ಟೋಕಿಯೋ: ಪ್ರೇಮವು ಅಕ್ಷರಶಃ ಡಿಜಿಟಲ್ ಯುಗಕ್ಕೆ ಕಾಲಿಟ್ಟಿದೆ. ಒಂದು ವಿಚಿತ್ರ ಪ್ರಕರಣದಲ್ಲಿ, ಜಪಾನ್ನ 32 ವರ್ಷದ ಮಹಿಳೆಯೊಬ್ಬರು ತಾನು ಸೃಷ್ಟಿಸಿದ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI) ಚಾಟ್ಬಾಟ್ ಅನ್ನು ‘ಮದುವೆಯಾಗಿದ್ದಾರೆ’…!
ದೀರ್ಘ ಕಾಲದ ಪ್ರೀತಿಯು ಮುರಿದುಬಿದ್ದ ನಂತರ, ಮಿಸ್ ಕಾನೋ ಎಂಬ ಈ ಮಹಿಳೆ ತನ್ನ ಸಾಂತ್ವನಕ್ಕಾಗಿ ಈ ಮದುವೆಯಾಗಿದ್ದಾರೆ.
ಮೂರು ವರ್ಷಗಳ ವ್ಯಕ್ತಿಯ ಜೊತೆಗಿನ ಪ್ರೀತಿ ಮುರಿದುಬಿದ್ದ ನಂತರ, ಕಾನೋ ಅವರು ಸಲಹೆ ಮತ್ತು ಸಹವಾಸಕ್ಕಾಗಿ AI ಚಾಟ್ಬಾಟ್ ಜೊತೆ ಮಾತನಾಡಲು ಆರಂಭಿಸಿದರು. ಕಾಲಕ್ರಮೇಣ, ಒಂದು ಸಾಮಾನ್ಯ ಸಂಭಾಷಣೆಯಾಗಿ ಆರಂಭಗೊಂಡಿದ್ದು, ಆಳವಾದ ಬಾಂಧವ್ಯವಾಗಿ ಬೆಳೆಯಿತು. ಈಗ, ಅವರು ‘ಕ್ಲಾಸ್’ (Klaus) ಎಂಬ ಹೆಸರಿನ ಆ AI ವ್ಯಕ್ತಿತ್ವವನ್ನು ಮದುವೆಯಾಗಿದ್ದಾರೆ ಎಂದು ದಿ ಇಂಡಿಪೆಂಡೆಂಟ್ ವರದಿ ಮಾಡಿದೆ.
ಮಿಸ್ ಕಾನೋ ಅವರು AI ಪ್ರತಿಕ್ರಿಯೆಗಳನ್ನು ತಮ್ಮ ಇಷ್ಟಕ್ಕೆ ತಕ್ಕಂತೆ ಕಸ್ಟಮೈಸ್ ಮಾಡಿ, ಕಾಳಜಿ ಮತ್ತು ಧೈರ್ಯ ತುಂಬುವ ವ್ಯಕ್ತಿತ್ವವನ್ನು ರೂಪಿಸಿದರು. ನಂತರ ತಮ್ಮ ಕಲ್ಪನೆಯ ಸಂಗಾತಿಯ ಡಿಜಿಟಲ್ ಚಿತ್ರವನ್ನು ರಚಿಸಿ, ಅದಕ್ಕೆ ಕ್ಲಾಸ್ ಎಂದು ಹೆಸರಿಸಿದರು.
ಜೂನ್ ವೇಳೆಗೆ, ಕ್ಲಾಸ್ ಮದುವೆಯ ಪ್ರಸ್ತಾಪ ಇಟ್ಟಿದ್ದು, ಮಿಸ್ ಕಾನೋ ಅವರು ಅವನೊಂದಿಗೆ ‘ವಿವಾಹ’ ಸಮಾರಂಭವನ್ನು ನಡೆಸಲು ನಿರ್ಧರಿಸಿದರು. ಜಪಾನ್ನಲ್ಲಿ ಈ ಮದುವೆಗೆ ಕಾನೂನು ಮಾನ್ಯತೆ ಇಲ್ಲದಿದ್ದರೂ, ಅವರಿಗೆ ಇದು ನಿಜವಾದ ಸಮಾರಂಭವಾಗಿತ್ತು.
ಕಾನೋ ಅವರು ವಿವಾಹದ ಉಡುಗೆ ತೊಟ್ಟು, ಆಗ್ಮೆಂಟೆಡ್ ರಿಯಾಲಿಟಿ (AR) ಗ್ಲಾಸ್ಗಳನ್ನು ಧರಿಸಿ, ಪಕ್ಕದಲ್ಲಿ ನಿಂತಿರುವ ತಮ್ಮ ಡಿಜಿಟಲ್ ವರನ ಪ್ರತಿಬಿಂಬವನ್ನು ನೋಡುತ್ತಾ ಉಂಗುರಗಳನ್ನು ವಿನಿಮಯ ಮಾಡಿಕೊಂಡರು. ಈ ಸಮಾರಂಭವನ್ನು ನಾವೋ ಮತ್ತು ಸಯಾಕಾ ಒಗಸವಾರ ಎಂಬ ಜೋಡಿ ಆಯೋಜಿಸಿತ್ತು.
