ಮೈಕ್ರೋಸಾಫ್ಟ್‌ನ ಇಮೇಲ್ ಸೇವೆ ಔಟ್‌ಲುಕ್ ಸೇರಿದಂತೆ ಹಲವು ಪ್ರಮುಖ ಡಿಜಿಟಲ್ ಸೇವೆಗಳಲ್ಲಿ ವ್ಯಾಪಕ ತಾಂತ್ರಿಕ ವ್ಯತ್ಯಯ ಉಂಟಾಗಿದ್ದು, ಜಗತ್ತಿನಾದ್ಯಂತ ಸಾವಿರಾರು ಬಳಕೆದಾರರು ತೀವ್ರ ತೊಂದರೆ ಅನುಭವಿಸಿದ್ದಾರೆ. ಔಟ್‌ಲುಕ್ ಬಳಕೆದಾರರಿಗೆ ಇಮೇಲ್ ಕಳುಹಿಸಲು ಮತ್ತು ಸ್ವೀಕರಿಸಲು ಸಾಧ್ಯವಾಗಿಲ್ಲ, ಇನ್‌ಬಾಕ್ಸ್ ತೆರೆಯಲು ಕೂಡ ಸಮಸ್ಯೆ ಎದುರಾಗಿದೆ.
ಗುರುವಾರ ಮಧ್ಯಾಹ್ನ ಮೈಕ್ರೋಸಾಫ್ಟ್‌ನ ಹಲವು ಆನ್ಲೈನ್ ಸೇವೆಗಳಲ್ಲಿ ಏಕಾಏಕಿ ತಾಂತ್ರಿಕ ಸಮಸ್ಯೆ ಕಾಣಿಸಿಕೊಂಡಿದೆ. ಇದರಿಂದ ಕಂಪನಿಯ ಜನಪ್ರಿಯ ಇಮೇಲ್ ವೇದಿಕೆ ಔಟ್‌ಲುಕ್, ಕಚೇರಿ ಸಂವಹನಕ್ಕಾಗಿ ಬಳಸುವ ಮೈಕ್ರೋಸಾಫ್ಟ್ ಟೀಮ್ಸ್, ಕೃತಕ ಬುದ್ಧಿಮತ್ತೆ ಆಧಾರಿತ ಕೋಪೈಲಟ್ (Copilot) ಹಾಗೂ ಮೈಕ್ರೋಸಾಫ್ಟ್-365 ಸೇವೆಗಳ ಬಳಕೆಯಲ್ಲಿ ಅಡಚಣೆ ಉಂಟಾಗಿದೆ.
ಔಟ್‌ಲುಕ್ ಬಳಕೆದಾರರಿಗೆ ತೊಂದರೆ
ಔಟ್‌ಲುಕ್ ಸೇವೆಯಲ್ಲಿನ ವ್ಯತ್ಯಯದ ಬಗ್ಗೆ Downdetector ಎಂಬ ಆನ್ಲೈನ್ ಸೇವೆಗಳ ಸ್ಥಿತಿಗತಿ ಗಮನಿಸುವ ವೆಬ್‌ಸೈಟ್‌ನಲ್ಲಿ ಮಧ್ಯಾಹ್ನ 1 ಗಂಟೆ (ಅಮೆರಿಕದ ಪೂರ್ವ ಕರಾವಳಿ ಸಮಯ) ದಾಟಿದ ಕೆಲವೇ ಕ್ಷಣಗಳಲ್ಲಿ ಸುಮಾರು 1.30 ಲಕ್ಷ ಬಳಕೆದಾರರು ತೊಣದರೆಯಾಗಿದೆ ಎಂದು ದೂರು ದಾಖಲಿಸಿದ್ದಾರೆ.
ಆರಂಭದಲ್ಲಿ ದೂರುಗಳ ಸಂಖ್ಯೆ ಭಾರೀ ಪ್ರಮಾಣದಲ್ಲಿ ಏರಿಕೆಯಾಗಿದ್ದು, ನಂತರ ಹೊಸ ದೂರುಗಳ ಸಂಖ್ಯೆ ಇಳಿಕೆಯಾಗತೊಡಗಿದೆ. ಆದರೂ ಹಲವು ಬಳಕೆದಾರರು ತಮ್ಮ ಇಮೇಲ್ ಖಾತೆಗಳನ್ನು ಪ್ರವೇಶಿಸಲು ಸಾಧ್ಯವಾಗುತ್ತಿಲ್ಲ ಎಂದು ತಿಳಿಸಿದ್ದಾರೆ.
