ಕಠ್ಮಂಡು: ಪ್ರಕೃತಿ ವಿಕೋಪಗಳು ಸಾಮಾನ್ಯವಾಗಿ ಕಣ್ಣೀರು, ನೋವು ಮತ್ತು ವಿನಾಶದ ಕಥೆಗಳನ್ನೇ ಬಿಟ್ಟುಹೋಗುತ್ತವೆ. ಆದರೆ ಕೆಲವೊಮ್ಮೆ ಅವುಗಳ ಭೀಕರತೆಯ ಮಧ್ಯೆಯೇ ಬದುಕಿನ ಮೇಲಿನ ನಂಬಿಕೆಯನ್ನು ಮತ್ತೊಮ್ಮೆ ಗಟ್ಟಿಗೊಳಿಸುವ ಅಚ್ಚರಿಯ ಕಥೆಗಳೂ ಹೊರಹೊಮ್ಮುತ್ತವೆ. ನೇಪಾಳದಲ್ಲಿ ಸಂಭವಿಸಿದ ಭೀಕರ ಹಠಾತ್ ಪ್ರವಾಹದ ದುರಂತದ ನಡುವೆ ಅಂತಹದ್ದೇ ಒಂದು ಪವಾಡದ ರೀತಿಯಲ್ಲಿ ಪಾರಾದವರ ಕಥೆ ಇದೀಗ ಜಗತ್ತಿನಾದ್ಯಂತ ಜನರ ಹೃದಯ ಮುಟ್ಟಿದೆ.
ಪ್ರವಾಹಪೀಡಿತ ಪ್ರದೇಶವೊಂದರಲ್ಲಿ ಸುತ್ತಮುತ್ತಲಿನ ಕಟ್ಟಡಗಳು ನೀರಿನ ರಭಸಕ್ಕೆ ಒಂದೊಂದಾಗಿ ಕೊಚ್ಚಿಹೋಗುತ್ತಿದ್ದರೂ, ತಿಳಿ ಹಸಿರು ಬಣ್ಣದ ಮನೆಯೊಂದು ಅಚಲವಾಗಿ ನಿಂತಿರುವ ದೃಶ್ಯ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಕ್ಷಣಾರ್ಧದಲ್ಲಿ ಲಕ್ಷಾಂತರ ಜನರ ಗಮನ ಸೆಳೆದಿರುವ ಈ ವಿಡಿಯೊದಲ್ಲಿ, ಕೆಸರು ಮಿಶ್ರಿತ ಪ್ರವಾಹದ ನೀರು ಪ್ರಚಂಡ ವೇಗದಲ್ಲಿ ಹರಿಯುತ್ತಾ ತನ್ನ ದಾರಿಯಲ್ಲಿದ್ದ ಕಟ್ಟಡಗಳು, ವಾಹನಗಳು ಹಾಗೂ ಇತರ ಅವಶೇಷಗಳನ್ನು ಕೊಚ್ಚಿಕೊಂಡು ಸಾಗುತ್ತಿರುವುದು ಕಾಣಿಸುತ್ತದೆ. ಆದರೆ ಪ್ರಕೃತಿಯ ಆ ಅಬ್ಬರದ ನಡುವೆಯೂ ಆ ಮನೆ ಮಾತ್ರ ದೃಢವಾಗಿ ಈ ಪ್ರವಾಹವನ್ನು ಎದುರಿಸಿ ನಿಂತಿರುವಂತೆ ಕಾಣುತ್ತದೆ.
