಎಚ್ಚರಿಸಿದರು.
ನಿರ್ಬಂಧಗಳ ಕುರಿತು ಕೇಳಲಾದ ಪ್ರಶ್ನೆಗೆ ಉತ್ತರಿಸಿದ ಅವರು, ಇರಾನ್ ಜೊತೆಗೆ ಹಣಕಾಸು ವ್ಯವಹಾರಗಳನ್ನು ಸುಗಮಗೊಳಿಸುವ ಅಥವಾ ಅದರ ತೈಲವನ್ನು ಹಣವಾಗಿ ಪರಿವರ್ತಿಸಲು ನೆರವಾಗುವ ಯಾವುದೇ ಸಂಸ್ಥೆ ಅಮೆರಿಕದ ಗುರಿಯಾಗಲಿದೆ ಎಂದು ಹೇಳಿದರು.
ವಾಷಿಂಗ್ಟನ್ನ ಪ್ರಕಾರ, ಈ ಹೊಸ ನಿರ್ಬಂಧಗಳ ಉದ್ದೇಶ ಈಗಾಗಲೇ ಹಿಂದಿನ ನಿರ್ಬಂಧಗಳು ಹಾಗೂ ಅಮೆರಿಕದ ನೌಕಾ ದಿಗ್ಬಂಧನದಿಂದ ತೀವ್ರ ಸಂಕಷ್ಟದಲ್ಲಿರುವ ಇರಾನ್ನ ಆರ್ಥಿಕತೆಯ ಮೇಲೆ ಇನ್ನಷ್ಟು ಒತ್ತಡ ಹೇರುವುದಾಗಿದೆ.
ದಾಖಲೆಯ ಕನಿಷ್ಠ ಮಟ್ಟಕ್ಕೆ ಕುಸಿದ ಇರಾನ್ ಕರೆನ್ಸಿ
ಅಮೆರಿಕದ ಒತ್ತಡ ಹೆಚ್ಚುತ್ತಿರುವ ನಡುವೆ ಇರಾನ್ನ ಕರೆನ್ಸಿ ‘ರಿಯಾಲ್’ ಐತಿಹಾಸಿಕ ಕನಿಷ್ಠ ಮಟ್ಟಕ್ಕೆ ಕುಸಿದಿದೆ. ಕರೆನ್ಸಿ ಮಾರುಕಟ್ಟೆಗಳು ತೆರೆದಾಗ ಒಂದು ಅಮೆರಿಕ ಡಾಲರ್ಗೆ 20.2 ಲಕ್ಷ ರಿಯಾಲ್ ದರ ದಾಖಲಾಗಿದೆ.
ಫೆಬ್ರವರಿ 28ರಂದು ಅಮೆರಿಕ ಮತ್ತು ಇಸ್ರೇಲ್ ಇರಾನ್ ಮೇಲೆ ದಾಳಿ ನಡೆಸುವ ಮೊದಲು ಸಹ ಇರಾನ್ ಆರ್ಥಿಕತೆ ಸಂಕಷ್ಟದಲ್ಲಿತ್ತು. ಆಗಲೇ ಇರಾನ್ ದ್ವಿಅಂಕಿ ದರದ ದುಬಾರಿ (ಇನ್ಫ್ಲೇಷನ್) ಹಾಗೂ ಋಣಾತ್ಮಕ ಆರ್ಥಿಕ ಬೆಳವಣಿಗೆಯನ್ನು ಎದುರಿಸುತ್ತಿತ್ತು. ಕಳೆದ ಆರು ತಿಂಗಳ ಯುದ್ಧದ ಪರಿಣಾಮ ಆರ್ಥಿಕ ಸಂಕಷ್ಟ ಮತ್ತಷ್ಟು ಗಂಭೀರಗೊಂಡಿದ್ದು, ರಿಯಾಲ್ ಮೌಲ್ಯ ನಿರಂತರವಾಗಿ ಕನಿಷ್ಠ ಮಟ್ಟಗಳಿಗೆ ಕುಸಿಯುತ್ತಿದೆ.
ಇದರ ಪರಿಣಾಮ ಸಾಮಾನ್ಯ ಇರಾನಿಯರಿಗೆ ದೈನಂದಿನ ಅಗತ್ಯ ವಸ್ತುಗಳನ್ನು ಖರೀದಿಸುವುದೇ ಕಷ್ಟಕರವಾಗಿದೆ. ಯುದ್ಧ ಆರಂಭವಾದ ನಂತರ ಅಕ್ಕಿಯ ಬೆಲೆ ಸುಮಾರು 60 ಶೇಕಡಾ ಏರಿಕೆಯಾಗಿದೆ. ಮಾಂಸದ ಬೆಲೆಗಳು 150 ಶೇಕಡಕ್ಕಿಂತ ಹೆಚ್ಚು ಹೆಚ್ಚಳ ಕಂಡಿವೆ.
ಅಂತಾರಾಷ್ಟ್ರೀಯ ಹಣಕಾಸು ನಿಧಿ (IMF) ಅಂದಾಜಿನ ಪ್ರಕಾರ, ಇರಾನ್ನ ಒಟ್ಟು ದೇಶೀಯ ಉತ್ಪನ್ನ (GDP) ಈ ವರ್ಷ 5 ಶೇಕಡಕ್ಕಿಂತ ಹೆಚ್ಚು ಪ್ರಮಾಣದಲ್ಲಿ ಕುಸಿಯುವ ಸಾಧ್ಯತೆಯಿದೆ. ಅಮೆರಿಕದ ಹೊಸ ನಿರ್ಬಂಧಗಳು ಜಾರಿಯಾದರೆ, ಈಗಾಗಲೇ ಸಂಕಷ್ಟದಲ್ಲಿರುವ ಇರಾನ್ ಆರ್ಥಿಕತೆಯ ಮೇಲೆ ಇನ್ನಷ್ಟು ಭಾರೀ ಹೊಡೆತ ಬೀಳುವ ಸಾಧ್ಯತೆ ಇದೆ.
ನಿಮ್ಮ ಕಾಮೆಂಟ್ ಬರೆಯಿರಿ