ಬರೇಲಿ: ದಂಪತಿಯ ಜೀವನದ ಅತ್ಯಂತ ಸಂತೋಷದ ದಿನವು ದುಃಸ್ವಪ್ನವಾಗಿ ಮಾರ್ಪಟ್ಟಿದೆ. ಮದುವೆಯ ವಿಧಿವಿಧಾನಗಳು ಆರಂಭಗೊಳ್ಳುವ ಕೆಲವೇ ಕ್ಷಣಗಳ ಮೊದಲು ವರನನ್ನು ಮದುವೆಯಾಗಲು ವಧಿ ನಿರಾಕರಿಸಿದ ಘಟನೆ ಉತ್ತರ ಪ್ರದೇಶದ ಬರೇಲಿಯಲ್ಲಿ (Bareilly) ನಡೆದಿದೆ ಎಂದು ವರದಿಯಾಗಿದೆ.
ವರನು ಭಾರೀ ವರದಕ್ಷಿಣೆಯಾಗಿ ಕಾರು ಮತ್ತು ₹20 ಲಕ್ಷ ನಗದು ಹಣಕ್ಕೆ ಬೇಡಿಕೆ ಇಟ್ಟಿದ್ದೇ ಇದಕ್ಕೆ ಕಾರಣ ಎನ್ನಲಾಗಿದೆ.
ವರನು ‘ಬ್ರೆಝಾ (Brezza) ಕಾರು ಮತ್ತು ಹಣ’ ನೀಡುವ ವರೆಗೂ ವಿವಾಹದ ವಿಧಿಗಳನ್ನು ನೆರವೇರಿಸುವುದಿಲ್ಲ ಎಂದು ಪಟ್ಟು ಹಿಡಿದಿದ್ದಾನೆ. ವರನ ಈ ಅಂತಿಮ ಕ್ಷಣದ ಬೇಡಿಕೆಯು ಮಂಟಪದಲ್ಲಿ ಗೊಂದಲಕ್ಕೆ ಕಾರಣವಾಯಿತು. ಪರಿಸ್ಥಿತಿ ಕೈಮೀರುತ್ತಿದ್ದಂತೆಯೇ, ಪೊಲೀಸರನ್ನು ಸ್ಥಳಕ್ಕೆ ಕರೆಯಲಾಯಿತು.
ವರನನ್ನು ಧಿಕ್ಕರಿಸಿದ ವಧು
ತನ್ನ ಕುಟುಂಬ ಸದಸ್ಯರು ಅಸಹಾಯಕರಾಗಿರುವುದನ್ನು ಕಂಡ ವಧು, ಈ ಮದುವೆ ರದ್ದುಪಡಿಸಲು ನಿರ್ಧರಿಸಿದಳು. ಅವಳು, “ನಾನು ಈ ವರದಕ್ಷಿಣೆ-ಲಾಲಸೆ ಇರುವ ಜನರೊಂದಿಗೆ ಮದುವೆಯಾಗಲು ಬಯಸುವುದಿಲ್ಲ. ನನ್ನ ಕುಟುಂಬವನ್ನು ಗೌರವಿಸದ, ಎಲ್ಲ ಅತಿಥಿಗಳ ಮುಂದೆ ನನ್ನ ತಂದೆ ಮತ್ತು ಸಹೋದರನನ್ನು ಅವಮಾನಿಸಿದ ಹುಡುಗನೊಂದಿಗೆ ನಾನು ನನ್ನ ಜೀವನವನ್ನು ಕಳೆಯಲು ಸಾಧ್ಯವಿಲ್ಲ. ನಾನು ಈ ದುರಾಸೆಯ ವ್ಯಕ್ತಿಯೊಂದಿಗೆ ಮದುವೆಯ ವಾಗ್ದಾನವನ್ನು ತೆಗೆದುಕೊಳ್ಳುವುದಿಲ್ಲ” ಎಂದು ದಿಟ್ಟತನದಿಂದ ಹೇಳಿ, ಮದುವೆಯನ್ನು ನಿಲ್ಲಿಸಿದಳು ಎಂದು ‘ದೈನಿಕ್ ಭಾಸ್ಕರ್’ ವರದಿ ಮಾಡಿದೆ.
ಮಾಹಿತಿ ತಿಳಿದು ಸ್ಥಳಕ್ಕೆ ಬಂದ ಪೊಲೀಸರು ತಕ್ಷಣವೇ ವರ ಮತ್ತು ಆತನ ಭಾವನನ್ನು (brother-in-law) ವಶಕ್ಕೆ ತೆಗೆದುಕೊಂಡಿದ್ದಾರೆ. ಗಮನಾರ್ಹ ಸಂಗತಿ ಎಂದರೆ, ವಧುವಿನ ಕುಟುಂಬದ ಕಡೆಯಿಂದ ಯಾವುದೇ ಅಧಿಕೃತ ದೂರು ದಾಖಲಾಗಿಲ್ಲ ಎಂದು ತಿಳಿದುಬಂದಿದೆ.
ಮುಂಚೆಯೇ ಭಾರಿ ವೆಚ್ಚ ಮಾಡಿದ್ದ ವಧುವಿನ ಕುಟುಂಬ
ವರದಿಗಳ ಪ್ರಕಾರ, ಈ ಜೋಡಿ ಮೇ ತಿಂಗಳಲ್ಲಿ ನಿಶ್ಚಿತಾರ್ಥ ಮಾಡಿಕೊಂಡಿತ್ತು. ನಿಶ್ಚಿತಾರ್ಥಕ್ಕಾಗಿ ವಧುವಿನ ಕುಟುಂಬವು ಸುಮಾರು ಮೂರು ಲಕ್ಷ ರೂಪಾಯಿಗಳನ್ನು ಖರ್ಚು ಮಾಡಿದೆ. ಇದರ ಜೊತೆಗೆ, ನಿಶ್ಚಿತಾರ್ಥದ ಸಮಯದಲ್ಲಿ ವರನಿಗೆ ಚಿನ್ನದ ಉಂಗುರ, ಸರ ಮತ್ತು ಐದು ಲಕ್ಷ ರೂಪಾಯಿ ನಗದನ್ನು ಸಹ ನೀಡಲಾಗಿದೆ ಎಂದು ಆರೋಪಿಸಲಾಗಿದೆ.
ಶುಕ್ರವಾರ ನಿಗದಿಯಾಗಿದ್ದ ಮದುವೆಯ ಮೆರವಣಿಗೆ ಬಂದಿತ್ತು ಮತ್ತು ವಿವಾಹ ಪ್ರತಿಜ್ಞೆಗಳವರೆಗೂ ಎಲ್ಲ ವಿಧಿವಿಧಾನಗಳನ್ನು ನೆರವೇರಿಸಲಾಗಿತ್ತು. ಆದರೆ, ಪ್ರತಿಜ್ಞೆಗಳಿಗೂ ಕೆಲವೇ ಕ್ಷಣಗಳ ಮೊದಲು ವರನ ಕಡೆಯವರು ಬ್ರೆಝಾ ಕಾರು ಮತ್ತು ₹20 ಲಕ್ಷ ವರದಕ್ಷಿಣೆಗೆ ಬೇಡಿಕೆ ಇಟ್ಟರು. ಇದು ಮದುವೆ ಮುರಿದುಬೀಳಲು ಕಾರಣವಾಯಿತು.
ನಿಮ್ಮ ಕಾಮೆಂಟ್ ಬರೆಯಿರಿ