ಕೆಲವರಿಗೆ ಇಮೇಲ್‌ಗಳನ್ನು ಕಳುಹಿಸಲು ಸಾಧ್ಯವಾಗದಿದ್ದರೆ, ಇನ್ನು ಕೆಲವರಿಗೆ ಇಮೇಲ್‌ಗಳನ್ನು ಸ್ವೀಕರಿಸುವಲ್ಲಿ ಸಮಸ್ಯೆ ಎದುರಾಗಿದೆ. ಮತ್ತೊಂದೆಡೆ, ಕೆಲ ಬಳಕೆದಾರರಿಗೆ ತಮ್ಮ ಇನ್‌ಬಾಕ್ಸ್ ಲೋಡ್ ಆಗದೆ ಸಂಪೂರ್ಣವಾಗಿ ಸ್ಥಗಿತಗೊಂಡ ಅನುಭವವಾಗಿದೆ.
ಟೀಮ್ಸ್, ಕಾಪಿಲಟ್ ಹಾಗೂ ಮೈಕ್ರೋಸಾಫ್ಟ್ 365 ಸೇವೆಗಳಲ್ಲೂ ವ್ಯತ್ಯಯ
ಔಟ್‌ಲುಕ್ ಮಾತ್ರವಲ್ಲದೆ, ಮೈಕ್ರೋಸಾಫ್ಟ್‌ನ ಇತರ ಪ್ರಮುಖ ಸೇವೆಗಳ ಮೇಲೂ ಈ ತಾಂತ್ರಿಕ ಸಮಸ್ಯೆಯ ಪರಿಣಾಮ ಬೀರಿದೆ.
ಮೈಕ್ರೋಸಾಫ್ಟ್ ಟೀಮ್ಸ್: ಕಚೇರಿ ಸಭೆಗಳು, ಸಂದೇಶ ವಿನಿಮಯ ಮತ್ತು ಉದ್ಯೋಗಿಗಳ ನಡುವಿನ ಸಂವಹನಕ್ಕೆ ಬಳಸುವ ಈ ಅಪ್ಲಿಕೇಶನ್‌ನಲ್ಲೂ ಸಾವಿರಾರು ಬಳಕೆದಾರರು ಸಮಸ್ಯೆಗಳನ್ನು ವರದಿ ಮಾಡಿದ್ದಾರೆ.
ಮೈಕ್ರೋಸಾಫ್ಟ್ ಕೋಪೈಲಟ್ (Copilot): ಕಂಪನಿಯ ಕೃತಕ ಬುದ್ಧಿಮತ್ತೆ ಆಧಾರಿತ ಸಹಾಯಕ ಸೇವೆಯ ಬಳಕೆಯಲ್ಲೂ ವ್ಯತ್ಯಯ ಉಂಟಾಗಿದೆ.
ಮೈಕ್ರೋಸಾಫ್ಟ್ 365: ಮೈಕ್ರೋಸಾಫ್ಟ್‌ನ ವಿವಿಧ ಕಚೇರಿ ಮತ್ತು ಉತ್ಪಾದಕತೆ ಆಧಾರಿತ ಸೇವೆಗಳಲ್ಲೂ ಬಳಕೆದಾರರು ತೊಂದರೆ ಅನುಭವಿಸಿದ್ದಾರೆ.
ಸಮಸ್ಯೆ ಬಗ್ಗೆ ತನಿಖೆ ಆರಂಭಿಸಿದ ಮೈಕ್ರೋಸಾಫ್ಟ್
ಈ ತಾಂತ್ರಿಕ ವ್ಯತ್ಯಯದ ಬಗ್ಗೆ ಪ್ರತಿಕ್ರಿಯಿಸಿರುವ ಅಮೆರಿಕದ ವಾಷಿಂಗ್ಟನ್ ರಾಜ್ಯದ ರೆಡ್‌ಮಂಡ್‌ನಲ್ಲಿ ಪ್ರಧಾನ ಕಚೇರಿ ಹೊಂದಿರುವ ಮೈಕ್ರೋಸಾಫ್ಟ್ ಸಂಸ್ಥೆ, ತನ್ನ ಸೇವೆಗಳಲ್ಲಿ ಉಂಟಾಗಿರುವ ಅಡಚಣೆಯ ಬಗ್ಗೆ ತನಿಖೆ ನಡೆಸುತ್ತಿರುವುದಾಗಿ ತಿಳಿಸಿದೆ.
