ಮಾನವರೂಪಿ ರೋಬೋಟ್ (humanoid robot) ಉತ್ಸವದ ವೇಳೆ ಗುಂಪಿನ ಮೇಲೆ ದಾಳಿ ಮಾಡಿದ ಕ್ಷಣದ ಆಘಾತಕಾರಿ ದೃಶ್ಯಗಳು ಹೊರಹೊಮ್ಮಿವೆ.
ಫೆಬ್ರವರಿ 9 ರಂದು ಈಶಾನ್ಯ ಚೀನಾದ ಟಿಯಾಂಜಿನ್‌ನಲ್ಲಿ ಸ್ಪ್ರಿಂಗ್ ಉತ್ಸವದ ವೇಳೆ ತೆಗೆದ ವೀಡಿಯೊದಲ್ಲಿ ಈ ದೃಶ್ಯ ಸೆರೆಯಾಗಿದೆ. ಜಾಕೆಟ್‌ ಧರಿಸಿದ್ದ ಮಾನವರೂಪಿ ರೋಬೋಟ್ (humanoid robot) ಬ್ಯಾರಿಕೇಡ್‌ನ ಹಿಂದೆ ಜಮಾಯಿಸಿದ ದಿಗ್ಭ್ರಮೆಗೊಂಡ ಪ್ರೇಕ್ಷಕರ ಗುಂಪಿನ ಕಡೆಗೆ ಇದ್ದಕ್ಕಿದ್ದಂತೆ ನುಗ್ಗುತ್ತಿರುವುದನ್ನು ತೋರಿಸಿದೆ. ಭದ್ರತಾ ಸಿಬ್ಬಂದಿ ತಕ್ಷಣವೇ ಕೃಯಪ್ರವೃತ್ತರಾಗಿ, ಯಾವುದೇ ಸಂಭಾವ್ಯ ಹಾನಿಯನ್ನು ತಡೆಗಟ್ಟಲು ರೋಬೋಟ್ ಅನ್ನು ಜನಸಂದಣಿಯಿಂದ ದೂರ ಎಳೆದಿದ್ದಾರೆ.
ಕಾರ್ಯಕ್ರಮದ ಸಂಘಟಕರು ಇದು “ರೋಬೋಟಿಕ್ ವೈಫಲ್ಯ” ಎಂದು ಹೇಳಿದ್ದಾರೆ. ಈವೆಂಟ್‌ಗೆ ಮುನ್ನ ರೋಬೋಟ್ ಸುರಕ್ಷತಾ ಪರೀಕ್ಷೆಗಳಲ್ಲಿ ಯಶಸ್ವಿಯಾಗಿ ಉತ್ತೀರ್ಣವಾಗಿದೆ ಎಂದು ಹೇಳಲಾಗಿತ್ತು. ಅಂತಹ ಘಟನೆ ಮತ್ತೆ ಸಂಭವಿಸದಂತೆ ಕ್ರಮಗಳನ್ನು ತೆಗೆದುಕೊಳ್ಳಲಾಗಿದೆ ಎಂದು ಮೆಟ್ರೋ ವರದಿ ಮಾಡಿದೆ.
ಆದರೆ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್‌ನಿಂದ ನಡೆಸಲ್ಪಡುವ ಈ ರೋಬೋಟ್ ಇಷ್ಟೊಂದು ಅಸ್ಥಿರವಾಗಿ ಹಾಗೂ ಹಿಂಸಾತ್ಮಕವಾಗಿ ವರ್ತಿಸುತ್ತದೆ ಎಂದು ಯಾರೂ ಊಹಿಸಿರಲಿಲ್ಲ. ಈ ಘಟನೆಯು ಅಂತಹ ರೋಬೋಟ್‌ಗಳು ಭವಿಷ್ಯದಲ್ಲಿ ಮಾನವರಿಗೆ ಗಮನಾರ್ಹ ಅಪಾಯವನ್ನುಂಟುಮಾಡಬಹುದೇ ಎಂಬಿತ್ಯಾದಿ ಪ್ರಶ್ನೆಗಳನ್ನು ಎತ್ತಿದೆ.
