ಪಾಟ್ನಾ /ನವದೆಹಲಿ: ಬಿಹಾರ ವಿಧಾನಸಭಾ ಚುನಾವಣೆಯ ಮತ ಎಣಿಕೆ ಅಂತಿಮ ಹಂತಕ್ಕೆ ತಲುಪುತ್ತಿದ್ದು, ಆಡಳಿತಾರೂಢ ರಾಷ್ಟ್ರೀಯ ಪ್ರಜಾಸತ್ತಾತ್ಮಕ ಒಕ್ಕೂಟ(NDA)ವು ತಾನು ನಿಗದಿಪಡಿಸಿದ್ದ ‘160 ಪಾರ್’ (160ಕ್ಕೂ ಹೆಚ್ಚು) ಗುರಿಯನ್ನು ಸಲೀಸಾಗಿ ದಾಟಿ, 243 ಸದಸ್ಯ ಬಲದ ವಿಧಾನಸಭೆಯಲ್ಲಿ ಅಭೂತಪೂರ್ವ ಮೂರನೇ ನಾಲ್ಕರಷ್ಟು ಬಹುಮತದ ಗೆಲುವಿನತ್ತ ಸಾಗುತ್ತಿದೆ.. ತೇಜಸ್ವಿ ಯಾದವ್ ನೇತೃತ್ವದ ಮಹಾಘಟಬಂಧನಕ್ಕೆ (ಮಹಾ ಮೈತ್ರಿಕೂಟ) ತೀವ್ರ ಹಿನ್ನಡೆಯಾಗಿದ್ದು, ಧೂಳೀಪಟವಾಗುವ ಭೀತಿಯಲ್ಲಿದೆ.
ಶುಕ್ರವಾರ ಬೆಳಿಗ್ಗೆ 8 ಗಂಟೆಗೆ ಮತ ಎಣಿಕೆ ಆರಂಭವಾಗಿದ್ದು, ಅಂಚೆ ಮತಗಳ ಆರಂಭದಿಂದಲೇ ನಿತೀಶಕುಮಾರ ನೇತೃತ್ವದ ಎನ್ಡಿಎ ಮುನ್ನಡೆ ಸಾಧಿಸಿತ್ತು. ಕೆಲವು ಗಂಟೆಗಳ ನಂತರದ ಟ್ರೆಂಡ್ಗಳು ಎನ್ಡಿಎ ಮೈತ್ರಿಕೂಟದಲ್ಲಿ ಬಿಜೆಪಿಯು, ಜೆಡಿ(ಯು) ಹಿಂದಿಕ್ಕಿ, ದೊಡ್ಡಣ್ಣ ಸ್ಥಾನಕ್ಕೆ ಏರುವ ಸುಳಿವು ನೀಡಿವೆ.
ಫಲಿತಾಂಶದ ಟ್ರೆಂಡ್ಗಳು ಆಡಳಿತಾರೂಢ ಎನ್ಡಿಎಯನ್ನು ಬಹುಮತದ ಗಡಿ ದಾಟಿಸಿದೆ. 208 ಸ್ಥಾನಗಳಲ್ಲಿ ಮುನ್ನಡೆ ಸಾಧಿಸಿರುವ ಎನ್ಡಿಎ ಮೂರನೇ ನಾಲ್ಕನೇ ಬಹುಮತದ ಗೆಲುವು ಸಾಧಿಸುವತ್ತ ಸಾಗುತ್ತಿದೆ.
ತೇಜಸ್ವಿ ಯಾದವ್ ನೇತೃತ್ವದ ಮಹಾಘಟಬಂಧನ ಕೇವಲ 34 ಸ್ಥಾನಗಳಲ್ಲಿ ಮಾತ್ರ ಮುನ್ನಡೆ ಕಾಯ್ದುಕೊಂಡು, ತೀವ್ರ ಹಿನ್ನಡೆ ಅನುಭವಿಸಿದೆ. 2020ರ ಚುನಾವಣೆಯಲ್ಲಿ 110 ಸ್ಥಾನಗಳನ್ನು ಗೆದ್ದಿದ್ದ ಮೈತ್ರಿಕೂಟಕ್ಕೆ ಇದು ಅತಿ ದೊಡ್ಡ ಆಘಾತವಾಗಿದೆ. ಕಳೆದ ಚುನಾವಣೆಯಲ್ಲಿ ಏಕೈಕ ದೊಡ್ಡ ಪಕ್ಷವಾಗಿದ್ದ ಆರ್ಜೆಡಿಯು ತನ್ನ ಅರ್ಧಕ್ಕಿಂತ ಹೆಚ್ಚು ಸ್ಥಾನಗಳನ್ನು ಕಳೆದುಕೊಳ್ಳುವ ನಿರೀಕ್ಷೆಯಿದೆ. ಮಿತ್ರಪಕ್ಷ ಕಾಂಗ್ರೆಸ್ ಮತ್ತೆ ದುರ್ಬಲ ಕೊಂಡಿಯಾಗಿ ಗೋಚರಿಸಿದೆ.
