ಫ್ಲೋರಿಡಾ: ಬಾಹ್ಯಾಕಾಶ ಸಂಶೋಧನೆಯ ಇತಿಹಾಸದಲ್ಲಿ ಬುಧವಾರದ ದಿನವು ಹೊಸ ದಾಖಲೆಗೆ ಸಾಕ್ಷಿಯಾಯಿತು. ಸುಮಾರು ಐದು ದಶಕಗಳ ಸುದೀರ್ಘ ಕಾಯುವಿಕೆಯ ನಂತರ, ಮಾನವನನ್ನು ಮತ್ತೆ ಚಂದ್ರನ ಕಕ್ಷೆಗೆ ಕಳುಹಿಸುವ ನಾಸಾದ ಮಹತ್ವಾಕಾಂಕ್ಷೆಯ ‘ಆರ್ಟೆಮಿಸ್-2’ ಮಿಷನ್ಗೆ ಚಾಲನೆ ದೊರೆತಿದೆ. ಫ್ಲೋರಿಡಾದ ಕೆನಡಿ ಬಾಹ್ಯಾಕಾಶ ಕೇಂದ್ರದಿಂದ ಸಂಜೆ ಸುಮಾರು 6:35ಕ್ಕೆ ನಾಸಾದ ಬೃಹತ್ ಆರೆಂಜ್ ಮತ್ತು ಬಿಳಿ ಬಣ್ಣದ ಎಸ್ಎಲ್ಎಸ್ (SLS) ರಾಕೆಟ್ ನಾಲ್ವರು ಗಗನಯಾತ್ರಿಗಳನ್ನು ಹೊತ್ತು ಬಾಹ್ಯಾಕಾಶಕ್ಕೆ ಉಡಾವಣೆಗೊಂಡಿತು.
ಪ್ರಬಲ ಗರ್ಜನೆಯೊಂದಿಗೆ ರಾಕೆಟ್ ಉಡಾವಣೆಗೊಂಡಾಗ ಈ ಐತಿಹಾಸಿಕ ಕ್ಷಣವನ್ನು ವೀಕ್ಷಿಸಲು ಕೆನಡಿ ಬಾಹ್ಯಾಕಾಶ ಕೇಂದ್ರದ ಬಳಿ ಸುಮಾರು 4 ಲಕ್ಷಕ್ಕೂ ಅಧಿಕ ಜನರು ಸೇರಿದ್ದರು. ಅವರು ಈ ಐತಿಹಾಸಿಕ ಕ್ಷಣವನ್ನು ಸಂಭ್ರಮಿಸಿದರು.
ಈ ಕಾರ್ಯಾಚರಣೆಯು ಹಲವು ಕಾರಣಗಳಿಗಾಗಿ ಜಾಗತಿಕ ಮಟ್ಟದಲ್ಲಿ ಗಮನ ಸೆಳೆದಿದೆ. ಮೊದಲ ಬಾರಿಗೆ ಮಹಿಳೆಯೊಬ್ಬರು, ಕಪ್ಪು ವರ್ಣೀಯ ಗಗನಯಾತ್ರಿ ಹಾಗೂ ಅಮೆರಿಕೇತರ ಪ್ರಜೆಯೊಬ್ಬರು ಚಂದ್ರಯಾನದ ಭಾಗವಾಗಿದ್ದಾರೆ. ತಂಡದಲ್ಲಿ ಅಮೆರಿಕದ ರೀಡ್ ವೈಸ್ಮನ್, ವಿಕ್ಟರ್ ಗ್ಲೋವರ್ (ಚಂದ್ರಯಾನ ಕೈಗೊಂಡ ಮೊದಲ ಕಪ್ಪು ವರ್ಣೀಯ ವ್ಯಕ್ತಿ), ಕ್ರಿಸ್ಟಿನಾ ಕೋಚ್ (ಚಂದ್ರಯಾನ ಕೈಗೊಂಡ ಮೊದಲ ಮಹಿಳೆ) ಮತ್ತು ಕೆನಡಾದ ಜೆರೆಮಿ ಹ್ಯಾನ್ಸನ್ (ಚಂದ್ರಯಾನದ ಭಾಗವಾದ ಮೊದಲ ಕೆನಡಾ ಪ್ರಜೆ) ಇದ್ದಾರೆ. ಸುಮಾರು 10 ದಿನಗಳ ಕಾಲ ನಡೆಯಲಿರುವ ಈ ಪಯಣದಲ್ಲಿ ಅವರು ಚಂದ್ರನ ಸುತ್ತ ಪ್ರದಕ್ಷಿಣೆ ಹಾಕಿ ಬರಲಿದ್ದಾರೆ. ಈ ಗಗನಯಾತ್ರಿಗಳು ಚಂದ್ರನ ಮೇಲೆ ಇಳಿಯುವುದಿಲ್ಲ. ಬದಲಾಗಿ, ಚಂದ್ರನ ಕಕ್ಷೆಯಲ್ಲಿ ಸುತ್ತು ಹಾಕಿ ಭೂಮಿಯಿಂದ ಹಿಂದೆಂದೂ ಕಂಡಿರದ ದೂರಕ್ಕೆ ಪಯಣಿಸಲಿದ್ದಾರೆ.
