ಬಲೂಚಿಸ್ತಾನದಲ್ಲಿ ಪಾಕಿಸ್ತಾನದ ಭದ್ರತಾ ಪಡೆಗಳ ಮೇಲೆ ನಡೆಯುತ್ತಿರುವ ದಾಳಿಗಳು ಮತ್ತಷ್ಟು ತೀವ್ರಗೊಂಡಿದ್ದು, ಬಲೂಚಿಸ್ತಾನ್ ಲಿಬರೇಷನ್ ಫ್ರಂಟ್ (BLF) ಹೊಸದಾಗಿ ರಚಿಸಲಾದ ತನ್ನ ಮಹಿಳಾ ಸಶಸ್ತ್ರ ಘಟಕವಾದ ಕರೀಮಾ ಆರ್ಮ್ಡ್ ಅಸಾಲ್ಟ್ ಡಿವಿಷನ್ (KAAD) ನಡೆಸಿದ ಮೊದಲ ಕಾರ್ಯಾಚರಣೆಯ ವಿಡಿಯೊವನ್ನು ಬಿಡುಗಡೆ ಮಾಡಿದೆ. ಈ ದಾಳಿಗಳಲ್ಲಿ ಒಂಬತ್ತು ಪಾಕಿಸ್ತಾನಿ ಸೇನಾ ಸಿಬ್ಬಂದಿ ಸಾವಿಗೀಡಾಗಿದ್ದಾರೆ ಎಂದು ಪ್ರತ್ಯೇಕತಾವಾದಿ ಉಗ್ರಗಾಮಿ ಸಂಘಟನೆ ಹೇಳಿಕೊಂಡಿದೆ.ಈ ವಿಡಿಯೊದಲ್ಲಿ ಮಹಿಳಾ ಹೋರಾಟಗಾರ್ತಿಯರು ಪಾಕಿಸ್ತಾನ ಸೇನೆಯ ಶಸ್ತ್ರಸಜ್ಜಿತ ವಾಹನ ಸೇರಿದಂತೆ ಸೇನಾ ಬೆಂಗಾವಲು ಪಡೆಯ ಮೇಲೆ ಗುಂಡಿನ ದಾಳಿ ನಡೆಸುತ್ತಿರುವ ದೃಶ್ಯಗಳು ಕಾಣಿಸಿಕೊಂಡಿವೆ.
ಸೆಪ್ಟೆಂಬರ್ 22ರಂದು ಬಲೂಚಿಸ್ತಾನದ ತುರ್ಬತ್ ಪ್ರದೇಶದಲ್ಲಿ ಈ ಕಾರ್ಯಾಚರಣೆ ನಡೆದಿದ್ದು, ಚೀನಾ–ಪಾಕಿಸ್ತಾನ ಆರ್ಥಿಕ ಕಾರಿಡಾರ್ (CPEC) ಹೆದ್ದಾರಿಯಲ್ಲಿ ಸಂಚರಿಸುತ್ತಿದ್ದ ಮೂರು ವಾಹನಗಳ ಕ್ವಿಕ್ ರೆಸ್ಪಾನ್ಸ್ ಫೋರ್ಸ್ (QRF) ಬೆಂಗಾವಲು ಪಡೆಯನ್ನು ಗುರಿಯಾಗಿಸಿ ದಾಳಿ ನಡೆಸಲಾಗಿದೆ ಎಂದು ಬಲೂಚಿಸ್ತಾನ್ ಲಿಬರೇಷನ್ ಫ್ರಂಟ್ (BLF ಹೇಳಿದೆ.
ಬಿಡುಗಡೆಯಾದ ವಿಡಿಯೊದಲ್ಲಿ ಮಹಿಳಾ ಕಮಾಂಡರ್ ಕಾರ್ಯಾಚರಣೆಯ ಕುರಿತು ವಿವರ ನೀಡಿದ ನಂತರ, ರೈಫಲ್ಗಳನ್ನು ಹಿಡಿದಿದ್ದ ಕರೀಮಾ ಆರ್ಮ್ಡ್ ಅಸಾಲ್ಟ್ ಡಿವಿಷನ್ (KAAD) ಸದಸ್ಯೆಯರು ಕೆಲವೇ ಹೆಜ್ಜೆಗಳ ಅಂತರದಿಂದಲೇ ದಾಳಿ ನಡೆಸಿರುವುದು ಕಂಡುಬಂದಿದೆ. ಇದು ಅವರ ತರಬೇತಿಯ ಮಟ್ಟವನ್ನು ತೋರಿಸುತ್ತದೆ ಎಂದು ಸಂಘಟನೆ ಹೇಳಿಕೊಂಡಿದೆ.
