ಕೌಲಾಲಂಪುರ: ಮಲೇಷ್ಯಾ ಪ್ರಧಾನಿ ದಾತುಕ್ ಸೆರಿ ಅನ್ವರ್ ಇಬ್ರಾಹಿಂ ಅವರು ಸೂಪರ್‌ಸ್ಟಾರ್ ರಜನಿಕಾಂತ್ ಸ್ಟೈಲ್ನಲ್ಲಿ ಎಂಟ್ರಿ ಕೊಟ್ಟು ದೀಪಾವಳಿಯ ಶುಭಾಶಯ ಹೇಳಿರುವ ವಿಡಿಯೊವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ನವೆಂಬರ್ 6ರಂದು ಪ್ರಧಾನಿ ಅನ್ವರ್ ಇಬ್ರಾಹಿಂ ಅವರೇ ಈ ವಿಡಿಯೊವನ್ನು ತಮ್ಮ ಎಕ್ಸ್ (X) ಖಾತೆಯಲ್ಲಿ ಹಂಚಿಕೊಂಡಿದ್ದು, ನೆಟ್ಟಿಗರಿಂದ ಭಾರಿ ಮೆಚ್ಚುಗೆ ವ್ಯಕ್ತವಾಗಿದೆ.
ಕಂಟೆಂಟ್‌ ಕ್ರಿಯೆಟರ್‌(Content Creator) ಥೆಡವಿಡ್ಶೇರ್ (Thedavidshere) ಸಿದ್ಧಪಡಿಸಿರುವ ಈ ವಿಡಿಯೊ ತಮಿಳಿನ ಆಕ್ಷನ್ ಸಿನಿಮಾದ ಶೈಲಿಯಲ್ಲಿದೆ. ಇದರಲ್ಲಿ ನಾಯಕನ ರೀತಿಯಲ್ಲಿ ಕಾಣಿಸಿಕೊಳ್ಳುವ ಅನ್ವರ್ ಇಬ್ರಾಹಿಂ, ದೀಪಾವಳಿ ಹಬ್ಬವನ್ನು ಕುಟುಂಬದವರೊಂದಿಗೆ ಆಚರಿಸಲು ಎಲ್ಲರೂ ತಮ್ಮ ಮನೆಗಳಿಗೆ ಹೋಗಬೇಕು ಎಂಬ ಸಂದೇಶ ನೀಡುತ್ತಾರೆ.
ಪ್ರಧಾನಿಯವರ ಈ ಅನಿರೀಕ್ಷಿತ ಸಿನಿಮಾ ಶೈಲಿಯ ಪ್ರವೇಶ ಆನ್‌ಲೈನ್‌ನಲ್ಲಿ ಸಾಕಷ್ಟು ಗಮನ ಸೆಳೆದಿದೆ. ಈ ವರ್ಷದ ಅತ್ಯಂತ ಸ್ಮರಣೀಯ ದೀಪಾವಳಿ ವಿಡಿಯೊಗಳಲ್ಲಿ ಇದೂ ಒಂದು ಎಂದು ಹಲವರು ಬಣ್ಣಿಸಿದ್ದಾರೆ. ಅನಿರೀಕ್ಷಿತ ಹಾಗೂ ವಿಭಿನ್ನ ನಿರೂಪಣೆಗೆ ವೀಕ್ಷಕರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ನವೆಂಬರ್ 8ರ ಭಾನುವಾರದಂದು ದೀಪಾವಳಿ ಆಚರಣೆಗೆ ಸಿದ್ಧತೆಗಳು ನಡೆಯುತ್ತಿರುವ ನಡುವೆಯೇ ಈ ವಿಡಿಯೊ ಬಿಡುಗಡೆಯಾಗಿದೆ. ಪ್ರಧಾನಿಯವರ ಅಧಿಕೃತ ಹಬ್ಬದ ಸಂದೇಶಕ್ಕೆ ಇದು ಹಾಸ್ಯಮಯ ಹಾಗೂ ಸಾಂಸ್ಕೃತಿಕ ಸ್ಪರ್ಶ ನೀಡಿದೆ.