ಸಾಮಾಜಿಕ ಜಾಲತಾಣ ಎಕ್ಸ್‌ನಲ್ಲಿ ಪ್ರಕಟಿಸಿದ ಮಾಹಿತಿ ಪ್ರಕಾರ, ಅಮೆರಿಕ ಖಂಡದ ಹಲವು ಪ್ರದೇಶಗಳಲ್ಲಿನ ಬಳಕೆದಾರರು ವಿವಿಧ ಸಂಪರ್ಕ ವಿಧಾನಗಳ ಮೂಲಕ ಎಕ್ಸ್‌ಚೇಂಜ್‌ ಆನ್ಲೈನ್ (Exchange Online) ಮೇಲ್‌ಬಾಕ್ಸ್‌ಗಳನ್ನು ಪ್ರವೇಶಿಸಲು ಸಮಸ್ಯೆ ಎದುರಿಸುತ್ತಿರುವುದು ಕಂಪನಿಯ ಗಮನಕ್ಕೆ ಬಂದಿದೆ. ಬಳಕೆದಾರರಿಗೆ ಎದುರಾಗಿರುವ ಸಂಪರ್ಕ ಸಮಸ್ಯೆಗಳನ್ನು ಪರಿಹರಿಸಲು ತಾಂತ್ರಿಕ ತಂಡಗಳು ಕಾರ್ಯಪ್ರವೃತ್ತವಾಗಿವೆ ಎಂದು ಸಂಸ್ಥೆ ತಿಳಿಸಿದೆ.
ಸರ್ವರ್‌ಗಳ ಮೇಲೆ ಹೆಚ್ಚಿದ ಒತ್ತಡವೇ ಸಮಸ್ಯೆಗೆ ಕಾರಣ?
ತಾಂತ್ರಿಕ ಸಮಸ್ಯೆಯ ಕುರಿತು ಮತ್ತಷ್ಟು ಮಾಹಿತಿ ನೀಡಿರುವ ಮೈಕ್ರೋಸಾಫ್ಟ್, ತನ್ನ ಮೂಲಸೌಕರ್ಯದ ಒಂದು ಭಾಗದಲ್ಲಿ ಸಾಮಾನ್ಯಕ್ಕಿಂತ ಹೆಚ್ಚಿನ ಪ್ರಮಾಣದ ಲೋಡ್ (Elevated Load) ಕಂಡುಬಂದಿದೆ ಎಂದು ತಿಳಿಸಿದೆ.
ಈ ಹೆಚ್ಚಿನ ಒತ್ತಡವೇ ಬಳಕೆದಾರರಿಗೆ ಎದುರಾಗಿರುವ ಸಂಪರ್ಕ ದೋಷಗಳಿಗೆ ಪ್ರಮುಖ ಕಾರಣವಾಗಿರುವ ಸಾಧ್ಯತೆಯಿದೆ ಎಂದು ಕಂಪನಿ ಅಭಿಪ್ರಾಯಪಟ್ಟಿದೆ. ಇದಲ್ಲದೆ, ಸ್ವಯಂಚಾಲಿತ ತಾಂತ್ರಿಕ ಪರಿಶೀಲನೆಗಳ ಸಂದರ್ಭದಲ್ಲಿ ಉಂಟಾದ ಸಮಸ್ಯೆಯಿಂದಾಗಿ ಕೆಲವು ಸರ್ವರ್‌ಗಳು ಅನಿರೀಕ್ಷಿತವಾಗಿ ಲಭ್ಯವಿಲ್ಲದಂತಾಗಿವೆ ಎಂಬುದನ್ನೂ ಸಂಸ್ಥೆ ಪತ್ತೆಹಚ್ಚಿದೆ. ಆದರೆ, ಸರ್ವರ್‌ಗಳು ವಿಫಲವಾಗಲು ಕಾರಣವಾದ ನಿಖರ ತಾಂತ್ರಿಕ ಸಮಸ್ಯೆ ಯಾವುದು ಎಂಬುದರ ಬಗ್ಗೆ ಮೈಕ್ರೋಸಾಫ್ಟ್ ತಕ್ಷಣಕ್ಕೆ ಹೆಚ್ಚಿನ ಮಾಹಿತಿ ಬಹಿರಂಗಪಡಿಸಿಲ್ಲ.ಸಮಸ್ಯೆಯನ್ನು ಸರಿಪಡಿಸುವ ಉದ್ದೇಶದಿಂದ ಪರಿಹಾರ ಕ್ರಮವೊಂದನ್ನು ಪರೀಕ್ಷಿಸಲಾಗುತ್ತಿದೆ ಎಂದು ಕಂಪನಿ ತಿಳಿಸಿದೆ.
