ವಾಷಿಂಗ್ಟನ್: ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ರಾಜಕೀಯ ವಿಶ್ಲೇಷಕ ಮತ್ತು ರೇಡಿಯೋ ನಿರೂಪಕ ಮೈಕೆಲ್ ಸ್ಯಾವೇಜ್ ಅವರ ಪಾಡ್ಕಾಸ್ಟ್ ಅನ್ನು ಮರು-ಹಂಚಿಕೊಂಡಿದ್ದಾರೆ (Repost). ಈ ಪಾಡ್ಕಾಸ್ಟ್ನಲ್ಲಿ ಸ್ಯಾವೇಜ್ ಅವರು ಭಾರತ, ಚೀನಾ ಮತ್ತು ಇತರ ರಾಷ್ಟ್ರಗಳನ್ನು “ನರಕದ ಕೂಪಗಳು” (Hell-holes) ಎಂದು ಕರೆದಿದ್ದಾರೆ.
ಅಮೆರಿಕದ ಜನ್ಮಸಿದ್ಧ ಪೌರತ್ವ ಕಾಯ್ದೆಯಲ್ಲಿ (Birthright citizenship law) ಬದಲಾವಣೆ ತರಬೇಕೆಂದು ಒತ್ತಾಯಿಸುವ ಸಂದರ್ಭದಲ್ಲಿ ಜನಾಂಗೀಯ ನಿಂದನೆ ಮಾಡಿರುವ ಸ್ಯಾವೇಜ್, ಈ ಎರಡು ಏಷ್ಯಾದ ರಾಷ್ಟ್ರಗಳ ಜನರು ಅಮೆರಿಕಕ್ಕೆ ಬರುವುದು “ಒಂಬತ್ತನೇ ತಿಂಗಳಲ್ಲಿ ಮಗುವನ್ನು ಹೆರಲು”ಎಂದು ಹೇಳಿದ್ದಾರೆ. ಮತ್ತು ಇಲ್ಲಿನ ಕಾನೂನು ಅವರನ್ನು “ತತ್ಕ್ಷಣದ” ಅಮೆರಿಕನ್ ನಾಗರಿಕರನ್ನಾಗಿ ಮಾಡುತ್ತದೆ ಎಂದು ಆರೋಪಿಸಿದ್ದಾರೆ.
ರಿಪಬ್ಲಿಕನ್ ಪಕ್ಷದ ಅಧ್ಯಕ್ಷರಾಗಿರುವ ಟ್ರಂಪ್ ಅವರು ಸ್ಯಾವೇಜ್ ಅವರ ‘ಸ್ಯಾವೇಜ್ ನೇಷನ್’ ಪಾಡ್ಕಾಸ್ಟ್ನ ಪ್ರತಿಲೇಖನ (Transcript) ಮತ್ತು ವಿಡಿಯೋವನ್ನೂ ಹಂಚಿಕೊಂಡಿದ್ದಾರೆ. ಇದರಲ್ಲಿ ಸ್ಯಾವೇಜ್ ಅವರು ಜನ್ಮಸಿದ್ಧ ಪೌರತ್ವದ ಬಗ್ಗೆ ಅಮೆರಿಕದ ಸುಪ್ರೀಂ ಕೋರ್ಟ್ ನಡೆಸುತ್ತಿರುವ ವಾದಗಳನ್ನು ತೀವ್ರವಾಗಿ ಟೀಕಿಸಿದ್ದಾರೆ.