ವಿಡಿಯೊದಲ್ಲಿ ಏನಿದೆ?
ಥೆಡವಿಡ್ಶೇರ್ ಸಿದ್ಧಪಡಿಸಿರುವ ಈ ವಿಡಿಯೊ ತಮಿಳು ಆಕ್ಷನ್ ಸಿನಿಮಾಗಳ ದೃಶ್ಯಗಳನ್ನು ನೆನಪಿಸುವ ರೀತಿಯಲ್ಲಿ ರೂಪಿಸಲಾಗಿದೆ. ನಾಯಕನಂತೆ ಕಾಣಿಸಿಕೊಳ್ಳುವ ಅನ್ವರ್ ಇಬ್ರಾಹಿಂ, ದೀಪಾವಳಿ ಹಬ್ಬದ ಸಂದರ್ಭದಲ್ಲಿ ಕುಟುಂಬದ ಸದಸ್ಯರೆಲ್ಲರೂ ಒಂದೆಡೆ ಸೇರಿ ಸಂಭ್ರಮಿಸಬೇಕು. ಅದಕ್ಕಾಗಿ ಪ್ರತಿಯೊಬ್ಬರೂ ತಮ್ಮ ಮನೆಗಳಿಗೆ ತೆರಳಲು ಸಮಯ ಮಾಡಿಕೊಳ್ಳಬೇಕು ಎಂದು ಕರೆ ನೀಡುತ್ತಾರೆ.
ಥೆಡವಿಡ್ಶೇರ್ ತಮ್ಮ ಸಾಮಾಜಿಕ ಜಾಲತಾಣ ಖಾತೆಯಲ್ಲಿ ಈ ವಿಡಿಯೊವನ್ನು ಹಂಚಿಕೊಂಡಿದ್ದು, ಕೆಲವೇ ಸಮಯದಲ್ಲಿ ವ್ಯಾಪಕ ಗಮನ ಸೆಳೆದಿದೆ. ಬಳಿಕ ಅನ್ವರ್ ಇಬ್ರಾಹಿಂ ಕೂಡ ತಮ್ಮ ಎಕ್ಸ್ ಖಾತೆಯ ಮೂಲಕ ಅದನ್ನು ಹಂಚಿಕೊಂಡಿದ್ದಾರೆ.
ಮಲೇಷ್ಯಾದ ಪ್ರಧಾನಿಯವರ ಸಂದೇಶದ ಪ್ರಮುಖ ಆಶಯ ಕುಟುಂಬದವರೊಂದಿಗೆ ಹಬ್ಬ ಆಚರಿಸುವುದಾಗಿದೆ. ಹಬ್ಬದ ಸಂದರ್ಭದಲ್ಲಿ ಕೆಲಸದ ಒತ್ತಡಗಳ ನಡುವೆಯೂ ಕುಟುಂಬಕ್ಕೆ ಸಮಯ ಮೀಸಲಿಡುವಂತೆ ಅವರು ಪ್ರೇರೇಪಿಸುತ್ತಾರೆ.
ಆದರೆ, ಈ ವಿಡಿಯೊ ಮಲೇಷ್ಯಾ ಸರ್ಕಾರದ ಅಧಿಕೃತ ಪ್ರಚಾರ ಅಭಿಯಾನದ ಭಾಗವಾಗಿ ರೂಪುಗೊಂಡಿರುವುದಲ್ಲ. ಬದಲಾಗಿ, ಕಂಟೆಂಟ್‌ ಕ್ರಿಯೇಟರ್ ಒಬ್ಬರು ಸಿದ್ಧಪಡಿಸಿದ ದೀಪಾವಳಿ ವಿಶೇಷ ವಿಡಿಯೊದಲ್ಲಿ ಪ್ರಧಾನಿ ಅನ್ವರ್ ಇಬ್ರಾಹಿಂ ಕಾಣಿಸಿಕೊಂಡಿದ್ದು, ನಂತರ ಅವರೇ ಅದನ್ನು ತಮ್ಮ ಎಕ್ಸ್ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ.
