ನವದೆಹಲಿ: ಭಾರತ ಮತ್ತು ಅಮೆರಿಕದ ಆರೋಗ್ಯ ಸೇವೆಗಳ ವೆಚ್ಚದ ನಡುವಿನ ಭಾರೀ ವ್ಯತ್ಯಾಸವನ್ನು ತೋರಿಸಿದ ಅಮೆರಿಕದ ಮಹಿಳೆಯೊಬ್ಬರ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಗಮನ ಸೆಳೆದಿದೆ. ಇನ್ಸ್ಟಾಗ್ರಾಂನಲ್ಲಿ “Indian vs American Healthcare” ಎಂಬ ಶೀರ್ಷಿಕೆಯಲ್ಲಿ ವಿಡಿಯೊ ಹಂಚಿಕೊಂಡಿರುವ ಲಿಜ್ (Liz) ಎಂಬ ಮಹಿಳೆ, ಅಮೆರಿಕದಲ್ಲಿ ಆರೋಗ್ಯ ಸೇವೆಗಳ ಹೆಸರಿನಲ್ಲಿ ಜನರನ್ನು “ದರೋಡೆ” ಮಾಡಲಾಗುತ್ತಿದೆ ಎಂದು ಆರೋಪಿಸಿದ್ದಾರೆ.
ತಮ್ಮ ಅತ್ತೆಯ ಆರೋಗ್ಯ ಸಮಸ್ಯೆಯನ್ನು ಉದಾಹರಣೆಯಾಗಿ ವಿವರಿಸಿರುವ ಲಿಜ್, ರಕ್ತ ಕ್ಯಾನ್ಸರ್ನ ಒಂದು ವಿಧದಿಂದ ಬಳಲುತ್ತಿರುವ ತಮ್ಮ ಅತ್ತೆ ರೆವ್ಲಿಮಿಡ್ (Revlimid) ಎಂಬ ಔಷಧಿಯನ್ನು ಸೇವಿಸುತ್ತಿದ್ದಾರೆ ಎಂದು ತಿಳಿಸಿದ್ದಾರೆ. ಅಮೆರಿಕದಲ್ಲಿ ಈ ಔಷಧಿಯ ಒಂದು ಮಾತ್ರೆಗೆ ಸುಮಾರು 900 ಡಾಲರ್ (ಸುಮಾರು ₹85,000) ವೆಚ್ಚವಾಗುತ್ತದೆ ಎಂದು ಹೇಳಿರುವ ಅವರು, ಭಾರತದಲ್ಲಿ ಇದೇ ಔಷಧಿಯ ಜೆನೆರಿಕ್ (Generic) ಪರ್ಯಾಯವು ₹35 ರಿಂದ ₹300ರೊಳಗೆ ಲಭ್ಯವಿದ್ದು, ಇದು ಅಮೆರಿಕನ್ ಡಾಲರ್ನಲ್ಲಿ ಸುಮಾರು 30 ಸೆಂಟ್ನಿಂದ 3 ಡಾಲರ್ ವರೆಗೆ ಮಾತ್ರ ವೆಚ್ಚವಾಗುತ್ತದೆ ಎಂದು ಹೇಳಿದ್ದಾರೆ.
“ಭಾರತದಲ್ಲಿ ವಿಶ್ವದಲ್ಲೇ ಅತ್ಯಂತ ಕಡಿಮೆ ಬೆಲೆಗೆ ಔಷಧಿಗಳು ದೊರೆಯುತ್ತವೆ. ನನ್ನ ಅತ್ತೆಗೆ ಒಂದು ರೀತಿಯ ರಕ್ತ ಕ್ಯಾನ್ಸರ್ ಇದೆ. ಅವರು ರೆವ್ಲಿಮಿಡ್ ಎಂಬ ಔಷಧಿಯನ್ನು ಸೇವಿಸುತ್ತಿದ್ದಾರೆ. ಅಮೆರಿಕದಲ್ಲಿ ಒಂದು ಮಾತ್ರೆಗೆ 900 ಡಾಲರ್, ಅಂದರೆ ಸುಮಾರು ₹85,000 ವೆಚ್ಚವಾಗುತ್ತದೆ. ಆದರೆ ಭಾರತದಲ್ಲಿ ಇದೇ ಔಷಧಿಯ ಬೆಲೆ ₹35ರಿಂದ ₹300ರಷ್ಟಿದೆ,” ಎಂದು ಲಿಜ್ ವಿಡಿಯೊದಲ್ಲಿ ಹೇಳಿದ್ದಾರೆ.
