ನವದೆಹಲಿ: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಇಂದು, ಶುಕ್ರವಾರ ಸಾಮಾಜಿಕ ಮಾಧ್ಯಮ ಪೋಸ್ಟ್ನಲ್ಲಿ “ನಾವು ಭಾರತ ಮತ್ತು ರಷ್ಯಾವನ್ನು ಅತ್ಯಂತ ಕರಾಳ ಚೀನಾಕ್ಕೆ ಕಳೆದುಕೊಂಡಂತೆ ಕಾಣುತ್ತಿದೆ” ಎಂದು ಹೇಳಿದ್ದಾರೆ. ನಂತರ ಮೂರೂ ದೇಶಗಳಿಗೆ “ಸಮೃದ್ಧ” ಭವಿಷ್ಯವನ್ನು ಹಾರೈಸಿದ್ದಾರೆ.
ವಾರದ ಆರಂಭದಲ್ಲಿ ಚೀನಾದ ಕ್ಸಿ ಜಿನ್ಪಿಂಗ್ ಆಯೋಜಿಸಿದ್ದ ಟಿಯಾಂಜಿನ್ ಎಸ್ಸಿಒ ಶೃಂಗಸಭೆಯಲ್ಲಿ ಭಾಗವಹಿಸಿದ್ದ ಹಲವಾರು ವಿಶ್ವ ನಾಯಕರಲ್ಲಿ ಪ್ರಧಾನಿ ನರೇಂದ್ರ ಮೋದಿ ಮತ್ತು ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುತಿನ್ ಪಾಲ್ಗೊಂಡವರಲ್ಲಿ ಪ್ರಮುಖರು. ಈ ಮೂವರು ನಾಯಕರ ನಡುವಿನ ಸೌಹಾರ್ದತೆಯು ಸಂದೇಶವನ್ನು ರವಾನಿಸಿತು. ಇದನ್ನು ಅನೇಕರು “ಒಂದು ಮಹತ್ವದ ತಿರುವು” ಎಂದು ಕರೆದರು ಮತ್ತು ಅಮೆರಿಕ ಅಧ್ಯಕ್ಷರು ನಡೆಸಿದ ಸುಂಕ ಯುದ್ಧದ ನಡುವೆ “ಹೊಸ ವಿಶ್ವ ಕ್ರಮ” ಎಂದು ಕರೆದರು. ಚೀನಾ ಅಧ್ಯಕ್ಷ ಕ್ಸಿ ಜಿನ್ಪಿಂಗ್ ಅವರು ಪ್ರಧಾನಿ ನರೇಂದ್ರ ಮೋದಿ ಮತ್ತು ರಷ್ಯಾದ ಅಧ್ಯಕ್ಷ ವ್ಲಾದಿಮಿರ್ ಪುತಿನ್ ಅವರಿಗೆ ಆತಿಥ್ಯ ವಹಿಸಿದ್ದರು.
“ನಾವು ಭಾರತ ಮತ್ತು ರಷ್ಯಾವನ್ನು ಅತ್ಯಂತ ಕರಾಳವಾದ ಚೀನಾಕ್ಕೆ ಕಳೆದುಕೊಂಡಂತೆ ಕಾಣುತ್ತಿದೆ. ಅವರು ಒಟ್ಟಿಗೆ ದೀರ್ಘ ಮತ್ತು ಸಮೃದ್ಧ ಭವಿಷ್ಯವನ್ನು ಹೊಂದಿರಲಿ!” ಎಂದು ಟ್ರಂಪ್ ತಮ್ಮ ಟ್ರೂತ್ ಸೋಷಿಯಲ್ನಲ್ಲಿ ಪೋಸ್ಟ್ ಮಾಡಿದ್ದಾರೆ.
