ಇರಾನ್ ಮತ್ತು ಅಮೆರಿಕ ನಡುವಿನ ಸುದೀರ್ಘ ಸಂಘರ್ಷಕ್ಕೆ ಅಂತ್ಯಹಾಡಬಲ್ಲ ಒಂದು ಮಹತ್ವದ ರಾಜತಾಂತ್ರಿಕ ಸಂಧಾನವು ಅಂತಿಮ ಕ್ಷಣದಲ್ಲಿ ಹಳಿ ತಪ್ಪಿದೆ. ಪಾಕಿಸ್ತಾನದ ಇಸ್ಲಾಮಾಬಾದ್ನಲ್ಲಿ ನಡೆದ ಸುದೀರ್ಘ ಮಾತುಕತೆಯ ನಡುವೆಯೇ ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರು ಅಮೆರಿಕದ ಉಪಾಧ್ಯಕ್ಷ ಜೆ.ಡಿ. ವ್ಯಾನ್ಸ್ ಅವರಿಗೆ ಮಾಡಿದ ಒಂದು ಫೋನ್ ಕರೆ ಈ ಎಲ್ಲಾ ಬೆಳವಣಿಗೆಗಳಿಗೆ ಕಾರಣ ಎಂದು ಇರಾನ್ ಗಂಭೀರ ಆರೋಪ ಮಾಡಿದೆ.
ಪಾಕಿಸ್ತಾನದ ಇಸ್ಲಾಮಾಬಾದ್ನಲ್ಲಿ ಸುಮಾರು 21 ಗಂಟೆಗಳ ಕಾಲ ನಡೆದ ಸುದೀರ್ಘ ಮಾತುಕತೆಯ ನಂತರ ಯಾವುದೇ ಒಪ್ಪಂದವಿಲ್ಲದೆ ಜೆ.ಡಿ. ವ್ಯಾನ್ಸ್ ನಿರ್ಗಮಿಸಿದ್ದಾರೆ. ಇದರ ಬೆನ್ನಲ್ಲೇ ಇರಾನ್ ವಿದೇಶಾಂಗ ಸಚಿವ ಸೈಯದ್ ಅಬ್ಬಾಸ್ ಅರಾಘ್ಚಿ ಅವರು ಎಕ್ಸ್ (X) ನಲ್ಲಿ ಈ ಆರೋಪ ಮಾಡಿದ್ದಾರೆ.
ಸಂಧಾನದ ಮಧ್ಯದಲ್ಲೇ ನೆತನ್ಯಾಹು ಅವರು ವ್ಯಾನ್ಸ್ಗೆ ಕರೆ ಮಾಡಿದ್ದರಿಂದ ಅಮೆರಿಕದ ಗಮನ ಇರಾನ್ ಜೊತೆಗಿನ ಮಾತುಕತೆಯಿಂದ ಇಸ್ರೇಲ್ ಹಿತಾಸಕ್ತಿಯ ಕಡೆಗೆ ಬದಲಾಯಿತು ಎಂದು ಅವರು ಟೀಕಿಸಿದ್ದಾರೆ.
“ಯುದ್ಧದ ಮೂಲಕ ಏನನ್ನು ಸಾಧಿಸಲು ಸಾಧ್ಯವಾಗಲಿಲ್ಲವೋ ಅದನ್ನು ಸಂಧಾನದ ಮೇಜಿನ ಮೇಲೆ ಪಡೆಯಲು ಅಮೆರಿಕ ಪ್ರಯತ್ನಿಸಿತು” ಎಂದು ಅರಾಘ್ಚಿ ಕಿಡಿಕಾರಿದ್ದಾರೆ. ವ್ಯಾನ್ಸ್ ಅವರು ನಿರ್ಗಮನದ ಮೊದಲು ನಡೆಸಿದ ಪತ್ರಿಕಾಗೋಷ್ಠಿ ಅನಗತ್ಯವಾಗಿತ್ತು ಮತ್ತು ಇರಾನ್ ತನ್ನ ರಾಷ್ಟ್ರೀಯ ಸಾರ್ವಭೌಮತ್ವವನ್ನು ರಕ್ಷಿಸಲು ಬದ್ಧವಾಗಿದೆ ಎಂದು ಅವರು ಹೇಳಿದ್ದಾರೆ.
ಅಮೆರಿಕದ ಕಠಿಣ ಷರತ್ತುಗಳು ಮತ್ತು ಬಿಕ್ಕಟ್ಟು
ಇರಾನ್ ಅಧಿಕಾರಿಗಳು ಮತ್ತು ಪ್ರಾದೇಶಿಕ ಮಧ್ಯಸ್ಥಗಾರರ ಪ್ರಕಾರ, ಅಮೆರಿಕವು ಮಂಡಿಸಿದ ಬೇಡಿಕೆಗಳು ಅಸಮಂಜಸವಾಗಿದ್ದವು. ವಾಷಿಂಗ್ಟನ್ ಕೇವಲ ಹಾರ್ಮುಜ್ ಜಲಸಂಧಿಯಲ್ಲಿ ತನ್ನ ಹಡಗುಗಳ ಮುಕ್ತ ಸಂಚಾರವನ್ನಷ್ಟೇ ಬಯಸದೆ, ಇರಾನ್ ಎದುರು ಹಲವಾರು ಷರತ್ತುಗಳನ್ನು ಇಟ್ಟಿತ್ತು.