ಇನ್ನಷ್ಟು ಮನಕಲಕುವ ಸಂಗತಿಯೆಂದರೆ, ಪ್ರವಾಹದ ನೀರು ಮನೆಯ ಸುತ್ತಲೂ ಆವರಿಸುತ್ತಿದ್ದಾಗ ಅದರೊಳಗೆ ಕೆಲ ಕುಟುಂಬ ಸದಸ್ಯರು ಇದ್ದರು ಎಂಬುದು ವಿಡಿಯೊದಲ್ಲಿ ಗೋಚರಿಸುತ್ತದೆ. ಹೊರಗಡೆ ಮರಣ ಮೃದಂಗದಂತೆ ನೀರು ಹರಿಯುತ್ತಿದ್ದರೆ, ಒಳಗಿದ್ದವರ ಮನಸ್ಸಿನಲ್ಲಿ ಯಾವ ಭಯ, ಆತಂಕ ಮತ್ತು ಅನಿಶ್ಚಿತತೆ ಕಾಡುತ್ತಿತ್ತೋ ಎಂಬ ಕಲ್ಪನೆಯೇ ನೋವುಂಟು ಮಾಡುತ್ತದೆ. ಸುತ್ತಮುತ್ತಲಿನ ಅನೇಕ ಕಟ್ಟಡಗಳು ಕಣ್ಮುಂದೆಯೇ ಪ್ರವಾಹ ನುಂಗಿ ಆಪೋಶನ ತೆಗೆದುಕೊಳ್ಳುತ್ತಿದ್ದರೂ ಈ ಮನೆಗೆ ಮಾತ್ರ ಗೋಚರಿಸುವಷ್ಟು ದೊಡ್ಡ ಹಾನಿಯಾಗಿಲ್ಲ ಎಂಬುದು ದೃಶ್ಯಗಳಿಂದ ತಿಳಿದುಬಂದಿದೆ.
ಈ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದಂತೆಯೇ ಇಷ್ಟೊಂದು ಪ್ರಬಲ ಪ್ರವಾಹದ ಹೊಡೆತವನ್ನು ಈ ಕಟ್ಟಡ ಹೇಗೆ ತಡೆದುಕೊಂಡಿತು ಎಂಬುದರ ಬಗ್ಗೆ ಅನೇಕರು ಆಶ್ಚರ್ಯ ವ್ಯಕ್ತಪಡಿಸಿದರು. ಕೆಲವರು ಇದನ್ನು ಗುಣಮಟ್ಟದ ನಿರ್ಮಾಣದ ಉದಾಹರಣೆ ಎಂದರೆ, ಇನ್ನೂ ಕೆಲವರು ಮನೆ ಕಟ್ಟಿದ ಇಂಜಿನಿಯರ್ ಮತ್ತು ಕಾರ್ಮಿಕರ ಕಾರ್ಯವನ್ನು ಮೆಚ್ಚಿಕೊಂಡರು.
ಆದರೆ ನೆಟ್ಟಿಗರ ಮನಸ್ಸನ್ನು ಹೆಚ್ಚು ಕಾಡಿದ್ದು ಮನೆಯೊಳಗಿದ್ದ ಕುಟುಂಬದ ಸುರಕ್ಷತೆ. ಪ್ರವಾಹದ ಅಬ್ಬರದ ನಡುವೆ ಅವರು ಬದುಕುಳಿದಿರಬಹುದೇ? ಕೊನೆಯ ಕ್ಷಣಗಳಲ್ಲಿ ಅವರು ಏನು ಯೋಚಿಸುತ್ತಿದ್ದರು? ಎಂಬ ಪ್ರಶ್ನೆಗಳು ಸಾವಿರಾರು ಮಂದಿಯ ಮನದಲ್ಲಿ ಮೂಡಿದ್ದವು. ಅನೇಕರು ಆ ಅಪರಿಚಿತ ಕುಟುಂಬಕ್ಕಾಗಿ ಪ್ರಾರ್ಥನೆ ಮಾಡಿದ್ದರು.
ಕೊನೆಗೂ ಆ ಆತಂಕಕ್ಕೆ ತೆರೆ ಬಿದ್ದಿತು. ಮತ್ತೊಬ್ಬ ಸಾಮಾಜಿಕ ಜಾಲತಾಣ ಬಳಕೆದಾರರು ಹಂಚಿಕೊಂಡ ನಂತರದ ವಿಡಿಯೊದಲ್ಲಿ ಮನೆಯಲ್ಲಿದ್ದ ಕುಟುಂಬ ಸುರಕ್ಷಿತವಾಗಿದೆ ಎಂಬ ಮಾಹಿತಿ ಬಹಿರಂಗವಾಯಿತು. ಈ ಸುದ್ದಿ ತಿಳಿಯುತ್ತಿದ್ದಂತೆಯೇ ಸಾವಿರಾರು ನೆಟ್ಟಿಗರು ನೆಮ್ಮದಿಯ ನಿಟ್ಟುಸಿರು ಬಿಟ್ಟರು. ದುರಂತದ ನಡುವೆ ಈ ಕುಟುಂಬದ ಬದುಕುಳಿವಿನ ಕಥೆ ಅನೇಕರಿಗೆ ಆಶಾದೀಪವಾಗಿ ಕಾಣಿಸಿತು.