ಬಿಜೆಪಿ ‘ದೊಡ್ಡಣ್ಣ’
ಪ್ರಸ್ತುತ ಟ್ರೆಂಡ್ಗಳ ಪ್ರಕಾರ, 208 ಸ್ಥಾನಗಳಲ್ಲಿ ಎನ್ಡಿಎ ಮೈತ್ರಿಕೂಟದಲ್ಲಿ ಬಿಜೆಪಿಯು 94 ಸ್ಥಾನಗಳಲ್ಲಿ ಮುನ್ನಡೆ ಸಾಧಿಸಿ ದೊಡ್ಡಣ್ಣನ ಸ್ಥಾನವನ್ನು ಪಡೆಯುವ ಸಾಧ್ಯತೆಯಿದೆ. ನಿತೀಶಕುಮಾರ ಅವರ ಜೆಡಿ(ಯು) 83 ಸ್ಥಾನಗಳಲ್ಲಿ ಮುನ್ನಡೆಯಲ್ಲಿದೆ. ಜೂನಿಯರ್ ಪಾಲುದಾರರಾದ ಚಿರಾಗ್ ಪಾಸ್ವಾನ್ ಅವರ ಎಲ್ಜೆಪಿ(ಆರ್ವಿ) 21, ಜೀತನ್ ರಾಮ್ ಮಾಂಝಿ ಅವರ ಹೆಚ್ಎಎಂ 5, ಮತ್ತು ಉಪೇಂದ್ರ ಕುಶ್ವಾಹಾ ಅವರ ಆರ್ಎಲ್ಎಂ 3 ಸ್ಥಾನಗಳಲ್ಲಿ ಮುನ್ನಡೆ ಕಾಯ್ದುಕೊಂಡಿವೆ. ಇದೇ ವೇಳೆ ಆರ್ಜೆಡಿ ನೇತೃತ್ವದ ಮಹಾಘಟಬಂಧನದಲ್ಲಿ ಆರ್ಜೆಡಿ 26, ಕಾಂಗ್ರೆಸ್ 4 ಹಾಗೂ ಎಡಪಕ್ಷಗಳು 3 ಸ್ಥಾನಗಳಲ್ಲಿ ಮುನ್ನಡೆ ಸಾಧಿಸಿವೆ. ಒವೈಸಿ ಅವರ ಎಂಐಎಂಐಎಂ ಪಕ್ಷವು 4 ಸ್ಥಾನಗಳಲ್ಲಿ ಹಾಗೂ ಬಿಎಸ್ಪಿ 1 ಸ್ಥಾನಗಳಲ್ಲಿ ಮುಂದಿದೆ.
ಈ ಪ್ರವೃತ್ತಿಗಳು ಮುಂದುವರಿದರೆ, ‘ಸುಶಾಸನ್ ಬಾಬು’ ಎಂದೇ ಖ್ಯಾತರಾದ ನಿತೀಶಕುಮಾರ ಅವರು ದಾಖಲೆಯ ಹತ್ತನೇ ಬಾರಿಗೆ ಬಿಹಾರ ಮುಖ್ಯಮಂತ್ರಿಯಾಗಿ ಪ್ರಮಾಣ ವಚನ ಸ್ವೀಕರಿಸಲು ಸಿದ್ಧರಾಗಿದ್ದಾರೆ.
ತೇಜಸ್ವಿ ಯಾದವ್ಗೆ ಹಿನ್ನಡೆ: ಮಹಾಘಟಬಂಧನ್ ಪಾಳಯದಲ್ಲಿ ಆರ್ಜೆಡಿ ಕೇವಲ 26 ಸ್ಥಾನಗಳಲ್ಲಿ ಮುನ್ನಡೆಯಲ್ಲಿದ್ದು, ತೇಜಸ್ವಿ ಯಾದವ್ ಅವರ ಮುಖ್ಯಮಂತ್ರಿಯಾಗುವ ಕನಸಿಗೆ ಭಾರಿ ಹಿನ್ನಡೆಯಾಗಿದೆ. ಕುಟುಂಬದ ಪ್ರಬಲ ಕ್ಷೇತ್ರವಾದ ರಾಘೋಪುರದಲ್ಲಿ ತೇಜಸ್ವಿ ಯಾದವ್ ಹಿಂದೆ ಬಿದ್ದಿದ್ದಾರೆ.