ಬಳಕೆದಾರರಿಗೆ ಉಂಟಾಗಿರುವ ತೊಂದರೆಯನ್ನು ಆದಷ್ಟು ಬೇಗ ಕಡಿಮೆ ಮಾಡಲು ಎಲ್ಲ ರೀತಿಯ ಪ್ರಯತ್ನಗಳನ್ನು ನಡೆಸಲಾಗುತ್ತಿದೆ ಎಂದು ಮೈಕ್ರೋಸಾಫ್ಟ್ ತಿಳಿಸಿದೆ.
ಮೈಕ್ರೋಸಾಫ್ಟ್ 365 ಸ್ಟೇಟಸ್ ಎಂಬ ಅಧಿಕೃತ ಎಕ್ಸ್ ಖಾತೆಯಲ್ಲಿ, “ಬಳಕೆದಾರರ ಮೇಲಿನ ಪರಿಣಾಮವನ್ನು ಕಡಿಮೆ ಮಾಡಲು ಸಾಧ್ಯವಿರುವ ಎಲ್ಲ ಮಾರ್ಗಗಳ ಮೂಲಕ ನಾವು ತೀವ್ರವಾಗಿ ಪ್ರಯತ್ನಿಸುತ್ತಿದ್ದೇವೆ” ಎಂದು ಕಂಪನಿ ಹೇಳಿದೆ.
ಟೀಮ್ಸ್ ಸಮಸ್ಯೆ ಪರಿಹಾರ, ಆದರೆ ಕೆಲವು ಬಳಕೆದಾರರಿಗೆ ಮುಂದುವರಿದ ತೊಂದರೆ
ಇದೇ ವೇಳೆ, ದಿನದ ಆರಂಭದಲ್ಲಿ ಉತ್ತರ ಅಮೆರಿಕಾದ ಮೈಕ್ರೋಸಾಫ್ಟ್ ಟೀಮ್ಸ್ ಸೇವೆಯಲ್ಲಿ ಕಾಣಿಸಿಕೊಂಡಿದ್ದ ಸಮಸ್ಯೆಗಳನ್ನು ಯಶಸ್ವಿಯಾಗಿ ಸರಿಪಡಿಸಲಾಗಿದೆ ಎಂದು ಕಂಪನಿ ಪ್ರಕಟಿಸಿತ್ತು. ಆದರೆ, ಸಮಸ್ಯೆ ಪರಿಹಾರವಾಗಿದೆ ಎಂದು ಘೋಷಿಸಿದ ಬಳಿಕವೂ ಕೆಲವು ಬಳಕೆದಾರರು ಟೀಮ್ಸ್ ಸೇವೆಯನ್ನು ಬಳಸುವಾಗ ಸಂಪರ್ಕ ಸಮಸ್ಯೆಗಳು ಮುಂದುವರಿದಿರುವುದಾಗಿ ವರದಿ ಮಾಡಿದ್ದಾರೆ.
ಒಟ್ಟಿನಲ್ಲಿ, ಔಟ್‌ಲುಕ್‌ನಿಂದ ಆರಂಭವಾಗಿ ಟೀಮ್ಸ್, ಕೋಪೈಲಟ್ (Copilot) ಹಾಗೂ ಮೈಕ್ರೋಸಾಫ್ಟ್ 365 ಸೇರಿದಂತೆ ಹಲವು ಸೇವೆಗಳ ಮೇಲೆ ಪರಿಣಾಮ ಬೀರಿರುವ ಈ ತಾಂತ್ರಿಕ ವ್ಯತ್ಯಯವು ಮೈಕ್ರೋಸಾಫ್ಟ್ ಬಳಕೆದಾರರಲ್ಲಿ ಆತಂಕ ಮೂಡಿಸಿದೆ. ಸರ್ವರ್‌ಗಳ ಅನಿರೀಕ್ಷಿತ ವೈಫಲ್ಯ ಮತ್ತು ಮೂಲಸೌಕರ್ಯದ ಮೇಲಿನ ಹೆಚ್ಚಿದ ಒತ್ತಡದ ಕುರಿತು ತನಿಖೆ ಮುಂದುವರಿದಿದ್ದು, ಸಮಸ್ಯೆಗೆ ಸಂಪೂರ್ಣ ಪರಿಹಾರ ಕಲ್ಪಿಸಲು ಕಂಪನಿ ಪ್ರಯತ್ನಿಸುತ್ತಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