ಈ ಮಾನವರೂಪಿ ರೋಬೋಟ್ ಯುನಿಟ್ರೀ ರೊಬೊಟಿಕ್ಸ್ ತಯಾರಿಸಿದ “ಹ್ಯೂಮನಾಯ್ಡ್ ಏಜೆಂಟ್ AI ಅವತಾರ್” ಆಗಿದೆ. ವರದಿಗಳ ಪ್ರಕಾರ, ಸಾಫ್ಟ್‌ವೇರ್ ದೋಷವು ರೋಬೋಟ್‌ನ ಅನಿಯಂತ್ರಿತ ನಡವಳಿಕೆಯನ್ನು ಪ್ರಚೋದಿಸಿದೆ ಎಂದು ನಂಬಲಾಗಿದೆ.
ರೋಬೋಟ್ ಈ ರೀತಿ ಕಾರ್ಯನಿರ್ವಹಿಸಲು ಕಾರಣವೇನು?
ವೈರಲ್ ವೀಡಿಯೊದಲ್ಲಿ, ರೋಬೋಟ್ ಜನರ ಗುಂಪಿನ ಕಡೆಗೆ ಮುನ್ನುಗ್ಗಿದೆ, ಕೆಲವರ ಮೇಲೆ ದಾಳಿ ಮಾಡಲು ಪ್ರಯತ್ನಿಸಿದೆ, ಇದು ಅಲ್ಲಿದ್ದ ಎಲ್ಲರನ್ನೂ ಭಯಭೀತರನ್ನಾಗಿಸಿದೆ. ಭದ್ರತಾ ಸಿಬ್ಬಂದಿ ತ್ವರಿತವಾಗಿ ಕಾರ್ಯನಿರ್ವಹಿಸಿ ರೋಬೋಟ್ ಅನ್ನು ಎಳೆದುಕೊಂಡಿದ್ದಾರೆ. ಆದರೆ ಪಕ್ಕದಲ್ಲಿದ್ದ ಇನ್ನೊಂದು ರೋಬೋಟ್ ಶಾಂತವಾಗಿತ್ತು. ರೋಬೋಟ್‌ನ ಸಾಫ್ಟ್‌ವೇರ್‌ನಲ್ಲಿನ ದೋಷವು ಈ ಆತಂಕಕಾರಿ ನಡವಳಿಕೆಗೆ ಕಾರಣವಾಗಿದೆ ಎಂದು ವರದಿಗಳು ಸೂಚಿಸುತ್ತವೆ.
ಪ್ರೋಗ್ರಾಮಿಂಗ್ ಭಾಷೆಗಳನ್ನು ಆಧರಿಸಿ AI ಕಾರ್ಯನಿರ್ವಹಿಸುತ್ತದೆ ಎಂದು ತಜ್ಞರು ಪದೇಪದೇ ಒತ್ತಿಹೇಳಿದ್ದಾರೆ, ಅಂದರೆ ಕೋಡಿಂಗ್ ದೋಷಗಳು ವಿಶೇಷವಾಗಿ ಈ ತರಹ ಗಮನಾರ್ಹ ಸಮಸ್ಯೆಗಳಿಗೆ ಕಾರಣವಾಗಬಹುದು. ಇತ್ತೀಚೆಗಷ್ಟೇ ದಕ್ಷಿಣ ಕೊರಿಯಾದಿಂದ ರೋಬೋಟ್‌ನ ಬಗ್ಗೆ ಆತಂಕಕಾರಿ ವರದಿ ಬಂದಿತ್ತು, ಅದು ಅತಿಯಾದ ಕೆಲಸದಿಂದ ತನ್ನ ಪ್ರಾಣವನ್ನು ತಾನೇ ತೆಗೆದುಕೊಂಡಿದೆ ಎಂದು ಹೇಳಲಾಗಿದೆ. ಹೆಚ್ಚುವರಿಯಾಗಿ, ಕ್ವೀನ್ಸ್‌ಲ್ಯಾಂಡ್ ವಿಶ್ವವಿದ್ಯಾನಿಲಯದ ಸಂಶೋಧಕರು AI ಯ ಋಣಾತ್ಮಕ ಪರಿಣಾಮಗಳ ಬಗ್ಗೆ ಸಾರ್ವಜನಿಕ ಕಳವಳವನ್ನು ಹೆಚ್ಚಿಸಿರುವ ಸಂಶೋಧನೆಗಳನ್ನು ಬಿಡುಗಡೆ ಮಾಡಿದ್ದಾರೆ.