ಇದು ಮಾನವ ಚಂದ್ರನ ಮೇಲೆ ಇಳಿಯುವ ಮುನ್ನ ನಡೆಸುತ್ತಿರುವ ಪ್ರಮುಖ ಪರೀಕ್ಷಾರ್ಥ ಪಯಣವಾಗಿದೆ. ಗಗನನೌಕೆಯ ಸುರಕ್ಷತೆ ಮತ್ತು ತಾಂತ್ರಿಕ ಕಾರ್ಯಕ್ಷಮತೆಯನ್ನು ಖಚಿತಪಡಿಸಿಕೊಳ್ಳುವುದು ಈ ಪಯಣದ ಪ್ರಮುಖ ಉದ್ದೇಶವಾಗಿದ್ದು, ಈ ಯಶಸ್ಸು 2028ರಲ್ಲಿ ಮಾನವನನ್ನು ಚಂದ್ರನ ಮೇಲೆ ಇಳಿಸುವ ಯೋಜನೆಗೆ ಹಾದಿ ಮಾಡಿಕೊಡಲಿದೆ.ಅಲ್ಲದೆ, ಚಂದ್ರನ ಮೇಲೆ ಮುಂದಿನ ದಿನಗಳಲ್ಲಿ ಶಾಶ್ವತ ಸಂಶೋಧನಾ ಕೇಂದ್ರ ಸ್ಥಾಪಿಸುವ ನಿಟ್ಟಿನಲ್ಲಿ ಇದು ಮೊದಲ ಹೆಜ್ಜೆಯಾಗಿದೆ.
ಉಡಾವಣೆಗೂ ಮುನ್ನ ಬಾಹ್ಯಾಕಾಶ ನೌಕೆಯಿಂದ ಸಂದೇಶ ರವಾನಿಸಿದ ಕೆನಡಾದ ಜೆರೆಮಿ ಹ್ಯಾನ್ಸನ್, “ನಾವು ಇಡೀ ಮಾನವಕುಲದ ಪರವಾಗಿ ಈ ಪ್ರಯಾಣ ಬೆಳೆಸುತ್ತಿದ್ದೇವೆ” ಎಂದು ಭಾವುಕರಾಗಿ ನುಡಿದರು. ಲಾಂಚ್ ಡೈರೆಕ್ಟರ್ ಚಾರ್ಲಿ ಬ್ಲ್ಯಾಕ್ವೆಲ್-ಥಾಂಪ್ಸನ್ ಅವರು ಗಗನಯಾತ್ರಿಗಳಿಗೆ ಹಾರೈಸುತ್ತಾ, ಈ ಮಿಷನ್ ನವ ಪೀಳಿಗೆಯ ಕನಸುಗಳು ಮತ್ತು ಧೈರ್ಯದ ಸಂಕೇತವಾಗಿದೆ ಎಂದು ತಿಳಿಸಿದರು.
ಆರಂಭದಲ್ಲಿ ಈ ಯೋಜನೆ ಹಲವು ಬಾರಿ ವಿಳಂಬವಾಗಿದ್ದರೂ ಮತ್ತು ವೆಚ್ಚದ ಮಿತಿ ಮೀರಿದ್ದರೂ, ಅಂತಿಮವಾಗಿ ಬುಧವಾರದ ಉಡಾವಣೆ ಯಶಸ್ವಿಯಾಗಿರುವುದು ಬಾಹ್ಯಾಕಾಶ ವಿಜ್ಞಾನಿಗಳಿಗೆ ಹೊಸ ಉತ್ಸಾಹ ತುಂಬಿದೆ.
ಈ ಐತಿಹಾಸಿಕ ಘಟನೆಯು ಕೇವಲ ವೈಜ್ಞಾನಿಕ ಸಾಧನೆಯಷ್ಟೇ ಅಲ್ಲದೆ ರಾಜಕೀಯವಾಗಿಯೂ ಮಹತ್ವ ಪಡೆದುಕೊಂಡಿದೆ. ಚೀನಾ 2030ರ ಒಳಗಾಗಿ ಚಂದ್ರನ ಮೇಲೆ ಮಾನವನನ್ನು ಇಳಿಸುವ ಗುರಿ ಹೊಂದಿದ್ದು, ಅದಕ್ಕೆ ಪ್ರತಿಯಾಗಿ ಅಮೆರಿಕ ತನ್ನ ಪ್ರಾಬಲ್ಯವನ್ನು ಸಾಬೀತುಪಡಿಸಲು ಈ ವೇಗದ ಹೆಜ್ಜೆ ಇಟ್ಟಿದೆ. ಮಧ್ಯಪ್ರಾಚ್ಯದಲ್ಲಿ ನಡೆಯುತ್ತಿರುವ ಯುದ್ಧ ಮತ್ತು ಇಂಧನ ಬಿಕ್ಕಟ್ಟಿನ ನಡುವೆಯೂ, ಬಾಹ್ಯಾಕಾಶ ಕ್ಷೇತ್ರದಲ್ಲಿ ಅಮೆರಿಕ ತನ್ನ ಅಧಿಪತ್ಯವನ್ನು ಮುಂದುವರಿಸಿದೆ ಎಂದು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸಾಮಾಜಿಕ ಜಾಲತಾಣದಲ್ಲಿ ಹರ್ಷ ವ್ಯಕ್ತಪಡಿಸಿದ್ದಾರೆ. ಬಾಹ್ಯಾಕಾಶದಲ್ಲಿ ಅಮೆರಿಕ ಗೆಲ್ಲುತ್ತಿದೆ ಮತ್ತು ಇಡೀ ಜಗತ್ತು ನಮ್ಮ ಸಾಧನೆಯನ್ನು ಗಮನಿಸುತ್ತಿದೆ ಎಂದು ಅವರು ಸಂದೇಶ ನೀಡಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