ಕೈರೋ (ಈಜಿಪ್ಟ್): ಈಜಿಪ್ಟ್ನಲ್ಲಿ ನಡೆದ ಗಾಜಾ ಶಾಂತಿ ಶೃಂಗಸಭೆಯಲ್ಲಿ ಪಾಕಿಸ್ತಾನದ ಪ್ರಧಾನಿ ಶೆಹಬಾಜ್ ಷರೀಫ್ ಅವರು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರನ್ನು ಅತಿಯಾಗಿ ಹೊಗಳಿದ್ದರೂ, ಅದಾದ ಕೆಲವೇ ಕ್ಷಣಗಳಲ್ಲಿ ಮುಜುಗರದ ಸನ್ನಿವೇಶ ಎದುರಿಸಬೇಕಾಯಿತು. ಟ್ರಂಪ್ ಅವರು ಷರೀಫ್ ಕಡೆಗೆ ತಿರುಗಿ ನಕ್ಕು, “ಭಾರತ ಮತ್ತು ಪಾಕಿಸ್ತಾನ ತುಂಬಾ ಚೆನ್ನಾಗಿ ಒಟ್ಟಿಗೆ ಬದುಕುತ್ತವೆಯೇ?” ಎಂದು ಪ್ರಶ್ನಿಸಿದ ಪ್ರಸಂಗ ನಡೆಯಿತು.
ವಿಶ್ವ ನಾಯಕರ ಮುಂದೆ ಮಾತನಾಡುತ್ತಿದ್ದ ಟ್ರಂಪ್ ಅವರು, ಪಾಕಿಸ್ತಾನದ ಪ್ರಧಾನಿ ಷರೀಫ್ ಅವರ ಉಪಸ್ಥಿತಿಯನ್ನು ಒಪ್ಪಿಕೊಂಡರೂ, ಈ ಸಭೆಗೆ ಪಾಕಿಸ್ತಾನದ ಸೇನಾ ಮುಖ್ಯಸ್ಥ ಅಸಿಮ್ ಮುನೀರ್ ಅವರು ಬರಬಹುದೆಂದು ತಾವು ನಿರೀಕ್ಷಿಸಿದ್ದಾಗಿ ತಕ್ಷಣವೇ ಸೇರಿಸಿದರು.
ಸೇನಾ ಮುಖ್ಯಸ್ಥರ ಹೆಸರು ಪ್ರಸ್ತಾಪದಿಂದ ಮುಜುಗರ
ಷರೀಫ್ ಅವರ ಮುಂದೆಯೇ ಟ್ರಂಪ್ ನೀಡಿದ ಈ ಹೇಳಿಕೆ ಪಾಕಿಸ್ತಾನಿ ಪ್ರಧಾನಿಗೆ ಸ್ಪಷ್ಟ ಇರುಸುಮುರುಸು ಉಂಟುಮಾಡಿತು. ಅವರು ಟ್ರಂಪ್ ಹಿಂದೆ ನಿಂತು ನಗುವ ಮೂಲಕ ಅಹಿತಕರ ಪರಿಸ್ಥಿತಿಯನ್ನು ನಿಭಾಯಿಸಲು ಪ್ರಯತ್ನಿಸಿದರು. “ಪಾಕಿಸ್ತಾನದ ಪ್ರಧಾನಿ ಷರೀಫ್ ಅವರು ಇಲ್ಲಿದ್ದಾರೆ, ಮತ್ತು ನಾನು ಹೇಳಲೇಬೇಕು, ಪಾಕಿಸ್ತಾನದಿಂದ ನನ್ನ ನೆಚ್ಚಿನ ಫೀಲ್ಡ್ ಮಾರ್ಷಲ್ ಇಲ್ಲಿಲ್ಲ, ಆದರೆ ಪ್ರಧಾನಿ ಇಲ್ಲಿದ್ದಾರೆ. ನೀವು ಅವರಿಗೆ ಶುಭಾಶಯಗಳನ್ನು ಮುಟ್ಟಿಸುವಿರಿ. ಎಲ್ಲಿದ್ದೀರಿ?” ಎಂದು ಟ್ರಂಪ್ ಕೇಳಿದರು. ಈ ವೇಳೆ ಷರೀಫ್ ಟ್ರಂಪ್ ಹಿಂದೆ ಮುಜುಗರದಿಂದ ನಗುತ್ತಾ ನಿಂತಿದ್ದರು.
ಕೆಲವೇ ಕ್ಷಣಗಳ ನಂತರ, ಅಮೆರಿಕ ಅಧ್ಯಕ್ಷರು ಭಾರತವನ್ನು ಶ್ಲಾಘಿಸಿದರು, ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅವರನ್ನು “ಅತ್ಯಂತ ಒಳ್ಳೆಯ ಸ್ನೇಹಿತ” ಎಂದು ಕರೆದು, ಅವರು “ಅದ್ಭುತ ಕೆಲಸ” ಮಾಡಿದ್ದಾರೆ ಎಂದು ಹೇಳಿದರು.