ವೀಕ್ಷಕರಿಂದ ಮೆಚ್ಚುಗೆಯ ಮಹಾಪೂರ
ಈ ವಿಡಿಯೊಕ್ಕೆ ಬಂದಿರುವ ಪ್ರತಿಕ್ರಿಯೆಗಳು ಬಹುತೇಕ ಸಕಾರಾತ್ಮಕವಾಗಿವೆ. ತಮಿಳು ಸಿನಿಮಾದ ಶೈಲಿಯ ದೀಪಾವಳಿ ವಿಶೇಷ ವಿಡಿಯೊದಲ್ಲಿ ಮಲೇಷ್ಯಾ ಪ್ರಧಾನಿ ಕಾಣಿಸಿಕೊಳ್ಳುತ್ತಾರೆ ಎಂದು ನಿರೀಕ್ಷಿಸಿರಲಿಲ್ಲ ಎಂದು ಅನೇಕರು ಅಚ್ಚರಿ ವ್ಯಕ್ತಪಡಿಸಿದ್ದಾರೆ.
ಒಬ್ಬ ವೀಕ್ಷಕರು ಈ ವಿಡಿಯೊವನ್ನು ಪೆಟ್ರೋನಾಸ್ (Petronas) ಸಂಸ್ಥೆಯ ಜನಪ್ರಿಯ ಹಬ್ಬದ ಜಾಹೀರಾತುಗಳಿಗೆ ಹೋಲಿಸಿದ್ದಾರೆ. ಮತ್ತೊಬ್ಬರು ಇದುವರೆಗಿನ ಅತ್ಯಂತ ಅದ್ಭುತ ದೀಪಾವಳಿ ವಿಡಿಯೊ ಎಂದು ಬಣ್ಣಿಸಿದ್ದಾರೆ.
ಪ್ರಧಾನಿಯವರನ್ನು ಈ ರೀತಿಯ ವಿಡಿಯೊದಲ್ಲಿ ಕಾಣಿಸಿಕೊಳ್ಳುವಂತೆ ಮಾಡಿದ ಕಂಟೆಂಟ್‌ ಕ್ರಿಯೇಟರ್ ಪ್ರಯತ್ನಕ್ಕೂ ಹಲವರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಅನಿರೀಕ್ಷಿತತೆ, ಹಾಸ್ಯ ಮತ್ತು ಹಬ್ಬದ ಸಂದೇಶ ಈ ವಿಡಿಯೊ ಜನಪ್ರಿಯವಾಗಲು ಪ್ರಮುಖ ಕಾರಣಗಳಾಗಿವೆ ಎಂದು ವೀಕ್ಷಕರ ಪ್ರತಿಕ್ರಿಯೆಗಳು ಸೂಚಿಸಿವೆ.
ದೀಪಾವಳಿ ಹಿನ್ನೆಲೆಯಲ್ಲಿ ಮಲೇಷ್ಯಾದಾದ್ಯಂತ ದೇವಸ್ಥಾನಗಳಿಗೆ ಭೇಟಿ, ಕುಟುಂಬಗಳ ಸಮ್ಮಿಲನ, ಓಪನ್ ಹೌಸ್ (Open House) ಕಾರ್ಯಕ್ರಮಗಳು ಹಾಗೂ ಹಬ್ಬದ ಪ್ರಯುಕ್ತ ಪ್ರಯಾಣಿಸುವ ಚಟುವಟಿಕೆಗಳು ಬಿರುಸಿನಿಂದ ನಡೆಯುತ್ತಿರುವ ಸಂದರ್ಭದಲ್ಲಿ ಈ ವಿಡಿಯೊ ಗಮನ ಸೆಳೆದಿದೆ.
