ವಾಷಿಂಗ್ಟನ್ : ಪ್ರಸ್ತುತ ನಡೆಯುತ್ತಿರುವ ಇರಾನ್ ಹಾಗೂ ಅಮೆರಿಕ ಸಂಘರ್ಷದಲ್ಲಿ ಅಮೆರಿಕದ ಮಿಲಿಟರಿ ನೆಲೆಗಳನ್ನು ಟಾರ್ಗೆಟ್ ಮಾಡಲು ಇರಾನ್ 2024ರಲ್ಲಿ ರಹಸ್ಯವಾಗಿ ಖರೀದಿಸಿದ್ದ ಚೀನಾದ ಗೂಢಚಾರಿ ಉಪಗ್ರಹವನ್ನು ಬಳಸಿಕೊಂಡಿದೆ ಎಂದು ‘ಫೈನಾನ್ಷಿಯಲ್ ಟೈಮ್ಸ್’ (FT) ಬುಧವಾರ ವರದಿ ಮಾಡಿದೆ.
ಚೀನಾದ ‘ಅರ್ಥ್ ಐ’ (Earth Eye Co) ಕಂಪನಿಯು ನಿರ್ಮಿಸಿ ಉಡಾವಣೆ ಮಾಡಿದ್ದ TEE-01B ಉಪಗ್ರಹವನ್ನು ಇರಾನ್ನ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ (IRGC) 2024ರ ಅಂತ್ಯದಲ್ಲಿ ಖರೀದಿಸಿತ್ತು ಎಂದು ಸೋರಿಕೆಯಾದ ಮಿಲಿಟರಿ ದಾಖಲೆಗಳು ತಿಳಿಸಿವೆ.
ಅಮೆರಿಕ ನೆಲೆಗಳ ಮೇಲೆ ನಿಗಾ
ಇರಾನ್ ಮಿಲಿಟರಿ ಕಮಾಂಡರ್ಗಳು ಈ ಉಪಗ್ರಹದ ಮೂಲಕ ಸೌದಿ ಅರೇಬಿಯಾದ ಪ್ರಿನ್ಸ್ ಸುಲ್ತಾನ್ ವಾಯುನೆಲೆ, ಜೋರ್ಡಾನ್ನ ಮುವಾಫಕ್ ಸಾಲ್ಟಿ ವಾಯುನೆಲೆ ಮತ್ತು ಬಹ್ರೇನ್ನಲ್ಲಿರುವ ಅಮೆರಿಕದ ನೌಕಾಪಡೆಯ ನೆಲೆಗಳ ಮೇಲೆ ನಿಗಾ ಇರಿಸಿದ್ದರು.
ಮಾರ್ಚ್ ತಿಂಗಳಲ್ಲಿ ಡ್ರೋನ್ ಮತ್ತು ಕ್ಷಿಪಣಿ ದಾಳಿ ನಡೆಯುವ ಮೊದಲು ಮತ್ತು ನಂತರ ಈ ನೆಲೆಗಳ ಹೈ-ರೆಸಲ್ಯೂಶನ್ ಚಿತ್ರಗಳನ್ನು ಉಪಗ್ರಹದ ಮೂಲಕ ಪಡೆಯಲಾಗಿತ್ತು.
ಮಾರ್ಚ್ 14 ರಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ತಮ್ಮ ವಾಯುನೆಲೆಯ ಮೇಲೆ ದಾಳಿಯಾಗಿರುವುದನ್ನು ಖಚಿತಪಡಿಸಿದ್ದರು. ಈ ಒಪ್ಪಂದದ ಭಾಗವಾಗಿ, ಇರಾನ್ ಚೀನಾದ ಬೀಜಿಂಗ್ ಮೂಲದ ‘ಎಂಪೋಸ್ಯಾಟ್’ (Emposat) ಕಂಪನಿಯ ಭೂಗತ ಕೇಂದ್ರಗಳ ನೆಟ್ವರ್ಕ್ ಅನ್ನು ಬಳಸಲು ಅನುಮತಿ ಪಡೆದಿತ್ತು.
ಇರಾನ್ -ಅಮೆರಿಕ ಯುದ್ಧ
ಫೆಬ್ರವರಿ 28 ರಿಂದ ಇರಾನ್ನ ಬ್ಯಾಲಿಸ್ಟಿಕ್ ಕ್ಷಿಪಣಿ ಮತ್ತು ಪರಮಾಣು ಕಾರ್ಯಕ್ರಮಗಳನ್ನು ನಾಶಪಡಿಸಲು ಅಮೆರಿಕ ಮತ್ತು ಇಸ್ರೇಲ್ ಜಂಟಿ ಬಾಂಬ್ ದಾಳಿಗಳನ್ನು ಆರಂಭಿಸಿದ್ದವು. ಇದಕ್ಕೆ ಪ್ರತಿಕ್ರಿಯೆಯಾಗಿ ಇರಾನ್ ಕೂಡ ಕ್ಷಿಪಣಿ ದಾಳಿಗಳನ್ನು ನಡೆಸಿತ್ತು ಮತ್ತು ಹಾರ್ಮುಜ್ ಜಲಸಂಧಿಯನ್ನು (Strait of Hormuz) ಬಂದ್ ಮಾಡಿತ್ತು.
ಕಳೆದ ವಾರವಷ್ಟೇ ಎರಡು ವಾರಗಳ ಕದನ ವಿರಾಮ ಘೋಷಣೆಯಾದ ನಂತರ ಈ ಸಂಘರ್ಷ ತಾತ್ಕಾಲಿಕವಾಗಿ ನಿಂತಿದೆ. ಇದೇ ವೇಳೆ, ಇರಾನ್ ಜೊತೆ ರಷ್ಯಾ ಕೂಡ ತನ್ನ ಗೂಢಚಾರಿ ಉಪಗ್ರಹಗಳ ಮಾಹಿತಿಯನ್ನು ಹಂಚಿಕೊಂಡಿದೆ ಎಂದು ವರದಿಗಳು ಹೇಳಿವೆ. ಈ ಕುರಿತು ಅಮೆರಿಕದ ಶ್ವೇತಭವನ, ಸಿಐಎ ಅಥವಾ ಚೀನಾದ ವಿದೇಶಾಂಗ ಸಚಿವಾಲಯವು ತಕ್ಷಣಕ್ಕೆ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.
ನಿಮ್ಮ ಕಾಮೆಂಟ್ ಬರೆಯಿರಿ