ವಿಡಿಯೋ | ಬ್ರಿಕ್ಸ್‌ ಶೃಂಗಸಭೆಗೆ ಬಾಲಿವುಡ್‌ ಟಚ್‌ : ಕಿಶೋರಕುಮಾರ ಹಾಡು ಹಾಡಿ ಮನಗೆದ್ದ ಮಲೇಷ್ಯಾ ಪ್ರಧಾನಿ

ನವದೆಹಲಿ: 18ನೇ ಬ್ರಿಕ್ಸ್‌ (BRICS) ಶೃಂಗಸಭೆಯಲ್ಲಿ ಭಾಗವಹಿಸಲು ಭಾರತಕ್ಕೆ ಆಗಮಿಸಿದ್ದ ಮಲೇಷ್ಯಾ ಪ್ರಧಾನಿ ಅನ್ವರ್ ಇಬ್ರಾಹಿಂ ಅವರು ಬಾಲಿವುಡ್‌ ಹಾಡಿನ ಮೂಲಕ ಎಲ್ಲರ ಗಮನ ಸೆಳೆದಿದ್ದಾರೆ. ಬಹುಪಕ್ಷೀಯ ರಾಜತಾಂತ್ರಿಕ ಮಾತುಕತೆಗಳ ನಡುವೆಯೇ ಅವರು ಹಿಂದಿ ಸಿನೆಮಾದ ಕಿಶೋರಕುಮಾರ ಅವರ ಅಮರ ಗೀತೆ “ಖ್ವಾಬ್ ಹೋ ತುಮ್ ಯಾ ಕೋಯಿ ಹಕೀಕತ್” ಹಾಡನ್ನು ಹಾಡುವ ಮೂಲಕ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದಾರೆ.
ಬ್ರಿಕ್ಸ್‌ ಸದಸ್ಯ ರಾಷ್ಟ್ರದ (Partner Country) ನಾಯಕರಾಗಿ ನವದೆಹಲಿಯಲ್ಲಿ ನಡೆದ ಶೃಂಗಸಭೆಯಲ್ಲಿ ಪಾಲ್ಗೊಂಡಿದ್ದ ಅನ್ವರ್ ಇಬ್ರಾಹಿಂ, ಅಧಿಕೃತ ಕಾರ್ಯಕ್ರಮಗಳ ನಡುವಿನ ಅನೌಪಚಾರಿಕ ಮಾತುಕತೆಯೊಂದರಲ್ಲಿ 1965ರ ‘ತೀನ್ ದೇವಿಯಾನ್’ (Teen Devian) ಚಿತ್ರದಲ್ಲಿನ ಜನಪ್ರಿಯ ಪ್ರೇಮಗೀತೆಯನ್ನು ಹಾಡಿದರು. ಎಸ್‌.ಡಿ. ಬರ್ಮನ್ ಸಂಯೋಜಿಸಿದ್ದ ಈ ಹಾಡನ್ನು ಅವರು ಪಿಯಾನೋ ವಾದಕರ ಸಂಗಡ ಹಾಡಿದ್ದು, ಉಪಸ್ಥಿತರಿದ್ದವರಿಂದ ಮೆಚ್ಚುಗೆ ಗಳಿಸಿತು.

