ಇರಾನ್‌ನ ಬಹುತೇಕ ಭಾಗಗಳಲ್ಲಿ, ವಿಶೇಷವಾಗಿ ಅದರ ರಾಜಧಾನಿ ತೆಹ್ರಾನ್‌ನಲ್ಲಿ ಆಕಾಶದಿಂದ ಇಸ್ರೇಲ್ ಕ್ಷಿಪಣಿಗಳ ಮಳೆ ಗೈಯುತ್ತಿದೆ. ಈಗಾಗಲೇ ಇಸ್ರೇಲ್ ತಾನು ಇರಾನ್ ಮೇಲೆ ʼಸಂಪೂರ್ಣ ವಾಯು ಪ್ರಾಬಲ್ಯʼವನ್ನು ಹೊಂದಿರುವುದಾಗಿ ಹೇಳಿಕೊಂಡಿದೆ. ಎರಡು ಪ್ರಮುಖ ಪ್ರತಿಸ್ಪರ್ಧಿಗಳ ನಡುವಿನ ಸಂಘರ್ಷವು ಘಾತೀಯವಾಗಿ ಬೆಳೆಯುತ್ತಿದೆ. ಈಗ ಇಸ್ರೇಲಿನ ಅಂತಹ ಒಂದು ವಾಯು ದಾಳಿಯಲ್ಲಿ, ಇಸ್ರೇಲಿ ಕ್ಷಿಪಣಿಯು ನೇರ ಪ್ರಸಾರ ಕಾರ್ಯಕ್ರಮ ನಡೆಯುತ್ತಿರುವಾಗಲೇ ಇರಾನಿನ ಸರ್ಕಾರಿ ಸುದ್ದಿ ಪ್ರಸಾರ ಕೇಂದ್ರ (ಟೆಲಿವಿಶನ್‌ ಕೇಂದ್ರ)ಕ್ಕೆ ಬಂದು ಅಪ್ಪಳಿಸಿದೆ.
ಇಸ್ರೇಲಿ ಪಡೆಗಳು ಸೋಮವಾರ ಐಆರ್‌ಐಬಿ (IRIB) ನಿರ್ವಹಿಸುವ ಇಸ್ಲಾಮಿಕ್ ರಿಪಬ್ಲಿಕ್ ಆಫ್ ಇರಾನ್ ನ್ಯೂಸ್ ನೆಟ್‌ವರ್ಕ್ (IRINN) ನ ಪ್ರಧಾನ ಕಚೇರಿಯ ಮೇಲೆ ದಾಳಿ ಮಾಡಿ, ಅದರ ನೇರ ಪ್ರಸಾರವನ್ನು ಹಠಾತ್ತನೆ ಸ್ಥಗಿತಗೊಳಿಸಿವೆ ಎಂದು ವರದಿಗಳು ತಿಳಿಸಿವೆ.
ಇರಾನ್ ಸರ್ಕಾರಿ ಟಿವಿ ಸ್ಟುಡಿಯೋದ ಮೇಲೆ ಕ್ಷಿಪಣಿ ಬಡಿದಿದ್ದನ್ನು ತೋರಿಸುವ ನಾಟಕೀಯ ದೃಶ್ಯಗಳು ಆನ್‌ಲೈನ್‌ನಲ್ಲಿ ಹೊರಹೊಮ್ಮಿವೆ. ಬುಲೆಟಿನ್ ಮಧ್ಯದಲ್ಲಿದ್ದ ನಿರೂಪಕಿ ಸಹರ್ ಇಮಾಮಿ ಎಂಬವರು ಎದ್ದು ಹೊರಡಬೇಕಾಯಿತು. ಕ್ಷಿಪಣಿಯ ಪ್ರಭಾವದಿಂದ ಇಡೀ ಸ್ಟುಡಿಯೋ ನಡುಗಿತು.