ಗೆಲುವಿನಲ್ಲಿ ನಿರ್ಣಾಯಕ ಅಂಶಗಳು
‘ನಿಮೊ’ ಅಲೆ, ಮಹಿಳಾ ಮತದಾರರ ಬಲ: ಈ ಪ್ರಬಲ ಪ್ರದರ್ಶನದ ಹಿಂದೆ ‘ನಿಮೊ’ (ನಿತೀಶಕುಮಾರ + ನರೇಂದ್ರ ಮೋದಿ) ಅಲೆಯು ನಿರ್ಣಾಯಕ ಪಾತ್ರ ವಹಿಸಿದೆ. ಮಹಿಳಾ ಮತದಾರರ ದಾಖಲೆಯ ಭಾಗವಹಿಸುವಿಕೆ (ಶೇ. 69 ರಿಂದ 74) ನಿತೀಶಕುಮಾರ ಅವರ ಸಮಾಜ ಕಲ್ಯಾಣ ಯೋಜನೆಗಳ ಪರವಾಗಿ ಮತ ಚಲಾಯಿಸಿ, ಮೈತ್ರಿಕೂಟದ ಗೆಲುವಿಗೆ ಬಲ ತುಂಬಿದೆ. ಪ್ರಧಾನಿ ಮೋದಿ ಅವರ ಸರಣಿ ಪ್ರಚಾರ ಮತ್ತು ಆರ್ಜೆಡಿ ವಿರುದ್ಧದ “ಜಂಗಲ್ ರಾಜ್” ಟೀಕೆ ಮತದಾರರ ಮೇಲೆ ಪ್ರಭಾವ ಬೀರಿದೆ ಎನ್ನಲಾಗಿದೆ.
ತೇಜಸ್ವಿ ಯಾದವ್ ಲೆಕ್ಕಾಚಾರ ವಿಫಲ
ಆರ್ಜೆಡಿ ಪಕ್ಷದ ಈ ಹೀನಾಯ ಪ್ರದರ್ಶನವು (ಪಕ್ಷದ ಎರಡನೇ ಅತಿ ಕೆಟ್ಟ ಸಾಧನೆ), ಯಾದವ್ ಸಮುದಾಯದ ಅಭ್ಯರ್ಥಿಗಳಿಗೆ ಹೆಚ್ಚು ಟಿಕೆಟ್ ನೀಡಿದ ಜಾತಿ ಲೆಕ್ಕಾಚಾರವನ್ನು ತಪ್ಪಾಗಿ ನಿರ್ಧರಿಸಿತು ಎಂದು ರಾಜಕೀಯ ಪಂಡಿತರು ವಿಶ್ಲೇಷಿಸಿದ್ದಾರೆ. ವಾಸ್ತವಕ್ಕೆ ದೂರವಾದ ಮತ್ತು ಭಾರಿ ಪ್ರಮಾಣದ ಅವಾಸ್ತವಿಕ ಭರವಸೆಗಳು ಮತದಾರರಲ್ಲಿ ಅಷ್ಟಾಗಿ ಪರಿಣಾಮ ಬೀರಲಿಲ್ಲ.
ಮುಂದಿನ ಬೆಳವಣಿಗೆಗಳು: ಫಲಿತಾಂಶಗಳು ಅಂತಿಮವಾಗುತ್ತಾ ಬಂದಂತೆ, ಬಿಜೆಪಿಯು ಜೆಡಿ(ಯು) ಪಕ್ಷವನ್ನು ಹಿಂದಿಕ್ಕಿ ದೊಡ್ಡ ಶಕ್ತಿಯಾಗಿ ಹೊರಹೊಮ್ಮಿರುವುದರಿಂದ, ಮೈತ್ರಿಕೂಟದೊಳಗೆ ಮುಖ್ಯಮಂತ್ರಿ ಸ್ಥಾನ ಮತ್ತು ಅಧಿಕಾರ ಹಂಚಿಕೆಯ ಕುರಿತು ಚರ್ಚೆಗಳು ಅನಿವಾರ್ಯವಾಗಲಿವೆ.
ನಿಮ್ಮ ಕಾಮೆಂಟ್ ಬರೆಯಿರಿ