ಅಮೆರಿಕನ್ ನಾಗರಿಕರಲ್ಲದವರಿಗೆ ಇಲ್ಲಿ ಜನಿಸುವ ಮಕ್ಕಳಿಗೆ ತಾನಾಗಿಯೇ ಪೌರತ್ವ ಸಿಗುವ ಕ್ರಮವನ್ನು ವಿರೋಧಿಸಿರುವ ಅವರು, ಈ ವಿಷಯವನ್ನು ನ್ಯಾಯಾಲಯಗಳಿಗೆ ಬಿಡುವ ಬದಲು ರಾಷ್ಟ್ರೀಯ ಜನಮತಸಂಗ್ರಹ (Referendum) ನಡೆಸಬೇಕೆಂದು ಆಗ್ರಹಿಸಿದ್ದಾರೆ. “ಇಲ್ಲಿ ಜನಿಸುವ ಮಗು ತಕ್ಷಣವೇ ನಾಗರಿಕನಾಗುತ್ತದೆ, ನಂತರ ಅವರು ಚೀನಾ, ಭಾರತ ಅಥವಾ ಭೂಮಿಯ ಮೇಲಿನ ಇನ್ನಾವುದೋ ನರಕದ ಕೂಪಗಳಿಂದ ತಮ್ಮ ಇಡೀ ಕುಟುಂಬವನ್ನೇ ಇಲ್ಲಿಗೆ ಕರೆತರುತ್ತದೆ,” ಎಂದು ಅವರು ಬರೆದಿದ್ದಾರೆ. ಅಲ್ಲದೆ, ಭಾರತೀಯ ಮತ್ತು ಚೀನೀ ವಲಸಿಗರನ್ನು “ಲ್ಯಾಪ್ಟಾಪ್ ಹಿಡಿದ ದರೋಡೆಕೋರರು” (Gangsters with laptops) ಮತ್ತು “ನಮ್ಮ ಧ್ವಜವನ್ನು ತುಳಿದವರು” ಎಂದು ಸ್ಯಾವೇಜ್ ಬಣ್ಣಿಸಿದ್ದಾರೆ.
“ನನ್ನ ವಿನಮ್ರವಲ್ಲದ ಅಭಿಪ್ರಾಯವೇನೆಂದರೆ, ಎಲ್ಲಾ ಮಾಫಿಯಾ ಕುಟುಂಬಗಳು ಒಟ್ಟಾಗಿ ಮಾಡಿದ ಹಾನಿಗಿಂತ ಹೆಚ್ಚಿನ ಹಾನಿಯನ್ನು ಈ ಜನರು ಈ ದೇಶಕ್ಕೆ ಮಾಡಿದ್ದಾರೆ. ಲ್ಯಾಪ್ಟಾಪ್ ಹಿಡಿದ ದರೋಡೆಕೋರರಿವರು. ನಮ್ಮನ್ನು ಕುರುಡರನ್ನಾಗಿ ಮಾಡಿ ಲೂಟಿ ಮಾಡಿದ್ದಾರೆ, ನಮ್ಮನ್ನು ಎರಡನೇ ದರ್ಜೆಯ ನಾಗರಿಕರಂತೆ ನಡೆಸಿಕೊಂಡಿದ್ದಾರೆ, ಮೂರನೇ ಜಗತ್ತಿನ ರಾಷ್ಟ್ರಗಳು ವಿಜೃಂಭಿಸುವಂತೆ ಮಾಡಿದ್ದಾರೆ ಮತ್ತು ನಮ್ಮ ಧ್ವಜವನ್ನು ತುಳಿದಿದ್ದಾರೆ,” ಎಂದು ಅವರು ಕಿಡಿಕಾರಿದ್ದಾರೆ.
ಕ್ಯಾಲಿಫೋರ್ನಿಯಾದ ಹೈ-ಟೆಕ್ ಕಂಪನಿಗಳಲ್ಲಿ “ಬಿಳಿ ವರ್ಣೀಯರಿಗೆ” ಕೆಲಸ ಸಿಗುವ ಸಾಧ್ಯತೆ ಶೂನ್ಯವಾಗಿದೆ ಎಂದು ತನಗೆ ಅರಿವಾಗುವವರೆಗೆ ತಾನು “ಭಾರತದಲ್ಲಿರುವ ಭಾರತೀಯರ ದೊಡ್ಡ ಬೆಂಬಲಿಗನಾಗಿದ್ದೆ” ಎಂದು ಸ್ಯಾವೇಜ್ ಹೇಳಿಕೊಂಡಿದ್ದಾರೆ. “ನೀವು ಭಾರತ ಅಥವಾ ಚೀನಾದವರೇ ಆಗಿರಬೇಕು, ಏಕೆಂದರೆ ಇಲ್ಲಿನ ಬಹುತೇಕ ಆಂತರಿಕ ವ್ಯವಸ್ಥೆಗಳು ಭಾರತೀಯರು ಮತ್ತು ಚೀನಿಯರಿಂದಲೇ ನಡೆಸಲ್ಪಡುವಂತೆ ರೂಪಿತವಾಗಿವೆ,” ಎಂಬುದು ಅವರ ವಾದ.