ಟಿವಿ ನಿರೂಪಕಿ ಇಸ್ರೇಲ್ ಬಗ್ಗೆ ನೇರ ಪ್ರಸಾರ ಕಾರ್ಯಕ್ರಮದಲ್ಲಿ ಟೀಕೆಯನ್ನು ಮಾಡುತ್ತಿರುವಾಗಲೇ ಸ್ಫೋಟ ಸಂಭವಿಸಿದೆ ಎಂದು ಇರಾನಿನ ಮಾಧ್ಯಮ ತಿಳಿಸಿದೆ. ಕ್ಷಿಪಣಿ ಟಿವಿ ಕೇಂದ್ರದಕ್ಕೆ ಅಪ್ಪಳಿಸಿದ ನಂತರ ನಿರೂಪಕಿ ಅರ್ಧದಲ್ಲಿಯೇ ಎದ್ದುಹೋಗಿರುವುದು ವೀಡಿಯೊದಲ್ಲಿ ಕಂಡುಬಂದಿದೆ.
ನಿರೂಪಕಿ ಅರ್ಧದಿಂದ ಎದ್ದುಹೋದ ಕ್ಷಣಗಳ ನಂತರ, ಒಂದು ಸ್ಫೋಟ ಸಂಭವಿಸಿತು, ಅವರು ಕ್ಯಾಮೆರಾ ಬಿಟ್ಟು ಹೊರನಡೆದಾಗ ಸಂಭವಿಸಿದ ಸ್ಫೋಟವು ಅವರ ಹಿಂದಿನ ಪರದೆಯನ್ನು ಛಿದ್ರಗೊಳಿಸಿತು. ನಂತರ ಚಾನೆಲ್ ಇದ್ದಕ್ಕಿದ್ದಂತೆ ಪೂರ್ವ-ರೆಕಾರ್ಡ್ ಮಾಡಿದ ಕಾರ್ಯಕ್ರಮಕ್ಕೆ ಬದಲಾಯಿಸಿತು.
ಇಸ್ರೇಲ್ ದಾಳಿಯ ನಂತರ ಐಆರ್‌ಐಬಿ ದಟ್ಟವಾದ ಕಪ್ಪು ಹೊಗೆಯಿಂದ ಆವೃತವಾಗಿರುವ ದೃಶ್ಯವನ್ನು ಇರಾನ್‌ನ ಸರ್ಕಾರಿ ಮಾಧ್ಯಮ ಸೆರೆಹಿಡಿದಿದೆ. ಐಆರ್‌ಐಬಿ ಪ್ರಧಾನ ಕಚೇರಿಯ ಮೇಲೆ ಇಸ್ರೇಲ್ ನಡೆಸಿದ ದಾಳಿಯ ನಂತರ, ಸಂಕೀರ್ಣದಾದ್ಯಂತ ಭಗ್ನಾವಶೇಷಗಳು ಹರಡಿಕೊಂಡಿದ್ದವು.
ಇದಕ್ಕೂ ಮೊದಲು, ಇಸ್ರೇಲ್ ಪಶ್ಚಿಮ ತೆಹ್ರಾನ್‌ನಲ್ಲಿರುವ ಮಿಲಿಟರಿ ನೆಲೆಯ ಮೇಲೆ ದಾಳಿ ಮಾಡಿತ್ತು ಮತ್ತು ಇರಾನ್ ರಾಜಧಾನಿಯ ಹಲವಾರು ಭಾಗಗಳಲ್ಲಿ ಸ್ಫೋಟಗಳ ಶಬ್ದ ಕೇಳಿಬಂದಿತ್ತು.
ಘಟನೆ ಸಂಭವಿಸುವ ಕೇವಲ ಒಂದು ಗಂಟೆ ಮೊದಲು, ಟಿವಿ ಸ್ಟುಡಿಯೋಗಳು ನೆಲೆಗೊಂಡಿರುವ ತೆಹ್ರಾನ್‌ನ ಭಾಗದಿಂದ ಜನರನ್ನು ಸ್ಥಳಾಂತರಿಸುವಂತೆ ಇಸ್ರೇಲ್ ಎಚ್ಚರಿಕೆ ನೀಡಿತ್ತು.
ನಿಮ್ಮ ಕಾಮೆಂಟ್ ಬರೆಯಿರಿ