ವೀಡಿಯೊ..| ಹೆಲಿಕಾಪ್ಟರ್‌ ಪತನ, ಐವರು ಸಾವು ; ಹೆಲಿಕಾಪ್ಟರ್‌ ಕೆಳಗೆ ಬೀಳುವ ದೃಶ್ಯ ಸೆರೆ

ರಷ್ಯಾದ (Russia) ಡಾಗೆಸ್ತಾನ್ ಗಣರಾಜ್ಯದಲ್ಲಿ ಸಂಭವಿಸಿದ ಹೆಲಿಕಾಪ್ಟರ್ ಅಪಘಾತದಲ್ಲಿ ರಷ್ಯಾದ ಮಿಲಿಟರಿ ಕಾರ್ಖಾನೆಯ ನಾಲ್ವರು ಹಿರಿಯ ಕಾರ್ಯನಿರ್ವಾಹಕರು ಸೇರಿದಂತೆ ಕನಿಷ್ಠ ಐದು ಜನರು ಸಾವಿಗೀಡಾಗಿದ್ದಾರೆ ಎಂದು ವರದಿಗಳು ತಿಳಿಸಿವೆ.
ಯುರೋಪಿಯನ್ ಯೂನಿಯನ್‌ನಿಂದ (EU) ನಿರ್ಬಂಧಕ್ಕೊಳಗಾದ ಡಾಗೆಸ್ತಾನ್‌ನ ಕಿಜ್ಲಿಯಾರ್ ಎಲೆಕ್ಟ್ರೋಮೆಕ್ಯಾನಿಕಲ್ ಪ್ಲಾಂಟ್‌ನ (Kizlyar Electromechanical Plant) ಉದ್ಯೋಗಿಗಳನ್ನು ಹೊತ್ತೊಯ್ಯುತ್ತಿದ್ದ ಕೆಎ-226 (Ka-226) ಹೆಲಿಕಾಪ್ಟರ್, ಕ್ಯಾಸ್ಪಿಯನ್ ಸಮುದ್ರದ (Caspian Sea) ಸಮೀಪದ ಅಚಿ-ಸು (Achi-Su) ಗ್ರಾಮದ ಬಳಿ ಪತನಗೊಂಡಿದೆ. ನವೆಂಬರ್ 7 ರಂದು ನಡೆದ ಈ ಅಪಘಾತದ ಕ್ಷಣದ ವೀಡಿಯೊ ತುಣುಕುಗಳು ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆಗಿವೆ.

ಕಡಲತೀರದಲ್ಲಿ (Beach) ಇಳಿಯಲು ಪ್ರಯತ್ನಿಸುವಾಗ ಹೆಲಿಕಾಪ್ಟರ್‌ನ ಬಾಲವು ಬಂಡೆಗೆ (Rock) ತಾಗಿ, ಹಿಂದಿನ ರೋಟಾರ್ (Rotor) ಮುರಿದು ಹೋಗಿ ಹೆಲಿಕಾಪ್ಟರ್ ನಿಯಂತ್ರಣ ಕಳೆದುಕೊಂಡಿರುವುದು ದೃಶ್ಯಗಳಲ್ಲಿ ಕಂಡುಬಂದಿದೆ.
ಬಾಲ ಮುರಿದ ನಂತರ ಸಮತೋಲನ ಕಳೆದುಕೊಂಡ ಹೆಲಿಕಾಪ್ಟರ್ ಕ್ಯಾಸ್ಪಿಯನ್ ಸಮುದ್ರದ ಸಮೀಪವಿರುವ ಅಚಿ-ಸು ಗ್ರಾಮದ ಬಳಿಯಿದ್ದ ಖಾಲಿಯಿದ್ದ ಖಾಸಗಿ ಮನೆಯೊಂದಕ್ಕೆ ಅಪ್ಪಳಿಸಿತು. ಪರಿಣಾಮವಾಗಿ ಬೆಂಕಿ ಹೊತ್ತಿಕೊಂಡು ಸಂಪೂರ್ಣವಾಗಿ ನಾಶವಾಯಿತು ಎಂದು ಸರ್ಕಾರಿ ಸುದ್ದಿ ಸಂಸ್ಥೆ ಟಿಎಎಸ್ಎಸ್ (TASS) ತುರ್ತು ಸೇವಾ ಮೂಲಗಳನ್ನು ಉಲ್ಲೇಖಿಸಿ ವರದಿ ಮಾಡಿದೆ.

ಕಿಜ್ಲಿಯಾರ್ ಪ್ಲಾಂಟ್ ಹೊರಡಿಸಿದ ಹೇಳಿಕೆಯ ಪ್ರಕಾರ, ಅಪಘಾತದಲ್ಲಿ ಸಾವಿಗೀಡಾದವರಲ್ಲಿ ಅದರ ನಾಲ್ವರು ಉದ್ಯೋಗಿಗಳು ಸೇರಿದ್ದಾರೆ. ಕಂಪನಿಯ ಉಪ ಮಹಾನಿರ್ದೇಶಕ ಅಚಾಲೊ ಮಾಗೊಮೆಡೋವ್ (Achalo Magomedov) ಸೇರಿದಂತೆ ನಾಲ್ವರು ಉದ್ಯೋಗಿಗಳು ಮೃತಪಟ್ಟಿದ್ದಾರೆ. ಹೆಲಿಕಾಪ್ಟರ್‌ನ ಒಬ್ಬ ಫ್ಲೈಟ್ ಮೆಕ್ಯಾನಿಕ್ ಸಹ ಸಾವಿಗೀಡಾಗಿದ್ದಾರೆ. ಈ ಅಪಘಾತದಲ್ಲಿ ಇಬ್ಬರು ಗಾಯಗೊಂಡಿದ್ದಾರೆ ಎಂದು ತಿಳಿದುಬಂದಿದೆ.
ತಾಂತ್ರಿಕ ದೋಷವೇ ಕಾರಣ?
ಪೂರ್ವ ಯುರೋಪಿಯನ್ ಸುದ್ದಿ ವಾಹಿನಿ ನೆಕ್ಸ್ಟಾ (Nexta) ಪ್ರಕಾರ, ಅಪಘಾತಕ್ಕೆ “ತಾಂತ್ರಿಕ ದೋಷ” (Technical Malfunction) ಕಾರಣ ಎಂದು ಹೇಳಲಾಗಿದೆ. ರಷ್ಯಾದ ಫೆಡರಲ್ ಏವಿಯೇಷನ್ ಏಜೆನ್ಸಿ (Rosaviatsia) ಈ ಅಪಘಾತವನ್ನು “ದುರಂತ” (Disaster) ಎಂದು ವರ್ಗೀಕರಿಸಿದ್ದು, ಅಧಿಕೃತ ತನಿಖೆಯಲ್ಲಿ ಪಾಲ್ಗೊಳ್ಳುವುದಾಗಿ ಹೇಳಿದೆ.