ಟೆಸ್ಲಾದ ಟೆಕ್ಸಾಸ್ ಕಾರ್ಖಾನೆಯಲ್ಲಿ ಇಂಜಿನಿಯರ್‌ನ ಮೇಲೆ ರೋಬೋಟ್ ದಾಳಿ ಮಾಡಿದ ನಿದರ್ಶನವನ್ನು ಒಳಗೊಂಡ ಘಟನೆಯು ಸೇರಿದಂತೆ ಹಿಂದೆಯೂ ಕೆಲವು ಪ್ರಕರಣಗಳು ನಡೆದ ವರದಿಯಾಗಿತ್ತು.
ಈ ಹಲವು ಸಂದರ್ಭಗಳಲ್ಲಿ, ಸಾಫ್ಟ್‌ವೇರ್ ಅಸಮರ್ಪಕ ಕಾರ್ಯಗಳಿಂದಾಗಿ ಇಂತಹ ಘಟನೆಗಳು ಸಂಭವಿಸುತ್ತವೆ ಎಂದು ಗುರುತಿಸಲಾಗಿದೆ. AI ಅಭಿವೃದ್ಧಿಯಲ್ಲಿ ದೃಢವಾದ ಪರೀಕ್ಷೆ ಮತ್ತು ಗುಣಮಟ್ಟದ ನಿಯಂತ್ರಣದ ಪ್ರಾಮುಖ್ಯತೆಯನ್ನು ಎತ್ತಿ ತೋರಿಸುತ್ತದೆ.
ಮಾನವ ಜೀವನದ ಮೇಲೆ ಯಂತ್ರಗಳ ಸಂಭಾವ್ಯ ಅಪಾಯಗಳು ಮತ್ತು ಪರಿಣಾಮಗಳ ಬಗ್ಗೆ ಹೆಚ್ಚುತ್ತಿರುವ ಆತಂಕಗಳನ್ನು ಇಂತಹ ಘಟನೆಗಳು ಇನ್ನಷ್ಟು ಹೆಚ್ಚಿಸುತ್ತವೆ. ವೀಡಿಯೊಗೆ ಪ್ರತಿಕ್ರಿಯಿಸಿದ ಬಳಕೆದಾರರು, “ಆದ್ದರಿಂದ ಇದು ಪ್ರಾರಂಭವಾಗಿದೆ… AI- ನಿಯಂತ್ರಿತ ರೋಬೋಟ್ ಮನುಷ್ಯನ ಮೇಲೆ ದಾಳಿ ಮಾಡಿದೆ” ಎಂದು ಬರೆದಿದ್ದಾರೆ.
ಮತ್ತೊಬ್ಬರು “ನಮ್ಮ ಉಜ್ವಲ ಭವಿಷ್ಯದ ಬಗ್ಗೆ ಸ್ವಲ್ಪ ಮುನ್ನೋಟ” ಎಂದು ಪ್ರತಿಕ್ರಿಯಿಸಿದ್ದಾರೆ. ಮೂರನೆಯವರು “ಸಾರ್ವಜನಿಕರಿಗೆ ಪರಿಚಯಿಸುವ ಮೊದಲು ಮೊದಲು ನಾವು ಎಲ್ಲಾ ದೋಷಗಳನ್ನು ಪರಿಹರಿಸಬಹುದೇ? ಎಂದು ಕೇಳಿದ್ದಾರೆ. ನಾಲ್ಕನೆಯವರು, “ಗ್ಲಿಚ್‌ನಿಂದಾಗಿ AIಗಳು ಮತ್ತು ರೋಬೋಟ್‌ಗಳು ಮನುಷ್ಯರ ವಿರುದ್ಧ ಅಪಾಯಕಾರಿಯಾಗಬಹುದು ಎಂದು ನಾವು ಚಿಂತಿಸಬೇಕೇ” ಎಂದು ಹೇಳಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