ಪ್ರಸ್ತುತ ಪೌರತ್ವ ವ್ಯವಸ್ಥೆಯನ್ನು “ಬರ್ತ್ ಟೂರಿಸಂ” (ಮಗು ಹೆರಲೆಂದೇ ಪ್ರವಾಸ ಬರುವುದು) ಮತ್ತು ಕಲ್ಯಾಣ ಯೋಜನೆಗಳ ದುರುಪಯೋಗಕ್ಕಾಗಿ ಬಳಸಿಕೊಳ್ಳಲಾಗುತ್ತಿದೆ ಎಂದು ಸ್ಯಾವೇಜ್ ಆರೋಪಿಸಿದ್ದಾರೆ. ಅಲ್ಲದೆ, ಆಧುನಿಕ ವಲಸೆಯ ಹಿನ್ನೆಲೆಯಲ್ಲಿ ಅಮೆರಿಕದ ಸಂವಿಧಾನವು ಹಳೆಯದಾಗಿದೆ ಎಂದು ಅವರು ವಾದಿಸಿದ್ದಾರೆ. “ಸಂವಿಧಾನವನ್ನು ಬರೆದಾಗ ವಿಮಾನ ಪ್ರಯಾಣವಿರಲಿಲ್ಲ, ಟೆಲಿವಿಷನ್, ಇಂಟರ್ನೆಟ್ ಅಥವಾ ರೇಡಿಯೋ ಕೂಡ ಇರಲಿಲ್ಲ. ಜನರು ಗರ್ಭಾವಸ್ಥೆಯ ಒಂಬತ್ತನೇ ತಿಂಗಳಲ್ಲಿ ವಿಮಾನದ ಮೂಲಕ ಇಲ್ಲಿಗೆ ಬರುತ್ತಿರುವಾಗ, ಹಳೆಯ ವಾದಗಳು ಎಷ್ಟು ಪ್ರಸ್ತುತವಾಗುತ್ತವೆ?” ಎಂದು ಅವರು ಪ್ರಶ್ನಿಸಿದ್ದಾರೆ.
ಜನ್ಮಸಿದ್ಧ ಪೌರತ್ವದ ವಿರುದ್ಧ ಟ್ರಂಪ್ ಸಮರ
ಸಿಎನ್ಬಿಸಿ (CNBC) ಗೆ ನೀಡಿದ ಸಂದರ್ಶನದಲ್ಲಿ, “ಅಮೆರಿಕವನ್ನು ಹೊರತುಪಡಿಸಿ ವಿಶ್ವದ ಬೇರೆ ಯಾವ ದೇಶವೂ ಜನ್ಮಸಿದ್ಧ ಪೌರತ್ವವನ್ನು ನೀಡುವುದಿಲ್ಲ” ಎಂಬ ಹೇಳಿಕೆ ನೀಡಿದ ಮರುದಿನವೇ ಟ್ರಂಪ್ ಅವರು ಸ್ಯಾವೇಜ್ ಅವರ ಈ ಜನಾಂಗೀಯ ನಿಂದನೆಯನ್ನು ತಮ್ಮ ‘ಟ್ರೂತ್ ಸೋಶಿಯಲ್’ (Truth Social) ವೇದಿಕೆಯಲ್ಲಿ ಹಂಚಿಕೊಂಡಿದ್ದಾರೆ.
ವಾಸ್ತವದಲ್ಲಿ, ಅಮೆರಿಕದ ನೆರೆಹೊರೆಯ ಕೆನಡಾ ಮತ್ತು ಮೆಕ್ಸಿಕೋ ಸೇರಿದಂತೆ ಸುಮಾರು ಮೂರು ಡಜನ್ ದೇಶಗಳು ಮತ್ತು ದಕ್ಷಿಣ ಅಮೆರಿಕದ ಬಹುತೇಕ ರಾಷ್ಟ್ರಗಳು ತಮ್ಮ ಮಣ್ಣಿನಲ್ಲಿ ಜನಿಸಿದವರಿಗೆ ಸ್ವಯಂಚಾಲಿತವಾಗಿ ಪೌರತ್ವವನ್ನು ನೀಡುತ್ತವೆ.
