ವಾಷಿಂಗ್ಟನ್/ತೆಹ್ರಾನ್: ಪಶ್ಚಿಮ ಏಷ್ಯಾದಲ್ಲಿ ಯುದ್ಧ ಹನ್ನೊಂದನೇ ದಿನಕ್ಕೆ ಕಾಲಿಟ್ಟಿದ್ದು, ಅಮೆರಿಕ ಮತ್ತು ಇರಾನ್ ನಡುವಿನ ಸಂಘರ್ಷ ತಾರಕಕ್ಕೇರಿದೆ. ಮಂಗಳವಾರ ಇರಾನ್ನ ಸ್ಫೋಟಕಗಳನ್ನು ಇರಿಸುವ (mine-laying) 16 ನೌಕೆಗಳನ್ನು ಧ್ವಂಸಗೊಳಿಸಿರುವುದಾಗಿ ಅಮೆರಿಕ ಮಿಲಿಟರಿ ಘೋಷಿಸಿದೆ. ಇದಕ್ಕೆ ಪ್ರತಿಯಾಗಿ, ಈ ಭಾಗದಿಂದ ಶತ್ರು ರಾಷ್ಟ್ರಗಳಿಗೆ “ಒಂದು ಲೀಟರ್ ತೈಲವನ್ನೂ” ರಫ್ತು ಮಾಡಲು ಬಿಡುವುದಿಲ್ಲ ಎಂದು ಇರಾನ್ ಪ್ರತಿಜ್ಞೆ ಮಾಡಿದೆ.
ಜಗತ್ತಿನ ಶೇ. 20 ರಷ್ಟು ತೈಲ ಸರಬರಾಜಾಗುವ ಹಾರ್ಮುಜ್ ಜಲಸಂಧಿಯಲ್ಲಿ ಇರಾನ್ ಸ್ಫೋಟಕಗಳನ್ನು ಇರಿಸುತ್ತಿದೆ ಎಂಬ ಭೀತಿಯ ನಡುವೆ ಅಮೆರಿಕ ಈ ದಾಳಿ ನಡೆಸಿದೆ. ಆದರೆ, ಇರಾನ್ ಸ್ಫೋಟಕ ಇರಿಸಿರುವ ಬಗ್ಗೆ ಇನ್ನು ಯಾವುದೇ ವರದಿಗಳಿಲ್ಲ ಎಂದು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸಾಮಾಜಿಕ ಜಾಲತಾಣದಲ್ಲಿ ತಿಳಿಸಿದ್ದಾರೆ.
ಯುದ್ಧದ ಹಿನ್ನೆಲೆಯಲ್ಲಿ ಇರಾನ್ನಲ್ಲಿ ಕನಿಷ್ಠ 1,230 ಜನರು ಸಾವಿಗೀಡಾಗಿದ್ದಾರೆ. ಲೆಬನಾನ್ನಲ್ಲಿ 480 ಮತ್ತು ಇಸ್ರೇಲ್ನಲ್ಲಿ 12 ಜನರು ಮೃತಪಟ್ಟಿದ್ದಾರೆ ಎಂದು ಅಧಿಕೃತ ಮೂಲಗಳು ತಿಳಿಸಿವೆ.
ಇರಾನ್ ಎಚ್ಚರಿಕೆ:
ಇರಾನ್ ಸಂಸತ್ತಿನ ಸ್ಪೀಕರ್ ಮೊಹಮ್ಮದ್ ಬಾಘರ್ ಖಾಲಿಬಾಫ್, “ನಾವು ಕದನ ವಿರಾಮವನ್ನು ಬಯಸುತ್ತಿಲ್ಲ, ಆಕ್ರಮಣಕಾರರಿಗೆ ಸರಿಯಾದ ಏಟು ನೀಡಲಿದ್ದೇವೆ” ಎಂದು ಗುಡುಗಿದ್ದಾರೆ. ಅತ್ತ ಭದ್ರತಾ ಅಧಿಕಾರಿ ಅಲಿ ಲಾರಿಜಾನಿ ಅವರು ಟ್ರಂಪ್ಗೆ ನೇರ ಎಚ್ಚರಿಕೆ ನೀಡಿದ್ದಾರೆ.