ಇದರ ಜೊತೆಗೆ, ಭಾರತದಲ್ಲಿ ಜನರಿಗೆ ಕೈಗೆಟುಕುವ ದರದಲ್ಲಿ ಆರೋಗ್ಯ ಸೇವೆ ಮತ್ತು ಔಷಧಿಗಳು ದೊರೆಯುತ್ತವೆ. ಆದರೆ ಅಮೆರಿಕದಲ್ಲಿ ಜನರನ್ನು ಅನ್ಯಾಯವಾಗಿ ದುಬಾರಿ ಚಿಕಿತ್ಸಾ ವೆಚ್ಚದ ಮೂಲಕ ಶೋಷಿಸಲಾಗುತ್ತಿದೆ ಎಂದು ಅವರು ಟೀಕಿಸಿದ್ದಾರೆ. ಬೆಲೆಗಳಲ್ಲಿನ ಈ ದೊಡ್ಡ ಅಂತರವು ಎರಡು ದೇಶಗಳ ಆರೋಗ್ಯ ವ್ಯವಸ್ಥೆಗಳ ನಡುವಿನ ವ್ಯತ್ಯಾಸವನ್ನು ಪ್ರತಿಬಿಂಬಿಸುತ್ತದೆ ಎಂದು ಲಿಜ್ ಹೇಳಿದ್ದಾರೆ.
ಭಾರತವು ತನ್ನ ಜನರಿಗೆ ಕೈಗೆಟುಕುವ ಆರೋಗ್ಯ ಸೇವೆಯನ್ನು ಒದಗಿಸುತ್ತಿದೆ ಎಂದು ಲಿಜ್ ಹೇಳಿದ್ದಾರೆ. ಆದರೆ ಅಮೆರಿಕಾದಲ್ಲಿ ಹಾಗಿಲ್ಲ. ಅಮೆರಿಕದಲ್ಲಿ, ನಮ್ಮನ್ನು ದೋಚಲಾಗುತ್ತಿದೆ” ಎಂದು ಅವರು ಹೇಳಿದ್ದಾರೆ.
ಲಿಜ್ ಅವರ ಈ ವಿಡಿಯೊಗೆ ಇದುವರೆಗೆ 7.72 ಲಕ್ಷಕ್ಕೂ ಹೆಚ್ಚು ವೀಕ್ಷಣೆಗಳು ಲಭಿಸಿದ್ದು, ನೂರಾರು ಮಂದಿ ಸಾಮಾಜಿಕ ಜಾಲತಾಣ ಬಳಕೆದಾರರು ಪ್ರತಿಕ್ರಿಯೆ ನೀಡಿದ್ದಾರೆ.
ಲಿಜ್ ಮಾತ್ರವಲ್ಲ, ಅಮೆರಿಕದ ಆರೋಗ್ಯ ವ್ಯವಸ್ಥೆಯ ದುಬಾರಿ ವೆಚ್ಚದ ವಿರುದ್ಧ ಧ್ವನಿ ಎತ್ತಿರುವ ಮತ್ತೊಬ್ಬ ಅಮೆರಿಕದ ಮಹಿಳೆ ವಿಕ್ಟೋರಿಯಾ (Victoria) ಕೂಡ ಇತ್ತೀಚೆಗೆ ಸಾಮಾಜಿಕ ಜಾಲತಾಣದಲ್ಲಿ ತಮ್ಮ ಅನುಭವ ಹಂಚಿಕೊಂಡಿದ್ದರು.
ತಮಗೆ ಅಗತ್ಯವಿದ್ದ ಔಷಧಿಯ ಬೆಲೆ ಅಮೆರಿಕದಲ್ಲಿ ಸುಮಾರು 1,000 ಡಾಲರ್ ಆಗಿದ್ದು, ವಿಮಾ ಕಂಪನಿಯು ಅದರ ವೆಚ್ಚವನ್ನು ಭರಿಸಲು ನಿರಾಕರಿಸಿದ್ದರಿಂದ ತಾವು ಭಾರೀ ಆರ್ಥಿಕ ಹೊರೆ ಎದುರಿಸಬೇಕಾಯಿತು ಎಂದು ಅವರು ತಿಳಿಸಿದ್ದಾರೆ. ಬಳಿಕ ಭಾರತದಲ್ಲಿನ ಔಷಧ ತಯಾರಿಕಾ ಸಂಸ್ಥೆಯಿಂದ ಅದೇ ಔಷಧಿಯನ್ನು ಕೇವಲ 25 ಡಾಲರ್ಗೆ ಖರೀದಿಸಿದ ಬಳಿಕ ತನಗೆ ಆರ್ಥಿಕ ಪರಿಹಾರ ದೊರೆಯಿತು ಎಂದು ಹೇಳಿದ್ದಾರೆ.
ಅಮೆರಿಕದ ಜನಸಾಮಾನ್ಯರು ಆರೋಗ್ಯ ವ್ಯವಸ್ಥೆಯಿಂದ “ಸಂಪೂರ್ಣವಾಗಿ ಮೋಸ ಹೋಗುತ್ತಿದ್ದಾರೆ” ಎಂದು ಆರೋಪಿಸಿರುವ ವಿಕ್ಟೋರಿಯಾ, ಚಿಕಿತ್ಸೆ ಮತ್ತು ಔಷಧಿಗಳ ಹೆಸರಿನಲ್ಲಿ ಸಂಗ್ರಹವಾಗುತ್ತಿರುವ ಹೆಚ್ಚುವರಿ ಹಣ ಎಲ್ಲಿಗೆ ಹೋಗುತ್ತಿದೆ ಎಂಬ ಪ್ರಶ್ನೆಯನ್ನೂ ಎತ್ತಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