ಭಾರತ, ರಷ್ಯಾ ಮತ್ತು ಚೀನಾ ನಡುವಿನ ಆಳವಾದ ಸಂಬಂಧಗಳ ಬಗ್ಗೆ ಟ್ರಂಪ್ ಅವರ ಈವರೆಗಿನ ಸಾರ್ವಜನಿಕ ಸ್ವೀಕೃತಿಯನ್ನು ಈ ಕಾಮೆಂಟ್ಗಳು ಗುರುತಿಸುತ್ತವೆ. ಮೂವರು ನಾಯಕರು ಇಂಧನದಿಂದ ಹಿಡಿದು ಭದ್ರತೆಯವರೆಗಿನ ಕ್ಷೇತ್ರಗಳಲ್ಲಿ ಸಹಕಾರವನ್ನು ಸಾರ್ವಜನಿಕವಾಗಿ ಚರ್ಚಿಸಿದರು, ಅವರೆಲ್ಲರೂ – ವಿವಿಧ ಹಂತಗಳಲ್ಲಿ – ಉಕ್ರೇನ್ನಲ್ಲಿನ ಯುದ್ಧ ಮತ್ತು ಜಾಗತಿಕ ವ್ಯಾಪಾರ ನೀತಿ ಸೇರಿದಂತೆ ವಿಷಯಗಳಲ್ಲಿ ಅಮೆರಿಕದ ಜೊತೆ ಭಿನ್ನಾಭಿಪ್ರಾಯ ಹೊಂದಿದ್ದರು.
ಏತನ್ಮಧ್ಯೆ, ಶುಕ್ರವಾರ ಪತ್ರಿಕಾಗೋಷ್ಠಿಯಲ್ಲಿ ವಿದೇಶಾಂಗ ಸಚಿವಾಲಯವು ಟ್ರಂಪ್ ಅವರ ಪೋಸ್ಟ್ ಬಗ್ಗೆ ಯಾವುದೇ ಪ್ರತಿಕ್ರಿಯೆ ನೀಡದಿರಲು ನಿರ್ಧರಿಸಿದೆ. “ಟ್ರಂಪ್ ಅವರ ಪೋಸ್ಟ್ ಬಗ್ಗೆ ಕಾಮೆಂಟ್ ಮಾಡಲು ನಮ್ಮಲ್ಲಿ ಈಗ ಏನೂ ಇಲ್ಲ” ಎಂದು ಅದು ಹೇಳಿದೆ.
ಇದಕ್ಕೂ ಮೊದಲು, ಟ್ರಂಪ್ ಅವರ ಮಾಜಿ ಸಹಾಯಕ, ಅಮೆರಿಕದ ಮಾಜಿ ರಾಷ್ಟ್ರೀಯ ಭದ್ರತಾ ಸಲಹೆಗಾರ ಜಾನ್ ಬೋಲ್ಟನ್, ಟ್ರಂಪ್ ಮತ್ತು ಮೋದಿ ನಡುವಿನ ಒಂದು ಕಾಲದಲ್ಲಿ ನಿಕಟ ವೈಯಕ್ತಿಕ ಬಾಂಧವ್ಯವು ಕಣ್ಮರೆಯಾಗಿದೆ ಎಂದು ಹೇಳಿದ್ದರು.
ದಶಕಗಳಿಂದ, ಚೀನಾದ ವಿಸ್ತರಿಸುತ್ತಿರುವ ಪ್ರಭಾವಕ್ಕೆ ಸಂಭಾವ್ಯ ಪ್ರತಿಸ್ಪರ್ಧಿಯಾಗಿ ಅಮೆರಿಕವು ಭಾರತವನ್ನು ನೋಡಿದೆ. ಅಮೆರಿಕದ ರಿಪಬ್ಲಿಕನ್ ಮತ್ತು ಡೆಮಾಕ್ರಟಿಕ್ ಆಡಳಿತಗಳೆರಡೂ ಭಾರತದ ಕಾರ್ಯತಂತ್ರದ ಪಾಲುದಾರನಾಗಿ ನೋಡುತ್ತ ಬಂದಿತ್ತು. ಟ್ರಂಪ್ ತಮ್ಮ ಮೊದಲ ಅವಧಿಯಲ್ಲಿ ಭಾರತದ ಜೊತೆ ಉತ್ತಮ ಸಂಬಂಧ ಹೊಂದಿದ್ದರು. ಹೂಸ್ಟನ್ನಲ್ಲಿ 2019 ರ “ಹೌಡಿ ಮೋದಿ” ರ್ಯಾಲಿಯಲ್ಲಿ ಪ್ರಧಾನಿ ಮೋದಿ ಅವರೊಂದಿಗೆ ಕಾಣಿಸಿಕೊಂಡರು ಮತ್ತು ಜಪಾನ್ ಮತ್ತು ಆಸ್ಟ್ರೇಲಿಯಾದೊಂದಿಗೆ ಕ್ವಾಡ್ ಭದ್ರತಾ ಗುಂಪನ್ನು ಪುನರುಜ್ಜೀವನಗೊಳಿಸಿದ್ದರು.