ಗಲ್ಫ್ ರಾಷ್ಟ್ರಗಳ ಮೇಲೆ ಪರಿಣಾಮ: ಸೌದಿ ಅರೇಬಿಯಾ ತನ್ನ ವಾಯುನೆಲೆಗಳ ಮೇಲೆ ಇರಾನ್ ಉಡಾಯಿಸಿದ ಕ್ಷಿಪಣಿಗಳನ್ನು ಹೊಡೆದುರುಳಿಸಿದೆ. ಯುಎಇ (UAE) ಕೂಡ ಇರಾನ್ ದಾಳಿಯಿಂದ ತನ್ನ ದೇಶದಲ್ಲಿ ಆರು ಮಂದಿ ಸಾವಿಗೀಡಾಗಿದ್ದಾರೆ ಎಂದು ತಿಳಿಸಿದೆ. ಬಹ್ರೇನ್ನಲ್ಲಿ ವೈಮಾನಿಕ ದಾಳಿಯ ಸೈರನ್ಗಳು ಮೊಳಗುತ್ತಿವೆ.
ಜಾಗತಿಕ ತೈಲ ಮಾರುಕಟ್ಟೆಯ ಮೇಲೆ ಆತಂಕ
ಇರಾನ್ನ ರೆವಲ್ಯೂಷನರಿ ಗಾರ್ಡ್ ತೈಲ ರಫ್ತು ತಡೆಯುವುದಾಗಿ ಹೇಳಿರುವುದು ಜಾಗತಿಕ ಆರ್ಥಿಕತೆಯ ಮೇಲೆ ದೊಡ್ಡ ಪರಿಣಾಮ ಬೀರುವ ಸಾಧ್ಯತೆಯಿದೆ. ಸೌದಿ ಅರೇಬಿಯಾದ ‘ಅರಾಮ್ಕೊ’ ಸಂಸ್ಥೆಯು ತನ್ನ ತೈಲ ಟ್ಯಾಂಕರ್ಗಳ ಮಾರ್ಗವನ್ನು ಬದಲಿಸುತ್ತಿದೆ. “ಜಲಸಂಧಿಯಲ್ಲಿನ ಬಿಕ್ಕಟ್ಟು ದೀರ್ಘಕಾಲ ಮುಂದುವರಿದರೆ ಜಾಗತಿಕ ಆರ್ಥಿಕತೆಗೆ ಭಾರಿ ಹೊಡೆತ ಬೀಳಲಿದೆ” ಎಂದು ಅರಾಮ್ಕೊ ಸಿಇಒ ಎಚ್ಚರಿಸಿದ್ದಾರೆ.
ಯುದ್ಧದ ಭಯದಿಂದ ಲೆಬನಾನ್ನಲ್ಲಿ ಸುಮಾರು 6.6 ಲಕ್ಷಕ್ಕೂ ಹೆಚ್ಚು ಜನರು ನಿರಾಶ್ರಿತರಾಗಿದ್ದಾರೆ. ಬ್ರಿಟನ್ ಮತ್ತು ಅಮೆರಿಕದ ಸಾವಿರಾರು ನಾಗರಿಕರು ಗಲ್ಫ್ ಪ್ರದೇಶವನ್ನು ತೊರೆದು ತಮ್ಮ ದೇಶಗಳಿಗೆ ಮರಳುತ್ತಿದ್ದಾರೆ. ಬ್ರಿಟಿಷ್ ಏರ್ವೇಸ್ ಸೇರಿದಂತೆ ಹಲವು ವಿಮಾನಯಾನ ಸಂಸ್ಥೆಗಳು ಈ ಭಾಗಕ್ಕೆ ಹಾರಾಟವನ್ನು ಸ್ಥಗಿತಗೊಳಿಸಿವೆ.
ನಿಮ್ಮ ಕಾಮೆಂಟ್ ಬರೆಯಿರಿ