ಪ್ರಧಾನಿಯವರ ಅಧಿಕೃತ ದೀಪಾವಳಿ ಸಂದೇಶ
ಪ್ರತ್ಯೇಕವಾಗಿ ಮಲೇಷ್ಯಾ ಪ್ರಧಾನಿ ಅನ್ವರ್ ಇಬ್ರಾಹಿಂ ಅವರು ತಮ್ಮ ಅಧಿಕೃತ ದೀಪಾವಳಿ ಸಂದೇಶವನ್ನೂ ಎಕ್ಸ್ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ. ಬ್ರಿಕ್‌ಫೀಲ್ಡ್ಸ್‌ನಲ್ಲಿ ನಡೆದ 2026ರ ದೀಪಾವಳಿ ಮೆಗಾ ಬಜಾರ್ (Deepavali Mega Bazaar) ಕಾರ್ಯಕ್ರಮದಲ್ಲಿ ಚಿತ್ರೀಕರಿಸಲಾದ 2 ನಿಮಿಷ 12 ಸೆಕೆಂಡುಗಳ ವಿಡಿಯೊದಲ್ಲಿ ಅವರು ಮಲೇಷ್ಯಾದ ಜನತೆಗೆ ಏಕತೆ ಮತ್ತು ಸೌಹಾರ್ದತೆಯನ್ನು ಕಾಪಾಡುವಂತೆ ಕರೆ ನೀಡಿದ್ದಾರೆ.
ಮಲೇಷ್ಯಾದ ನಿಜವಾದ ಶಕ್ತಿ ಜನರ ಗುಣಸ್ವಭಾವದಲ್ಲಿದೆ ಎಂದು ಅವರು ಹೇಳಿದ್ದಾರೆ. ದೀಪಾವಳಿ ಆಚರಣೆಯ ಮೂಲಕ ಪರಸ್ಪರ ಗೌರವ, ಸೌಹಾರ್ದತೆ ಮತ್ತು ಒಳ್ಳೆಯತನವನ್ನು ಬೆಳೆಸಿಕೊಳ್ಳಬೇಕು ಎಂದು ನಾಗರಿಕರಿಗೆ ಮನವಿ ಮಾಡಿದ್ದಾರೆ. ದೀಪಾವಳಿ ಹಬ್ಬವು ಮಲೇಷ್ಯಾದ ಜನರನ್ನು ಒಗ್ಗೂಡಿಸುವ ಸಾಮಾನ್ಯ ಮೌಲ್ಯಗಳನ್ನು ಪ್ರತಿಬಿಂಬಿಸುತ್ತದೆ ಎಂದು ಪ್ರಧಾನಿ ಹೇಳಿದ್ದಾರೆ. ಕೃತಜ್ಞತೆ ಮತ್ತು ಸಹಾನುಭೂತಿಯ ಭಾವನೆಯೊಂದಿಗೆ ಹಬ್ಬವನ್ನು ಆಚರಿಸುವಂತೆ ಅವರು ಕರೆ ನೀಡಿದ್ದಾರೆ.
ಒಟ್ಟಿನಲ್ಲಿ, ದೀಪಾವಳಿಯ ನಿಜವಾದ ಆಶಯವಾದ ಮನೆಗೆ ಮರಳುವುದು, ಕುಟುಂಬದವರೊಂದಿಗೆ ಮತ್ತೆ ಒಂದಾಗುವುದು ಮತ್ತು ಒಟ್ಟಾಗಿ ಹಬ್ಬದ ಸಂಭ್ರಮ ಹಂಚಿಕೊಳ್ಳುವುದನ್ನು ಅನ್ವರ್ ಇಬ್ರಾಹಿಂ ಅವರ ಈ ವಿಶೇಷ ವಿಡಿಯೊ ಮತ್ತೊಮ್ಮೆ ನೆನಪಿಸಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