ಬಿಎಲ್ಎಫ್ ವಕ್ತಾರ ಮೇಜರ್ ಗ್ವಾಹ್ರಮ್ ಬಲೂಚ್ ಬಿಡುಗಡೆ ಮಾಡಿದ ಹೇಳಿಕೆಯಲ್ಲಿ, ಈ ದಾಳಿಯಲ್ಲಿ ಪಾಕಿಸ್ತಾನ ಸೇನೆಯ ಹಲವು ವಾಹನಗಳಿಗೆ ಭಾರೀ ಹಾನಿಯಾಗಿದೆ ಎಂದು ತಿಳಿಸಿದ್ದಾರೆ. ಮಹಿಳಾ ಘಟಕದ ಕಾರ್ಯಾಚರಣೆಗೆ ಸಂಘಟನೆಯ ಕುರ್ಬಾನ್ ಘಟಕ ಬೆಂಬಲ ನೀಡಿದ್ದು, ದಾಳಿಯ ಬಳಿಕ ತಮ್ಮನ್ನು ಸುತ್ತುವರಿಯಲು ಯತ್ನಿಸಿದ ಪಾಕಿಸ್ತಾನಿ ಪಡೆಗಳನ್ನು ಹಿಮ್ಮೆಟ್ಟಿಸಿ, ಮಹಿಳಾ ಹೋರಾಟಗಾರ್ತಿಯರು ಸುರಕ್ಷಿತವಾಗಿ ಹಿಂತಿರುಗಲು ನೆರವಾಗಿದೆ ಎಂದು ಹೇಳಿದ್ದಾರೆ.
ಆದರೆ ಈ ಕಾರ್ಯಾಚರಣೆಯ ವೇಳೆ ಕುರ್ಬಾನ್ ಘಟಕದ ಹೋರಾಟಗಾರ ಚಾಕರ್ ಮುರಾದ್ ಅಲಿಯಾಸ್ ದಿಲೀಪ ಜಾನ್ ಸಾವನ್ನಪ್ಪಿದ್ದಾನೆ ಎಂದು ಬಿಎಲ್ಎಫ್ ತಿಳಿಸಿದೆ.
ವಿಡಿಯೊದ ಮತ್ತೊಂದು ಭಾಗದಲ್ಲಿ, ಕೆಎಎಡಿ (KAAD) ಸದಸ್ಯೆಯರು ಕಲಾತ್ ಜಿಲ್ಲೆಯ ಮಂಗ್ಚಾರ್ ಪ್ರದೇಶದಲ್ಲಿ ವಾಹನಗಳ ತಪಾಸಣೆ (ಸ್ನ್ಯಾಪ್ ಚೆಕಿಂಗ್) ನಡೆಸುತ್ತಿರುವ ದೃಶ್ಯಗಳೂ ಸೇರಿವೆ.
ಇದೇ ವೇಳೆ ಮತ್ತೊಂದು ಘಟನೆಯಲ್ಲಿ, ಬಲೂಚ್ ರಿಪಬ್ಲಿಕನ್ ಆರ್ಮಿ (BRA) ಬಲೂಚಿಸ್ತಾನದ ಡೇರಾ ಬುಗ್ಗಿ ಜಿಲ್ಲೆಯ ಬೆಹ್ ಲೋಟಿ ಪ್ರದೇಶದಲ್ಲಿರುವ ಮಾರಿ ಎನರ್ಜೀಸ್ ಲಿಮಿಟೆಡ್ ಯೋಜನಾ ತಾಣದ ಮೇಲೆ ರಾಕೆಟ್ಗಳು ಹಾಗೂ ಭಾರೀ ಶಸ್ತ್ರಾಸ್ತ್ರಗಳನ್ನು ಬಳಸಿ ದಾಳಿ ನಡೆಸಿದೆ. ಈ ದಾಳಿಯಲ್ಲಿ ಕಂಪನಿಯ ಮೂವರು ಉದ್ಯೋಗಿಗಳು ಮೃತಪಟ್ಟಿದ್ದು, ಹಲವರು ಗಾಯಗೊಂಡಿದ್ದಾರೆ ಎಂದು ಬಿಆರ್ಎ(BRA) ವಕ್ತಾರ ಸರ್ಬಾಜ್ ಬಲೂಚ್ ಹೇಳಿದ್ದಾರೆ.
ಮಾರಿ ಎನರ್ಜೀಸ್ ತಾಣದ ಮೇಲಿನ ದಾಳಿಯ ಬಳಿಕ ಪಾಕಿಸ್ತಾನಿ ಪಡೆಗಳು ಮತ್ತು ಸಂಘಟನೆಯು “ಸರ್ಕಾರ ಬೆಂಬಲಿತ ಸ್ಥಳೀಯ ಸಶಸ್ತ್ರ ಗುಂಪು” ಎಂದು ಬಣ್ಣಿಸಿರುವ ತಂಡದ ನಡುವೆ ಗುಂಡಿನ ಚಕಮಕಿ ನಡೆದಿತ್ತೆಂದು ಅವರು ತಿಳಿಸಿದ್ದಾರೆ.