ಆದಾಗ್ಯೂ ಇತ್ತೀಚಿನ ಬೆಳವಣಿಗೆಗಳು ಸಂಬಂಧಗಳು ದೂವಾಗುವುದನ್ನು ಸೂಚಿಸುತ್ತವೆ. ಟ್ರಂಪ್ ಅವರ ಸುಂಕ ಕ್ರಮಗಳು ಮತ್ತು ರಷ್ಯಾದೊಂದಿಗಿನ ಭಾರತದ ಇಂಧನ ವ್ಯಾಪಾರದ ಬಗ್ಗೆ ಟೀಕೆಗಳು ಭಾರತವು ಅಮೆರಿಕದಿಂದ ದೂರವಾಗುವಂತೆ ಮಾಡಿದೆ ಎಂದು ತಜ್ಞರು ಗಮನಿಸಿದ್ದಾರೆ.
ಟಿಯಾಂಜಿನ್ನಲ್ಲಿ ನಡೆದ ಎಸ್ಸಿಒ (SCO) ಶೃಂಗಸಭೆಯು ಪ್ರಧಾನಿ ಮೋದಿಯವರು ಏಳು ವರ್ಷಗಳಲ್ಲಿ ಚೀನಾಕ್ಕೆ ಮಾಡಿದ ಮೊದಲ ಭೇಟಿಯಾಗಿದೆ, ಇದು ಗಾಲ್ವಾನ್ ಕಣಿವೆಯಲ್ಲಿ 2020 ರ ಮಾರಕ ಗಡಿ ಘರ್ಷಣೆ ಸೇರಿದಂತೆ ದೀರ್ಘಕಾಲದ ಉದ್ವಿಗ್ನತೆಗಳನ್ನು ಗಮನಿಸಿದರೆ ಮಹತ್ವದ ಬೆಳವಣಿಗೆಯಾಗಿದೆ. ಕ್ಸಿ ಮತ್ತು ಪುತಿನ್ ಇಬ್ಬರನ್ನೂ ಭೇಟಿ ಮಾಡುವ ಮೂಲಕ, ಪ್ರಧಾನಿ ಮೋದಿ ಕಾರ್ಯತಂತ್ರವನ್ನು ಸ್ವಾಯತ್ತವಾಗಿ ಇರಿಸುವ ಇರಾದೆಯನ್ನು ಸೂಚಿಸಿದರು.
ಟ್ರಂಪ್ ಅಧಿಕಾರಕ್ಕೆ ಮರಳಿದ ನಂತರ, ಭಾರತೀಯ ಸರಕುಗಳ ಮೇಲೆ ಒಟ್ಟು 50 ಪ್ರತಿಶತ ಸುಂಕವನ್ನು ವಿಧಿಸಿದ್ದಾರೆ – 25 ಪ್ರತಿಶತ ಪ್ರತಿಸುಂಕಗಳು ಮತ್ತು ಭಾರತದ ರಷ್ಯಾದ ತೈಲ ಆಮದುಗಳನ್ನು ಗುರಿಯಾಗಿಟ್ಟುಕೊಂಡು ಹೆಚ್ಚುವರಿ 25 ಪ್ರತಿಶತ ದಂಡವಾಗಿದೆ. ಈ ಸುಂಕಗಳು ಅಮೆರಿಕವು ಯಾವುದೇ ದೇಶದ ಮೇಲೆ ವಿಧಿಸಿರುವ ಅತ್ಯಂತ ಸುಂಕಗಳಲ್ಲಿ ಒಂದಾಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