ಇಸ್ಲಾಮಾಬಾದ್/ವಾಷಿಂಗ್ಟನ್ : ಪಾಕಿಸ್ತಾನದ ಅತ್ಯಂತ ಪ್ರಭಾವಿ ಸೇನಾ ಮುಖ್ಯಸ್ಥ ಫೀಲ್ಡ್ ಮಾರ್ಷಲ್ ಅಸಿಮ್ ಮುನೀರ್ ಅವರು ಈಗ ಇಕ್ಕಟ್ಟಿಗೆ ಸಿಲುಕಿದ್ದಾರೆ. ಪ್ಯಾಲೆಸ್ತೈನ್ನ ಯುದ್ಧ ಪೀಡಿತ ಗಾಜಾ ಪಟ್ಟಿಯಲ್ಲಿ ಶಾಂತಿ ಸ್ಥಾಪಿಸಲು ಪಾಕಿಸ್ತಾನಿ ಸೈನ್ಯವನ್ನು ಕಳುಹಿಸುವಂತೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಒತ್ತಡ ಹೇರುತ್ತಿರುವುದು ಮುನೀರ್ ಪಾಲಿಗೆ ನುಂಗಲಾರದ ತುತ್ತಾಗಿ ಪರಿಣಮಿಸಿದೆ.
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಪ್ರಸ್ತಾವಿತ ’20-ಅಂಶಗಳ ಗಾಜಾ ಯೋಜನೆ’ಯ ಅನ್ವಯ, ಇಸ್ರೇಲ್ ಪಡೆಗಳು ಗಾಜಾದಿಂದ ಹಿಂತೆಗೆದ ನಂತರ ಅಲ್ಲಿನ ಪುನರ್ನಿರ್ಮಾಣ ಮತ್ತು ಆರ್ಥಿಕ ಚೇತರಿಕೆಯ ಉಸ್ತುವಾರಿಯನ್ನು ಮುಸ್ಲಿಂ ಬಹುಸಂಖ್ಯಾತ ರಾಷ್ಟ್ರಗಳ ಸೈನ್ಯಕ್ಕೆ ವಹಿಸಲು ನಿರ್ಧರಿಸಲಾಗಿದೆ. ಹಮಾಸ್ ಮತ್ತು ಇಸ್ರೇಲ್ ನಡುವಿನ ಎರಡು ವರ್ಷಗಳ ಭೀಕರ ಯುದ್ಧದಿಂದ ಜರ್ಜರಿತವಾಗಿರುವ ಗಾಜಾದಲ್ಲಿ ಹಮಾಸ್ ಗುಂಪನ್ನು ಶಸ್ತ್ರರಹಿತಗೊಳಿಸುವುದು ಈ ಪಡೆಯ ಪ್ರಮುಖ ಉದ್ದೇಶವಾಗಿದೆ.
ಮುನೀರ್ ಮುಂದಿರುವ ‘ಇಕ್ಕಟ್ಟಿನ’ ಸವಾಲುಗಳು
ರಾಯಿಟರ್ಸ್ ವರದಿಗಳ ಪ್ರಕಾರ, ಅಸಿಮ್ ಮುನೀರ್ ಅವರು ಮುಂದಿನ ವಾರಗಳಲ್ಲಿ ವಾಷಿಂಗ್ಟನ್ಗೆ ಭೇಟಿ ನೀಡಿ ಟ್ರಂಪ್ ಅವರನ್ನು ಭೇಟಿಯಾಗಲಿದ್ದಾರೆ. ಆರು ತಿಂಗಳ ಅವಧಿಯಲ್ಲಿ ಇದು ಇಬ್ಬರ ನಡುವಿನ ಮೂರನೇ ಭೇಟಿಯಾಗಲಿದ್ದು, ಗಾಜಾಕ್ಕೆ ಸೈನ್ಯ ಕಳುಹಿಸುವ ವಿಷಯವೇ ಇಲ್ಲಿ ಪ್ರಮುಖ ಚರ್ಚೆಯಾಗಲಿದೆ.
ಪಾಕಿಸ್ತಾನದ ಆರ್ಥಿಕ ಪರಿಸ್ಥಿತಿ ಹದಗೆಟ್ಟಿದ್ದು, ಅಮೆರಿಕದ ಹೂಡಿಕೆ ಮತ್ತು ಭದ್ರತಾ ನೆರವು ಮುನೀರ್ ಅವರಿಗೆ ಅನಿವಾರ್ಯವಾಗಿದೆ. ಟ್ರಂಪ್ ಅವರ ಮನವಿಯನ್ನು ತಿರಸ್ಕರಿಸಿದರೆ ಅಮೆರಿಕದ ಕೆಂಗಣ್ಣಿಗೆ ಗುರಿಯಾಗುವ ಭೀತಿ ಇದೆ.