ಈ ಕುಟುಂಬ ಅಪಾಯದಿಂದ ಪಾರಾಗಿರುವುದು ಇಡೀ ಪ್ರದೇಶವೇ ಅಪಾರ ಹಾನಿಗೆ ಒಳಗಾಗಿರುವ ಸಂದರ್ಭದಲ್ಲಿ ಎಂಬುದು ಗಮನಾರ್ಹ. ಬುಧವಾರ ಮಧ್ಯ ನೇಪಾಳದಲ್ಲಿ ಸಂಭವಿಸಿದ ಭೀಕರ ಹಠಾತ್ ಪ್ರವಾಹದ ಪರಿಣಾಮ ನೇಪಾಳ-ಟಿಬೆಟ್ ಗಡಿ ಪ್ರದೇಶದ ಎರಡೂ ಬದಿಗಳಲ್ಲಿ 600ಕ್ಕೂ ಹೆಚ್ಚು ಮಂದಿ ಮೃತಪಟ್ಟಿದ್ದು, ಸುಮಾರು 1,500ಕ್ಕೂ ಹೆಚ್ಚು ಮಂದಿ ಇನ್ನೂ ನಾಪತ್ತೆಯಾಗಿದ್ದಾರೆ ಎಂದು ವರದಿಗಳು ತಿಳಿಸಿವೆ.
ಗಡಿ ಸಮೀಪದ ಹಿಮನದಿಯ ಒಂದು ಭಾಗ ಕುಸಿದ ನಂತರ ಉಂಟಾದ ಹಿಮ-ಬಂಡೆಗಳ ಭಾರೀ ಕುಸಿತ (ಐಸ್-ರಾಕ್ ಅವಲಾಂಚ್) ಈ ಮಹಾ ದುರಂತಕ್ಕೆ ಕಾರಣವಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಅದರ ಪರಿಣಾಮ ಉಂಟಾದ ನೀರಿನ ಮಹಾಪೂರವು ಅನೇಕ ವಸತಿ ಪ್ರದೇಶಗಳನ್ನು ಕ್ಷಣಾರ್ಧದಲ್ಲಿ ನಾಶಗೊಳಿಸಿ ಅಪಾರ ಜೀವಹಾನಿ ಹಾಗೂ ಆಸ್ತಿನಷ್ಟಕ್ಕೆ ಕಾರಣವಾಗಿದೆ.
ಒಂದೆಡೆ ಸಾವಿರಾರು ಕುಟುಂಬಗಳ ಬದುಕನ್ನು ಚೂರಾಗಿಸಿದ ಪ್ರವಾಹದ ಕರಾಳ ಮುಖ; ಮತ್ತೊಂದೆಡೆ ಅದೇ ಪ್ರವಾಹದ ಮಧ್ಯೆ ಅಚಲವಾಗಿ ನಿಂತ ಹಸಿರು ಮನೆ ಮತ್ತು ಅದರೊಳಗಿನ ಕುಟುಂಬದ ಬದುಕುಳಿವಿನ ಕಥೆ. ಈ ಎರಡೂ ಚಿತ್ರಣಗಳು ನೇಪಾಳ ದುರಂತದ ಎರಡು ವಿಭಿನ್ನ ಮುಖಗಳನ್ನು ಜಗತ್ತಿಗೆ ತೋರಿಸಿವೆ. ಪ್ರಕೃತಿ ಕೆಲವೊಮ್ಮೆ ಎಲ್ಲವನ್ನೂ ಕಸಿದುಕೊಳ್ಳಬಹುದು. ಆದರೆ ಅದೇ ಪ್ರಕೃತಿಯ ಅಬ್ಬರದ ಮಧ್ಯೆಯೂ ಬದುಕಿನ ಒಂದು ಸಣ್ಣ ಕಿಡಿ ಉಳಿದುಕೊಳ್ಳುತ್ತದೆ ಎಂಬುದನ್ನು ಈ ಹಸಿರು ಮನೆ ಮತ್ತು ಅದರೊಳಗಿನ ಕುಟುಂಬದ ಕಥೆ ಮತ್ತೊಮ್ಮೆ ಸಾಬೀತುಪಡಿಸಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