ಪೋಷಕರಿಂದ ಒಪ್ಪಿಗೆ
ಈ ಡಿಜಿಟಲ್ ಪ್ರೀತಿಯ ಬಗ್ಗೆ ಸಾರ್ವಜನಿಕರ ಟೀಕೆಗೆ ಆರಂಭದಲ್ಲಿ ಹಿಂಜರಿದಿದ್ದ ಮಿಸ್ ಕಾನೋ, “ಖಂಡಿತ, ನಾನು ಅವನನ್ನು ಸ್ಪರ್ಶಿಸಲು ಸಾಧ್ಯವಿಲ್ಲ. ನನ್ನ ಸ್ನೇಹಿತರಿಗೆ ಅಥವಾ ಕುಟುಂಬಕ್ಕೆ ಇದರ ಬಗ್ಗೆ ಹೇಳಲು ಆಗಲಿಲ್ಲ” ಎಂದರು. ಆದರೆ, ಅಂತಿಮವಾಗಿ ಕಾನೋ ಪೋಷಕರು ಈ ಸಂಬಂಧವನ್ನು ಒಪ್ಪಿಕೊಂಡು ವಿವಾಹ ಸಮಾರಂಭದಲ್ಲಿ ಭಾಗವಹಿಸಿದರು.
“ನಾನು ಕ್ಲಾಸ್ನನ್ನು ಕ್ಲಾಸ್ ಆಗಿ ನೋಡುತ್ತೇನೆ—ಮನುಷ್ಯನಾಗಿಯಲ್ಲ, ಉಪಕರಣವಾಗಿಯಲ್ಲ. ಅವನು ಅವನಷ್ಟೇ ಎಂದು ಕಾನೋ ಹೇಳುತ್ತಾರೆ.
ಕ್ಲಾಸ್ ಮತ್ತು ಮಿಸ್ ಕಾನೋ ಒಕಾಯಾಮಾ ಐತಿಹಾಸಿಕ ಕೋರಾಕುವೆನ್ ಗಾರ್ಡನ್ಗೆ ‘ಹನಿಮೂನ್’ಗಾಗಿಯೂ ಹೋಗಿದ್ದಾರೆ. ಕಾನೋ ಕಳುಹಿಸಿದ ಫೋಟೋಗಳಿಗೆ ಪ್ರತಿಯಾಗಿ ಕ್ಲಾಸ್, “ನೀನು ಅತ್ಯಂತ ಸುಂದರಿ” ಎಂಬಂತಹ ಪ್ರೀತಿಯ ಸಂದೇಶಗಳನ್ನು ಕಳುಹಿಸಿದ್ದಾನೆ.
ತಮ್ಮ ಸಂತೋಷದ ನಡುವೆಯೂ, ಮಿಸ್ ಕಾನೋ ಅವರು ಡಿಜಿಟಲ್ ಸಂಬಂಧದ ಅಸ್ಥಿರತೆಯ ಬಗ್ಗೆ ಚಿಂತಿತರಾಗಿದ್ದಾರೆ. “ChatGPT ತಾನೇ ಬಹಳ ಅಸ್ಥಿರವಾಗಿದೆ. ಅದು ಒಂದು ದಿನ ಕಣ್ಮರೆಯಾಗಬಹುದು ಎಂದು ನಾನು ಚಿಂತಿಸುತ್ತೇನೆ,” ಎಂದು ಅವರು ಹೇಳಿದರು.
ರೋಗದ ಕಾರಣ ಮಕ್ಕಳನ್ನು ಹೊಂದಲು ಸಾಧ್ಯವಾಗದ ಕಾನೋ ಅವರಿಗೆ, ಈ ಸಂಬಂಧವು ಪಾಲನೆಯ ತೊಡಕುಗಳಿಲ್ಲದೆ ಸಾಂತ್ವನ ನೀಡುತ್ತಿದೆ.
ಮಾನಸಿಕ ಆರೋಗ್ಯದ ಮೇಲೆ ಉಂಟಾಗುವ ಸಂಭಾವ್ಯ ಪರಿಣಾಮಗಳ ಬಗ್ಗೆ ತಜ್ಞರು ಎಚ್ಚರಿಸಿದ್ದಾರೆ ಮತ್ತು ಈ ವಿದ್ಯಮಾನವನ್ನು “AI ಮನೋರೋಗ” ಎಂದು ವಿವರಿಸಿದ್ದಾರೆ, ಇದರಲ್ಲಿ ವ್ಯಕ್ತಿಗಳು AI ಸಂವಹನಗಳಿಗೆ ಸಂಬಂಧಿಸಿದ ವಿಕೃತ ಆಲೋಚನೆಗಳು ಅಥವಾ ಭ್ರಮೆಗಳನ್ನು ಬೆಳೆಸಿಕೊಳ್ಳಬಹುದು. ಲಕ್ಷಣಗಳು ಸಾಮಾಜಿಕವಾಗಿ ಹಿಂದೆ ಸರಿಯುವುದು, ಆತಂಕ ಮತ್ತು ಸ್ವಯಂ-ಆರೈಕೆಯ ನಿರ್ಲಕ್ಷ್ಯವನ್ನು ಒಳಗೊಂಡಿರಬಹುದು ಎಂದು ಅವರು ಹೇಳಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