ದೇಶೀಯ ಆಕ್ರೋಶದ ಭಯ
ಪಾಕಿಸ್ತಾನದ ಇಸ್ಲಾಮಿಕ್ ಸಂಘಟನೆಗಳು ಅಮೆರಿಕ ಮತ್ತು ಇಸ್ರೇಲ್ ವಿರೋಧಿ ನಿಲುವನ್ನು ಹೊಂದಿವೆ. ಒಂದು ವೇಳೆ ಮುನೀರ್ ಗಾಜಾಕ್ಕೆ ಸೈನ್ಯ ಕಳುಹಿಸಿದರೆ, ದೇಶದೊಳಗೆ ದೊಡ್ಡ ಮಟ್ಟದ ಪ್ರತಿಭಟನೆ ಮತ್ತು ಹಿಂಸಾಚಾರ ಭುಗಿಲೇಳುವ ಸಾಧ್ಯತೆಯಿದೆ. “ಅಸಿಮ್ ಮುನೀರ್ ಇಸ್ರೇಲ್ ಪರವಾಗಿ ಕೆಲಸ ಮಾಡುತ್ತಿದ್ದಾರೆ” ಎಂಬ ಆರೋಪ ಕೇಳಿಬರುವ ಸಾಧ್ಯತೆ ಇದೆ ಎಂದು ತಜ್ಞರು ಎಚ್ಚರಿಸಿದ್ದಾರೆ.
ಪಾಕಿಸ್ತಾನದ ನಿಲುವು ಏನು?
ಪಾಕಿಸ್ತಾನದ ವಿದೇಶಾಂಗ ಸಚಿವ ಇಶಾಕ್ ದಾರ್ ಅವರು ಮಾತನಾಡಿ, “ಶಾಂತಿ ರಕ್ಷಣೆಗಾಗಿ ಸೈನ್ಯ ಕಳುಹಿಸುವ ಬಗ್ಗೆ ಪರಿಗಣಿಸಬಹುದು, ಆದರೆ ಹಮಾಸ್ ಅನ್ನು ಶಸ್ತ್ರರಹಿತಗೊಳಿಸುವುದು ನಮ್ಮ ಕೆಲಸವಲ್ಲ” ಎಂದು ಹೇಳಿದ್ದಾರೆ. ಇದರ ನಡುವೆ, ಮುನೀರ್ ಅವರು ಇಂಡೋನೇಷ್ಯಾ, ಟರ್ಕಿ, ಸೌದಿ ಅರೇಬಿಯಾ ಮತ್ತು ಈಜಿಪ್ಟ್ನಂತಹ ಮುಸ್ಲಿಂ ರಾಷ್ಟ್ರಗಳ ನಾಯಕರೊಂದಿಗೆ ಸಮಾಲೋಚನೆ ನಡೆಸುತ್ತಿರುವುದು ಕುತೂಹಲ ಮೂಡಿಸಿದೆ.
ಪಾಕಿಸ್ತಾನದ ಸಂವಿಧಾನ ತಿದ್ದುಪಡಿಯ ಮೂಲಕ 2030ರವರೆಗೆ ಸೇನಾ ಮುಖ್ಯಸ್ಥರಾಗಿ ಮುಂದುವರಿಯಲಿರುವ ಅಸಿಮ್ ಮುನೀರ್ ಅವರಿಗೆ ಜೀವಿತಾವಧಿಯವರೆಗೆ ‘ಫೀಲ್ಡ್ ಮಾರ್ಷಲ್’ ಪದವಿ ಮತ್ತು ಯಾವುದೇ ಕ್ರಿಮಿನಲ್ ಮೊಕದ್ದಮೆಗಳಿಂದ ವಿನಾಯಿತಿ ನೀಡಲಾಗಿದೆ. ಈ “ಅಪರಿಮಿತ ಅಧಿಕಾರ” ಹೊಂದಿರುವ ಮುನೀರ್ ಅವರು ಟ್ರಂಪ್ ಅವರ ಇಚ್ಛೆಯಂತೆ ನಡೆಯುತ್ತಾರೋ ಅಥವಾ ದೇಶದೊಳಗಿನ ಆಕ್ರೋಶಕ್ಕೆ ಅಂಜಿ ಹಿಂದೆ ಸರಿಯುತ್ತಾರೋ ಎಂಬುದನ್ನು ಕಾದು ನೋಡಬೇಕಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