ಬಿಆರ್ಎ ಬಿಡುಗಡೆ ಮಾಡಿದ ಹೇಳಿಕೆಯ ಪ್ರಕಾರ, ಈ ಘಟನೆಯಲ್ಲಿ ಒಟ್ಟು ಒಂಬತ್ತು ಪಾಕಿಸ್ತಾನಿ ಸೇನಾ ಸಿಬ್ಬಂದಿ ಹಾಗೂ ಸ್ಥಳೀಯ ಸಶಸ್ತ್ರ ಗುಂಪಿನ ಮೂವರು ಸದಸ್ಯರು ಸಾವಿಗೀಡಾಗಿದ್ದಾರೆ. ಆದರೆ ಸಂಘಟನೆಯ ಆರು ಹೋರಾಟಗಾರರೂ ಪ್ರಾಣ ಕಳೆದುಕೊಂಡಿದ್ದಾರೆ ಎಂದು ದಿ ಬಲೂಚಿಸ್ತಾನ್ ಪೋಸ್ಟ್ ವರದಿ ಉಲ್ಲೇಖಿಸಿದೆ.
ಇದರ ನಡುವೆ ಬಲೂಚ್ ರಿಪಬ್ಲಿಕನ್ ಗಾರ್ಡ್ಸ್ (BRG) ತನ್ನ ಪಡೆಗಳು ಹಾಜಿ ಶೆಹರ್ ಪ್ರದೇಶವನ್ನು ವಶಕ್ಕೆ ಪಡೆದು ಸ್ಫೋಟಕಗಳ ಮೂಲಕ ಸ್ಥಳೀಯ ಪೊಲೀಸ್ ಠಾಣೆಯನ್ನು ಧ್ವಂಸಗೊಳಿಸಿದ್ದಾಗಿ ಹೇಳಿಕೊಂಡಿದೆ. ಜೊತೆಗೆ ಬಿಆರ್ಎ ಹೋರಾಟಗಾರರು ಎರಿ ಶೆಹರ್ಗೆ ನುಗ್ಗಿ ಸರ್ಕಾರಿ ಕಟ್ಟಡಗಳ ಮೇಲೆ ನಿಯಂತ್ರಣ ಸಾಧಿಸಿ, ಕಾರ್ಯಾಚರಣೆ ಪೂರ್ಣಗೊಳಿಸಿದ ಬಳಿಕ ಸುರಕ್ಷಿತವಾಗಿ ಹಿಂತಿರುಗಿದ್ದಾರೆ ಎಂದು ಸಂಘಟನೆ ತಿಳಿಸಿದೆ.
ಇತ್ತೀಚಿನ ಈ ದಾಳಿಗಳು ಪಾಕಿಸ್ತಾನದ ಭದ್ರತಾ ಪಡೆಗಳು ಹಾಗೂ ಸರ್ಕಾರಿ ಮೂಲಸೌಕರ್ಯಗಳನ್ನು ಗುರಿಯಾಗಿಸಿಕೊಂಡು ಬಲೂಚ್ ಉಗ್ರ ಸಂಘಟನೆಗಳು ನಡೆಸುತ್ತಿರುವ ದಾಳಿಗಳ ತೀವ್ರತೆಯನ್ನು ಮತ್ತಷ್ಟು ಹೆಚ್ಚಿಸಿವೆ. ಈ ದಾಳಿಗಳಿಂದ ಭಾರೀ ಜೀವಹಾನಿ ಮತ್ತು ಮೂಲಸೌಕರ್ಯ ನಷ್ಟ ಉಂಟಾಗಿದೆ ಎಂದು ವರದಿಗಳು ಸೂಚಿಸಿವೆ.
ಗಮನಾರ್ಹವಾಗಿ, ಕರೀಮಾ ಆರ್ಮ್ಡ್ ಅಸಾಲ್ಟ್ ಡಿವಿಷನ್ (KAAD) ಘಟಕಕ್ಕೆ ಬಲೂಚ್ ಸ್ವಾತಂತ್ರ್ಯ ಪರ ಹೋರಾಟಗಾರ್ತಿ ಹಾಗೂ ಬಲೂಚ್ ಸ್ಟೂಡೆಂಟ್ಸ್ ಆರ್ಗನೈಸೇಶನ್–ಆಜಾದ್ (BSO-Azad) ಸಂಘಟನೆಯ ಮೊದಲ ಮಹಿಳಾ ಅಧ್ಯಕ್ಷೆಯಾಗಿದ್ದ ಕರೀಮಾ ಬಲೂಚ್ ಅವರ ಹೆಸರನ್ನು ಇಡಲಾಗಿದೆ. 2020ರಲ್ಲಿ ಕೆನಡಾದ ಟೊರೊಂಟೊದಲ್ಲಿ ಅವರು ಅನುಮಾನಾಸ್ಪದವಾಗಿ ಮೃತಪಟ್ಟ ಸ್ಥಿತಿಯಲ್ಲಿ ಪತ್ತೆಯಾಗಿದ್ದರು.
ನಿಮ್ಮ ಕಾಮೆಂಟ್ ಬರೆಯಿರಿ