ತಮ್ಮ ಈ ಹಾಡಿನ ವಿಡಿಯೊವನ್ನು ಅನ್ವರ್ ಇಬ್ರಾಹಿಂ ಅವರು ಸಾಮಾಜಿಕ ಜಾಲತಾಣ ‘ಎಕ್ಸ್‌’ (X) ನಲ್ಲಿ ಹಂಚಿಕೊಂಡಿದ್ದಾರೆ. “ಗುರುಗಳೇ, ಸ್ವಲ್ಪ ಹೊತ್ತು ಹಾಡಲು ಅನುಮತಿ ಕೊಡುತ್ತೀರಾ?” ಎಂಬ ಅರ್ಥ ಬರುವ ಹಾಸ್ಯಮಯ ಮಲಯ್‌ ಭಾಷೆಯ ಶೀರ್ಷಿಕೆಯೊಂದಿಗೆ ಅವರು ವಿಡಿಯೊ ಪ್ರಕಟಿಸಿದ್ದು, ಕೆಲವೇ ಸಮಯದಲ್ಲಿ ಅದು ಭಾರತ ಮತ್ತು ಆಗ್ನೇಯ ಏಷ್ಯಾದ ಸಾಮಾಜಿಕ ಜಾಲತಾಣ ಬಳಕೆದಾರರ ಗಮನ ಸೆಳೆಯಿತು. ಸಾವಿರಾರು ಮಂದಿ ವಿಡಿಯೊವನ್ನು ವೀಕ್ಷಿಸಿ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ಭಾರತೀಯ ಸಂಸ್ಕೃತಿ ಹಾಗೂ ಸಿನಿಮಾಗಳ ಬಗ್ಗೆ ಅನ್ವರ್ ಇಬ್ರಾಹಿಂ ಅವರಿಗೆ ಇರುವ ವಿಶೇಷ ಅಭಿಮಾನ ಈ ಮೂಲಕ ಮತ್ತೊಮ್ಮೆ ವ್ಯಕ್ತವಾಗಿದೆ. ಹಿಂದಿ ಚಿತ್ರಗೀತೆಗಳ ಮೇಲಿನ ತಮ್ಮ ಆಸಕ್ತಿಯನ್ನು ಅವರು ಈ ಹಿಂದೆಯೂ ಹಲವು ಸಂದರ್ಭಗಳಲ್ಲಿ ಪ್ರದರ್ಶಿಸಿದ್ದರು. ಭಾರತಕ್ಕೆ ಸಂಬಂಧಿಸಿದ ದ್ವಿಪಕ್ಷೀಯ ಭೇಟಿಗಳ ವೇಳೆ ಕಿಶೋರಕುಮಾರ ಮತ್ತು ಮುಖೇಶ ಅವರ ಹಾಡುಗಳನ್ನು ಹಾಡುವ ಮೂಲಕ ಅವರು ತಮ್ಮ ಸಂಗೀತಾಸಕ್ತಿಯನ್ನು ತೋರಿಸಿದ್ದರು.
ಅಧಿಕೃತ ರಾಜತಾಂತ್ರಿಕ ಮಾತುಕತೆಗಳಲ್ಲಿಯೂ ಭಾರತ ಮತ್ತು ಮಲೇಷ್ಯಾ ನಡುವಿನ ಐತಿಹಾಸಿಕ ಹಾಗೂ ಸಾಂಸ್ಕೃತಿಕ ಸಂಬಂಧಗಳನ್ನು ಅನ್ವರ್ ಇಬ್ರಾಹಿಂ ನಿರಂತರವಾಗಿ ಪ್ರಸ್ತಾಪಿಸುತ್ತಿದ್ದು, ಭಾರತೀಯ ಜನಪ್ರಿಯ ಸಂಗೀತವನ್ನು ‘ಸಾಫ್ಟ್ ಪವರ್‌’ ರಾಜತಾಂತ್ರಿಕತೆಯ ಪ್ರಮುಖ ಸೇತುವೆಯಾಗಿ ಬಳಸುತ್ತಿದ್ದಾರೆ ಎಂದು ವಿಶ್ಲೇಷಕರು ಅಭಿಪ್ರಾಯಪಡುತ್ತಾರೆ.

ಭಾರತ ಮಂಟಪಂ (Bharat Mandapam) ನಲ್ಲಿ ನಡೆದ ಬ್ರಿಕ್ಸ್‌ ಶೃಂಗಸಭೆಯ ಪ್ರಮುಖ ಅಧಿವೇಶನಗಳಲ್ಲಿ ನವದೆಹಲಿ ಘೋಷಣಾಪತ್ರ (New Delhi Declaration) ಅಂಗೀಕಾರ, ಜಾಗತಿಕ ಆರ್ಥಿಕ ಆಡಳಿತ ವ್ಯವಸ್ಥೆಯ ಸುಧಾರಣೆ, ವ್ಯಾಪಾರ ಸಹಕಾರ ಮತ್ತು ಪರಸ್ಪರ ಕಾರ್ಯಸಾಮರ್ಥ್ಯ (Trade Interoperability) ಸೇರಿದಂತೆ ಹಲವು ಮಹತ್ವದ ಜಾಗತಿಕ ವಿಷಯಗಳ ಕುರಿತು ಚರ್ಚೆಗಳು ನಡೆದವು.
ಆದರೆ ಗಂಭೀರ ರಾಜತಾಂತ್ರಿಕ ಚರ್ಚೆಗಳ ನಡುವೆಯೂ ಅನ್ವರ್ ಇಬ್ರಾಹಿಂ ಅವರ ಬಾಲಿವುಡ್‌ ಹಾಡಿನ ಪ್ರದರ್ಶನವು ಅಂತಾರಾಷ್ಟ್ರೀಯ ಸಂಬಂಧಗಳಲ್ಲಿ ಸಾಂಸ್ಕೃತಿಕ ಬಾಂಧವ್ಯ ಮತ್ತು ‘ಸಾಫ್ಟ್ ಪವರ್‌’ ಪಾತ್ರ ಎಷ್ಟೊಂದು ಮಹತ್ವದ್ದಾಗಿದೆ ಎಂಬುದನ್ನು ನೆನಪಿಸಿತು.
ಆಹ್ವಾನಿತ ಸದಸ್ಯ ರಾಷ್ಟ್ರವಾಗಿ ಮಲೇಷ್ಯಾವನ್ನು ಪ್ರತಿನಿಧಿಸಿದ ಅನ್ವರ್ ಇಬ್ರಾಹಿಂ ಅವರ ಈ ಸಾಂಸ್ಕೃತಿಕ ಅಭಿವ್ಯಕ್ತಿ, ಆಸಿಯಾನ್‌ (ASEAN) ರಾಷ್ಟ್ರಗಳು ಮತ್ತು ವಿಸ್ತೃತ ಬ್ರಿಕ್ಸ್‌ ಒಕ್ಕೂಟದ ನಡುವಿನ ಬೆಳೆಯುತ್ತಿರುವ ಸಾಂಸ್ಕೃತಿಕ ಹಾಗೂ ಆರ್ಥಿಕ ಸಹಭಾಗಿತ್ವಕ್ಕೂ ಹೊಸ ಸಂದೇಶ ನೀಡಿದೆ.