ಅಮೆರಿಕದಲ್ಲಿ ಜನ್ಮಸಿದ್ಧ ಪೌರತ್ವವನ್ನು ಕೊನೆಗೊಳಿಸಬೇಕೆಂದು ಟ್ರಂಪ್ ಬಹಳ ಕಾಲದಿಂದ ಒತ್ತಾಯಿಸುತ್ತಿದ್ದಾರೆ. ಜನವರಿ 2025 ರಲ್ಲಿ ಎರಡನೇ ಬಾರಿಗೆ ಅಧಿಕಾರ ವಹಿಸಿಕೊಂಡ ನಂತರ, ಟ್ರಂಪ್ ಅವರು ನಿರ್ದಿಷ್ಟ ಸಂದರ್ಭಗಳಲ್ಲಿ ಅಮೆರಿಕದಲ್ಲಿ ಜನಿಸಿದವರಿಗೆ ಸ್ವಯಂಚಾಲಿತವಾಗಿ ಪೌರತ್ವ ನೀಡುವುದನ್ನು ನಿಲ್ಲಿಸಲು ಕಾರ್ಯಕಾರಿ ಆದೇಶಕ್ಕೆ (Executive Order) ಸಹಿ ಹಾಕಿದ್ದರು.
ಆದಾಗ್ಯೂ, ಅಮೆರಿಕದ ಸಂವಿಧಾನದ 14ನೇ ತಿದ್ದುಪಡಿಯು ಜನ್ಮಸಿದ್ಧ ಪೌರತ್ವವನ್ನು ಖಾತರಿಪಡಿಸುತ್ತದೆ ಎಂಬುದು ಕಾನೂನು ತಜ್ಞರ ಒಮ್ಮತದ ಅಭಿಪ್ರಾಯವಾಗಿದೆ. ಈ ವಿಷಯವು ಸದ್ಯ ಸುಪ್ರೀಂ ಕೋರ್ಟ್ನಲ್ಲಿದೆ.
ಈ ತಿಂಗಳ ಆರಂಭದಲ್ಲಿ, ಸುಪ್ರೀಂ ಕೋರ್ಟ್ ಟ್ರಂಪ್ ಅವರ ಕಾರ್ಯಕಾರಿ ಆದೇಶವನ್ನು ಪ್ರಶ್ನಿಸುವ ‘ಟ್ರಂಪ್ ವರ್ಸಸ್ ಬಾರ್ಬರಾ’ ಪ್ರಕರಣದ ವಾದಗಳನ್ನು ಆಲಿಸಿದೆ.
ಈ ಕುರಿತು ಬರಲಿರುವ ತೀರ್ಪಿನ ಬಗ್ಗೆ ಮಾತನಾಡಿದ ಟ್ರಂಪ್, “ಒಂದು ವೇಳೆ ಅವರು ಜನ್ಮಸಿದ್ಧ ಪೌರತ್ವದ ವಿಷಯದಲ್ಲಿ ನಮ್ಮ ದೇಶದ ವಿರುದ್ಧ ತೀರ್ಪು ನೀಡಿದರೆ (ಅವರು ಹಾಗೆಯೇ ಮಾಡುವ ಸಾಧ್ಯತೆಯಿದೆ), ಅದು ಅಮೆರಿಕಕ್ಕೆ ಭಾರಿ ಹಣಕಾಸಿನ ನಷ್ಟವನ್ನುಂಟು ಮಾಡುತ್ತದೆ. ಆದರೆ ಅದಕ್ಕಿಂತ ಮುಖ್ಯವಾಗಿ, ಅಮೆರಿಕ ತನ್ನ ಘನತೆಯನ್ನು (DIGNITY) ಕಳೆದುಕೊಳ್ಳುತ್ತದೆ!” ಎಂದು ಹೇಳಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