ನಂತರ, ಪಾಕಿಸ್ತಾನಿ ಪ್ರಧಾನಿ ಶರೀಫ್ಗೆ ಮುಜುಗರವಾಗುವ ರೀತಿಯಲ್ಲಿ, ಟ್ರಂಪ್ ಅವರು ಷರೀಫ್ ಕಡೆಗೆ ತಿರುಗಿ, “ಪಾಕಿಸ್ತಾನ ಮತ್ತು ಭಾರತ ಬಹಳ ಚೆನ್ನಾಗಿ ಒಟ್ಟಿಗೆ ಬದುಕಲಿವೆ ಎಂದು ನಾನು ಭಾವಿಸುತ್ತೇನೆ, ಅಲ್ಲವೇ?” ಎಂದು ಪ್ರಶ್ನಿಸಿದರು.
ಇದು ಅನಿರೀಕ್ಷಿತ ಪ್ರಶ್ನೆಯಾದ ಕಾರಣ, ಷರೀಫ್ ಮುಜುಗರದಿಂದ ನಕ್ಕರು. ಟ್ರಂಪ್ ಮುಂದುವರಿಸಿ, “ಅವರು ಬದುಕುತ್ತಾರೆ, ಖಂಡಿತ ಬದುಕುತ್ತಾರೆ… ಮತ್ತು ಅವರು ಇಬ್ಬರು ಮಹಾನ್… ನಾನು ನಿಮಗೆ ಹೇಳುತ್ತೇನೆ… ನಾಯಕರು, ನನ್ನ ಮಟ್ಟಿಗೆ ಮಹಾನ್ ನಾಯಕರು” ಎಂದರು.
ನಂತರ ವೇದಿಕೆ ಏರಿದ ಷರೀಫ್, “ಭಾರತ-ಪಾಕ್ ಯುದ್ಧವನ್ನು ನಿಲ್ಲಿಸಿದ್ದಕ್ಕಾಗಿ” ಟ್ರಂಪ್ಗೆ ಧನ್ಯವಾದ ಅರ್ಪಿಸಿದರು. ಶೃಂಗಸಭೆಯಲ್ಲಿ ಟ್ರಂಪ್ ಅವರ ನಾಯಕತ್ವವನ್ನು ಶ್ಲಾಘಿಸಿದರು. ಪಾಕಿಸ್ತಾನದ ಪ್ರಧಾನಿ ಶರೀಫ್, “ದಕ್ಷಿಣ ಏಷ್ಯಾದಲ್ಲಿ ಮಾತ್ರವಲ್ಲದೆ ಮಧ್ಯಪ್ರಾಚ್ಯದಲ್ಲಿಯೂ ಲಕ್ಷಾಂತರ ಜನರ ಜೀವಗಳನ್ನು ಉಳಿಸಿದ್ದಕ್ಕಾಗಿ” ಟ್ರಂಪ್ ಅವರನ್ನು ಮತ್ತೊಮ್ಮೆ ನೊಬೆಲ್ ಶಾಂತಿ ಪ್ರಶಸ್ತಿಗೆ ನಾಮನಿರ್ದೇಶನ ಮಾಡಲು ಬಯಸುವುದಾಗಿ ಹೇಳಿದರು.
ಬಂಧಿತರ ಬಿಡುಗಡೆ ಮತ್ತು ಶಾಂತಿ ಶೃಂಗಸಭೆ
ಸೋಮವಾರ, ಕದನ ವಿರಾಮ ಒಪ್ಪಂದದ ಅಡಿಯಲ್ಲಿ ಹಮಾಸ್ ಗಾಜಾದಿಂದ ಕೊನೆಯ ಜೀವಂತ ಇಸ್ರೇಲಿ ಒತ್ತೆಯಾಳುಗಳನ್ನು ಬಿಡುಗಡೆ ಮಾಡಿತು ಮತ್ತು ಇಸ್ರೇಲ್ ಪ್ಯಾಲೆಸ್ಟೀನ್ ಕೈದಿಗಳನ್ನು ಬಸ್ಗಳಲ್ಲಿ ಕಳುಹಿಸಿತು. ಇದರ ಬೆನ್ನಲ್ಲೇ ಡೊನಾಲ್ಡ್ ಟ್ರಂಪ್ ಅವರು ಎರಡು ವರ್ಷಗಳ ಯುದ್ಧ ಕೊನೆಗೊಂಡಿದೆ ಎಂದು ಘೋಷಿಸಿದರು.
ಕೆಲವೇ ಗಂಟೆಗಳ ನಂತರ, ಗಾಜಾ ಪಟ್ಟಿಯ ಭವಿಷ್ಯ ಮತ್ತು ವಿಶಾಲ ಪ್ರಾದೇಶಿಕ ಶಾಂತಿಯ ಸಾಧ್ಯತೆಗಳ ಕುರಿತು ಚರ್ಚಿಸಲು ಟ್ರಂಪ್ ಅವರು ಈಜಿಪ್ಟ್ನಲ್ಲಿ ಮುಸ್ಲಿಂ ಮತ್ತು ಯುರೋಪಿಯನ್ ನಾಯಕರ ಸಭೆಯನ್ನು ಕರೆದರು. ಈ ಸಭೆಗೆ ಹಮಾಸ್ ಮತ್ತು ಇಸ್ರೇಲ್ ಎರಡೂ ಗೈರುಹಾಜರಾಗಿದ್ದವು.
ನಿಮ್ಮ ಕಾಮೆಂಟ್ ಬರೆಯಿರಿ