ವೀಡಿಯೊ | ಮನುಷ್ಯರನ್ನೂ ಮೀರಿಸುವಂತೆ ರೋಬೋಟ್‌ಗಳ ಕುಂಗ್ ಫೂ ಪ್ರದರ್ಶನ ! ಚೀನಾ ಎಐ ಶಕ್ತಿಗೆ ಬೆರಗಾದ ಜಗತ್ತು ; ವೀಕ್ಷಿಸಿ

ತಂತ್ರಜ್ಞಾನ ಕ್ಷೇತ್ರದಲ್ಲಿ ಜಾಗತಿಕ ಮಟ್ಟದಲ್ಲಿ ತನ್ನ ಪಾರುಪತ್ಯ ಮೆರೆಯುತ್ತಿರುವ ಚೀನಾ, ಈ ಬಾರಿಯ ‘ಸ್ಪ್ರಿಂಗ್ ಫೆಸ್ಟಿವಲ್ ಗಾಲಾ’ (Spring Festival Gala) ಕಾರ್ಯಕ್ರಮದಲ್ಲಿ ತನ್ನ ಅತ್ಯಾಧುನಿಕ ಹ್ಯೂಮನಾಯ್ಡ್ (ಮಾನವ ರೂಪದ) ರೋಬೋಟ್‌ಗಳ ಶಕ್ತಿಯನ್ನು ಪ್ರದರ್ಶಿಸಿದೆ. ಅಲ್ಲಿ ನೆರೆದಿದ್ದವರು ಮತ್ತು ಟಿವಿ ಮುಂದೆ ಕುಳಿತಿದ್ದ ಕೋಟ್ಯಂತರ ಜನರು ಒಂದು ಕ್ಷಣ ದಂಗಾದರು!

ಕೇವಲ ನಡೆದಾಡುವುದಕ್ಕೆ ಕಷ್ಟಪಡುತ್ತಿದ್ದ ರೋಬೋಟ್‌ಗಳ ಕಾಲ ಈಗ ಮುಗಿದಿದೆ. ಈ ಪ್ರದರ್ಶನದಲ್ಲಿ ಡಜನ್ಗಟ್ಟಲೆ ಹ್ಯೂಮನಾಯ್ಡ್ (ಮನುಷ್ಯರೂಪಿ) ರೋಬೋಟ್‌ಗಳು ವೇದಿಕೆಯ ಮೇಲೆ ಅಚ್ಚರಿಯ ಸಾಹಸಗಳನ್ನು ಪ್ರದರ್ಶಿಸಿದವು. ದೇಶದ ಅತಿದೊಡ್ಡ ಸಾಂಸ್ಕೃತಿಕ ಕಾರ್ಯಕ್ರಮದಲ್ಲಿ ಸುಮಾರು ಎರಡು ಡಜನ್ ರೋಬೋಟ್‌ಗಳು ಕುಂಗ್-ಫೂ, ಪಾರ್ಕರ್ ಮತ್ತು ನೃತ್ಯ ಪ್ರದರ್ಶನ ನೀಡುವ ಮೂಲಕ ಜಗತ್ತನ್ನು ಬೆರಗುಗೊಳಿಸಿವೆ.

ಈ ಕಾರ್ಯಕ್ರಮದಲ್ಲಿ ರೋಬೋಟ್‌ಗಳು ಸಮರ ಕಲೆಗಳ (Martial Arts) ಸಾಹಸಗಳನ್ನು ಪ್ರದರ್ಶಿಸಿದವು. ಅಮೆರಿಕದಲ್ಲಿರುವ ಚೀನಾ ರಾಯಭಾರ ಕಚೇರಿಯು ಈ ಪ್ರದರ್ಶನವನ್ನು “ನಿಖರತೆ, ಶಕ್ತಿ ಮತ್ತು ಪರಿಪೂರ್ಣ ಸಮತೋಲನದ ಸಂಗಮ” ಎಂದು ಬಣ್ಣಿಸಿದೆ. ಈ ರೋಬೋಟ್‌ಗಳು ಕೇವಲ ನೃತ್ಯ ಮಾತ್ರವಲ್ಲದೆ, ನಂಚಕ್ (Nunchucks) ಬಳಸುವುದು, ಬ್ಯಾಕ್-ಫ್ಲಿಪ್ ಮಾಡುವುದು, ಗಂಟೆಗೆ ಸುಮಾರು 14 ಕಿ.ಮೀ ವೇಗದಲ್ಲಿ ಓಡುವುದು, ಅಡೆತಡೆಗಳನ್ನು ಜಿಗಿಯುವುದು ಮತ್ತು ಬ್ಯಾಕ್-ಫ್ಲಿಪ್ (Back-flip) ಮಾಡುವ ಮೂಲಕ ಇವು ಮನುಷ್ಯರಿಗಿಂತ ತಾವೇನು ಕಡಿಮೆ ಇಲ್ಲ ಎಂದು ತೋರಿಸಿಕೊಟ್ಟವು.

ಜಗತ್ತಿನ ಒಟ್ಟು ಹ್ಯೂಮನಾಯ್ಡ್ ರೋಬೋಟ್ ಮಾರುಕಟ್ಟೆಯಲ್ಲಿ ಚೀನಾದ ಪಾಲು ಬರೋಬ್ಬರಿ 90% ರಷ್ಟಿದೆ!