ಇರಾನ್ನ ಯುರೇನಿಯಂ ಪುಷ್ಟೀಕರಣ ಕಾರ್ಯಕ್ರಮವನ್ನು ಸಂಪೂರ್ಣವಾಗಿ ಸ್ಥಗಿತಗೊಳಿಸಬೇಕು.
ಇರಾನ್ ಬಳಿ ಇರುವ ಅಸ್ತಿತ್ವದಲ್ಲಿರುವ ಎಲ್ಲಾ ಯುರೇನಿಯಂ ದಾಸ್ತಾನನ್ನು ವರ್ಗಾಯಿಸಬೇಕು ಎಂದು ಅಮೆರಿಕ ಷರತ್ತುಗಳನ್ನು ಹಾಕಿತ್ತು. ಅಮೆರಿಕ ಉಪಾಧ್ಯಕ್ಷ ಜೆ.ಡಿ. ವ್ಯಾನ್ಸ್ ಇವುಗಳನ್ನು ಅಮೆರಿಕದ “ಅಂತಿಮ ಮತ್ತು ಅತ್ಯುತ್ತಮ ಕೊಡುಗೆ” ಎಂದು ಹೇಳಿದರು. ಆದರೆ ಇರಾನ್ ಇದನ್ನು ಸ್ಪಷ್ಟವಾಗಿ ತಿರಸ್ಕರಿಸಿದೆ. ಈ ಕುರಿತು ಶ್ವೇತಭವನ ಇದುವರೆಗೆ ಯಾವುದೇ ಅಧಿಕೃತ ಸ್ಪಷ್ಟನೆ ನೀಡಿಲ್ಲ.
ತೈಲ ಮಾರುಕಟ್ಟೆ ಮತ್ತು ಹಾರ್ಮುಜ್ ಬಿಕ್ಕಟ್ಟು
ಮಾತುಕತೆ ವಿಫಲವಾದ ಸುದ್ದಿ ಹೊರಬೀಳುತ್ತಿದ್ದಂತೆ ಜಾಗತಿಕ ಮಾರುಕಟ್ಟೆಯಲ್ಲಿ ತೈಲ ಬೆಲೆ ಏರಿಕೆಯ ಭೀತಿ ಎದುರಾಗಿದೆ. ಏಪ್ರಿಲ್ 9 ರ ಕದನ ವಿರಾಮಕ್ಕೆ ಮೊದಲು ಬ್ರೆಂಟ್ ಕ್ರೂಡ್ ಬೆಲೆ ಬ್ಯಾರೆಲ್ಗೆ $119 ಇತ್ತು. ಸಂಧಾನದ ಆಸೆಯಿಂದ ಅದು $95 ಕ್ಕೆ ಇಳಿದಿತ್ತು. ಆದರೆ ಈಗ ಮತ್ತೆ ಬೆಲೆ ಮೂರಂಕಿ ದಾಟುವ (Triple Digit) ಸಾಧ್ಯತೆ ಇದೆ.
ಮಾರ್ಚ್ ತಿಂಗಳಿನಿಂದ ಹಾರ್ಮುಜ್ ಜಲಸಂಧಿಯಲ್ಲಿ ವಾಣಿಜ್ಯ ಸಂಚಾರ ಬಹುತೇಕ ಶೂನ್ಯಕ್ಕೆ ತಲುಪಿದೆ. ಇರಾನ್ ಅಲ್ಲಿ ಡ್ರೋನ್, ಮಿಸೈಲ್ ಮತ್ತು ಮೈನ್ (ಸಮುದ್ರ ಬಂಬ್)ಗಳನ್ನು ನಿಯೋಜಿಸಿದ್ದಲ್ಲದೆ, ಪ್ರತಿ ಹಡಗಿಗೆ $1 ಮಿಲಿಯನ್ಗೂ ಅಧಿಕ ಶುಲ್ಕದ ಬೇಡಿಕೆಯಿಟ್ಟಿದೆ. ಅಂತಾರಾಷ್ಟ್ರೀಯ ಕಾನೂನಿನ ಪ್ರಕಾರ ಇದು ಕಾನೂನುಬಾಹಿರ ಎಂದು ಪರಿಗಣಿಸಲಾಗಿದೆ.
ಪ್ರಸ್ತುತ ಇರುವ ಎರಡು ವಾರಗಳ ಕದನ ವಿರಾಮ ಮುಗಿಯಲು ಕೇವಲ 9 ದಿನಗಳು ಮಾತ್ರ ಬಾಕಿ ಇವೆ. ಸಂಧಾನ ವಿಫಲವಾಗಿರುವುದರಿಂದ ಮುಂದಿನ ದಿನಗಳಲ್ಲಿ ಪರಿಸ್ಥಿತಿ ಮತ್ತಷ್ಟು ಉಲ್ಬಣಗೊಳ್ಳುವ ಲಕ್ಷಣಗಳು ದಟ್ಟವಾಗಿವೆ.
ನಿಮ್ಮ ಕಾಮೆಂಟ್ ಬರೆಯಿರಿ