ಈ ಪ್ರದರ್ಶನದ ನೇತೃತ್ವ ವಹಿಸಿದ್ದ ‘ಯೂನಿಟ್ರೀ’ (Unitree) ಕಂಪನಿಯು ಈ ವರ್ಷ 20,000 ಹ್ಯೂಮನಾಯ್ಡ್ ರೋಬೋಟ್‌ಗಳನ್ನು ತಯಾರಿಸುವ ಗುರಿ ಹೊಂದಿದೆ. ಕಳೆದ ವರ್ಷ ಕಂಪನಿಯು 5,500 ಯುನಿಟ್‌ಗಳನ್ನು ಮಾರಾಟ ಮಾಡಿತ್ತು. ಜಾಗತಿಕ ಹ್ಯೂಮನಾಯ್ಡ್ ಮಾರುಕಟ್ಟೆಯಲ್ಲಿ ಚೀನಾ ಶೇ. 90ರಷ್ಟು ಪಾಲನ್ನು ಹೊಂದಿದೆ ಎಂದು ಅಂದಾಜಿಸಲಾಗಿದೆ. ಈ ರೋಬೋಟ್‌ಗಳನ್ನು ಪ್ರಮುಖವಾಗಿ ಕಾರು ತಯಾರಿಕಾ ಕಾರ್ಖಾನೆಗಳು ಮತ್ತು ಕೈಗಾರಿಕಾ ಕೆಲಸಗಳಿಗೆ ಬಳಸಲು ಯೋಜಿಸಲಾಗಿದೆ. 2025ರ ವೇಳೆಗೆ ಕೃಷಿ, ಕಾರ್ಖಾನೆ ಮತ್ತು ಮನೆಗಳಲ್ಲಿ ಸಾವಿರಾರು ರೋಬೋಟ್‌ಗಳನ್ನು ನಿಯೋಜಿಸಲು ಚೀನಾ ಸರ್ಕಾರ ಉದ್ದೇಶಿಸಿದೆ.

ಚೀನಾದ ಈ ವೇಗದ ಬೆಳವಣಿಗೆಯು ಪಾಶ್ಚಾತ್ಯ ರಾಷ್ಟ್ರಗಳಲ್ಲಿ, ವಿಶೇಷವಾಗಿ ಅಮೆರಿಕದಲ್ಲಿ ಆತಂಕ ಮೂಡಿಸಿದೆ. ಚೀನಾದ ರೋಬೋಟಿಕ್ಸ್ ಕಂಪನಿಗಳ ಮೇಲಿನ ಅವಲಂಬನೆಯು ಭವಿಷ್ಯದಲ್ಲಿ ಭದ್ರತಾ ಸವಾಲುಗಳನ್ನು ತಂದೊಡ್ಡಬಹುದು ಎಂದು ಅಮೆರಿಕದ ಥಿಂಕ್ ಟ್ಯಾಂಕ್ ‘ರಾಂಡ್’ (Rand) ಎಚ್ಚರಿಸಿದೆ. ಚೀನಾ ಸರ್ಕಾರವು ಈ ಕ್ಷೇತ್ರಕ್ಕೆ ಭಾರಿ ಪ್ರಮಾಣದ ಸಬ್ಸಿಡಿ ಮತ್ತು ತೆರಿಗೆ ವಿನಾಯಿತಿ ನೀಡುತ್ತಿರುವುದು ಈ ತಾಂತ್ರಿಕ ಕ್ರಾಂತಿಗೆ ವೇಗ ನೀಡಿದೆ.

ಚೀನಾದ ಈ ಮುನ್ನಡೆಗೆ ಪೈಪೋಟಿ ನೀಡಲು ಅಮೆರಿಕದ ಟೆಸ್ಲಾ (Tesla) ಕಂಪನಿಯೂ ಸಜ್ಜಾಗುತ್ತಿದೆ. ಎಲೋನ್ ಮಸ್ಕ್ ನೇತೃತ್ವದ ಟೆಸ್ಲಾ ತನ್ನ ‘ಆಪ್ಟಿಮಸ್’ (Optimus) ರೋಬೋಟ್ ಅನ್ನು ಅಭಿವೃದ್ಧಿಪಡಿಸುತ್ತಿದ್ದು, ವರ್ಷಕ್ಕೆ ಒಂದು ಮಿಲಿಯನ್ ಯುನಿಟ್‌ಗಳನ್ನು ಉತ್ಪಾದಿಸುವ ಗುರಿ ಹೊಂದಿದೆ.

ಕಳೆದ ವರ್ಷಕ್ಕೆ ಹೋಲಿಸಿದರೆ ಈ ಬಾರಿ ರೋಬೋಟ್‌ಗಳ ಚಲನವಲನದಲ್ಲಿ ಹೆಚ್ಚಿನ ಸುಧಾರಣೆ ಕಂಡುಬಂದಿದ್ದು, ತಂತ್ರಜ್ಞಾನವು ಎಷ್ಟು ವೇಗವಾಗಿ ವಿಕಸನಗೊಳ್ಳುತ್ತಿದೆ ಎಂಬುದಕ್ಕೆ ಇದು ಸಾಕ್ಷಿಯಾಗಿದೆ.